អត្ថបទ៖ នួន សត្យា
អភិបាលខេត្តកំពង់ចាម ឯកឧត្តម អ៊ុន ចាន់ដា នៅរសៀលថ្ងៃទី១០ ខែមីនា ឆ្នាំ២០២១ បានដឹកនាំក្រុមការងារ ចុះដោះស្រាយបញ្ចប់បញ្ហាបេីក ផ្លូវសាធារណ: ត្រឹមតែជាង១០ម៉ោង ដែលរឿងនេះមានអាយុកាលជាង១០ឆ្នាំកន្លងមកហេីយ។ ករណីនោះស្ថិតក្នុងភូមិត្នោតលើ ឃុំឬស្សីស្រុក ស្រុកស្រីសន្ធរ ដោយភាគីទំនាស់យល់ព្រមរុះរេីរបងបេតុង និងបើកផ្លូវប្រើប្រាស់ជាសាធារណៈវិញ ។
សូមរំលឹកថា ករណីទំនាស់ដីផ្លូវសាធារណ: ខាងលើ កេីតឡេីងតាំងពីឆ្នាំ ២០០៥ មកម្ល៉េះ រហូតបានប្តឹងចូលតុលាការនៅឆ្នាំ ២០០៦ និងមានចេញដីកា កិច្ចការប្រញ៉ាប់ ក្នុងការបើកផ្លូវទទឹង៣ម៉ែត្រ។ តុលាកាបានបង្គាប់ឲ្យភាគីម្ខាងទៀតអនុវត្ត តែភាគីនោះ មិនព្រមអនុវត្តតាមការសម្រេចរបស់ដីកានោះ រហូតមកដល់បច្ចុប្បន្ននេះ។
ប៉ុន្តែយ៉ាងណាក៏ដោយ នៅរសៀលថ្ងៃទី១០ ខែមីនា ឆ្នាំ២០២១នេះ បន្ទាប់ពីទទួលបានគោលការណ៍ណែនាំដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី អភិបាលខេត្តកំពង់ចាម ឯកឧត្តម អ៊ុន ចាន់ដា បានដឹកនាំគណកម្មការចម្រុះខេត្ត ចុះដោះស្រាយបញ្ចប់ករណីវិវាទនេះ ដោយមានការចូលរួមពីសំណាក់ប្រធានតុលាកាខេត្តកំពង់ចាម លោក សួស ឡា និងព្រះរាជអាជ្ញា លោក វង្ស ប៊ុនវិសុទ្ធ រួមទាំងមន្ទីរជំនាញ ,អាជ្ញាធរមូលដ្ឋាន និង គូភាគីទាំងសងខាង និងអ្នកតំណាងភាគី ក៏មកចូលរួមផងដែរ ។
ដោយអនុវត្តតាមនីតិវិធីនៃការដោះស្រាយបញ្ហា និង ឈានដល់ការយល់ព្រមពីភាគីសាងសង់របងលេីដីផ្លូវសាធារណ: ក្នុងការស្ម័គ្រចិត្តរុះរេីរបងថ្មដោយខ្លួនឯង ទន្ទឹមនឹងនេះជាការឆ្លេីយតបតាមសំណូមពររបស់គូរភាគីទំនាស់ សម្តេចតេជោ នាយករដ្ឋមន្ត្រី បានជួយឧបត្ថម្ភថវិកា ចំនួន ៥ លានរៀល សម្រាប់រុះរើផ្ទះ និងរបងថ្ម ចេញពីផ្លូវសាធារណៈ ដែលភាគីបង្កបានបិទរយៈពេលជាង១៦ ឆ្នាំមកហើយ។
សូមបញ្ជាក់ថា ការដោះស្រាយនេះដែរ គូភាគីបានព្រមព្រាងទទួលយកទាំងសងខាងដោយក្តីរីករាយ និងបានថ្លែងអំណរគុណយ៉ាងជ្រាលជ្រៅ ចំពោះ សម្តេចតេជោនាយករដ្ឋមន្ត្រី ហ៊ុន សែន រួមទាំងក្រុមការងារទាំងអស់ ដែលបានចុះមកជួយដោះស្រាយជូនពួកគាត់៕
