ក្រុមការងារជំនាញ ដឹកនាំដោយ ឯកឧត្ដមវេជ្ជបណ្ឌិត គីមសួរ ភិរុណ ប្រធានមន្ទីរសុខាភិបាល នៃរដ្ឋបាលខេត្តកំពង់ចាម ដោយមានការចូលរួមពី លោក ភោគ សាវុធ អភិបាលស្រុកកងមាស និងលោក ស៊ីម គង់ អភិបាល ស្រុកស្រីសន្ធរ កំពុងចុះយកសំណាកប្រជាពលរដ្ឋ នៅឃុំពាមជីកង ស្រុកកងមាស និងនៅមណ្ឌលសុខភាពស្វាយខ្សាច់ភ្នំ ស្រុកស្រីសន្ធរ ខេត្តកំពង់ចាម ពាក់ព័ន្ធ នឹងព្រឹត្តិការណ៍អាពាហ៍ពិពាហ៍ស្ថិតនៅភូមិកោះតូច ស្រុកកងមាស កាលពីថ្ងៃទី២១ ខែកុម្ភៈ កន្លងទៅ ។
សូមបញ្ជាក់ថា កាលពីថ្ងៃទី២៦ កុម្ភៈ ឆ្នាំ២០២១នេះ រដ្ឋបាលខេត្តកំពង់ចាម បានធ្វើសេចក្ដីប្រកាសព័ត៌មាន ដល់ប្រជាពលរដ្ឋ រស់នៅក្នុងខេត្តកំពង់ចាម ជាពិសេស ប្រជាពលរដ្ឋ នៅក្នុងស្រុកកងមាស ដែលពាក់ព័ន្ធនឹងអាពាហ៍ពិពាហ៍ ១កន្លែង ស្ថិតនៅភូមិកោះតូច ឃុំពាមជីកង ស្រុកកងមាស កាលពីថ្ងៃទី២១ កុម្ភៈ កន្លងទៅ ។ ពាក់ព័ន្ធនឹងហេតុការណ៍នេះ គឺមានបុរសជនជាតិខ្មែរម្នាក់ រស់នៅសង្កាត់ទួលសង្កែ ខណ្ឌឬស្សីកែវ រាជធានីភ្នំពេញ បានមកចូលរួមពិធីនេះ ។ ដោយឡែក បន្ទាប់ពីទទួលព័ត៌មាន ពីក្រសួងសុខាភិបាល នាព្រឹកថ្ងៃទី២៦ កុម្ភៈ បានរកឃើញបុរសម្នាក់ ដែលបានមកចូលរួមក្នុងពិធីមង្គលការនេះ មានផ្ទុកមេរោគ covid-19 រដ្ឋបាលខេត្តកំពង់ចាម ក៏បានចាត់ឲ្យមន្ទីរសុខាភិបាល នៃរដ្ឋបាលខេត្ត ដឹកនាំមន្ត្រីជំនាញចុះស្រាវជ្រាវ និងកំណត់មុខសញ្ញា ដែលពាក់ព័ន្ធនឹងព្រឹត្តិការណ៍នេះ ក្នុងនោះគឺមាន ៖ ឪពុក ម្ដាយកូនកម្លោះ កូនក្រមុំ និងកូនកម្លោះ កូនក្រមុំ រួមជាមួយនឹងអ្នកកំដរ អ្នករួមតុ ក្រុមអ្នកសំអាងការ អ្នកថតរូប និងចុងភៅ អ្នកលើកម្ហូប ផងដែរ ។
ជាមួយនោះ ដើម្បី ចូលរួមទប់ស្កាត់ការឆ្លងរាលដាលពីជម្ងឺ covid-19 ក្នុងសហគមន៍ រដ្ឋបាលខេត្តកំពង់ចាម ក៏បានអំពាវនាវ ដល់អ្នកដែលបានមកចូលរួម ក្នុងពិធីមង្គលការ និងអ្នកពាក់ព័ន្ធ នៅក្នុងព្រឹត្តិការណ៍នោះ ទៅពិនិត្យសុខភាព និងយកសំណាក់ នៅទីតាំងដែលមន្ទីរសុខាភិបាល នៃរដ្ឋបាលខេត្តបានរៀបចំនោះ ។
តាមការគូសបញ្ជាក់ ពីក្រុមការងារជំនាញ ឲ្យដឹងថា មកដល់ពេលនេះ ក្រុមការងារកំពុងប្រមូលសំណាក់ប្រជាពលរដ្ឋ នៅស្រុកកងមាស ប្រមាណជា ៦០នាក់ និងបន្តទៅស្រុកស្រីសន្ធរ ប្រមាណជាង ១០០នាក់ ទៀត ផងដែរ ៕ សារ៉ាត
