អាជ្ញាធរក្រុង/ស្រុក និងមន្ទីរ/អង្គភាព នៅទូទាំងខេត្តកមពង់ចាម គួតែធ្វើលិខិតស្នើសុំទៅប្រធានប្រតិភូបេឡាជាតិរបបសន្តិសុខសង្គម (ប.ស.ស) ដើម្បីចាត់មន្ត្រីជំនាញចុះមកធ្វើការផ្សព្វផ្សាយពីអត្ថប្រយោជន៍ និងព័ត៌មានផ្សេងៗពីការប្រើប្រាស់ប័ណ្ណ (ប.ស.ស) ។
នៅថ្ងៃពុធទី២១ ខែមីនា ឆ្នាំ២០១៩ ក្នុងកម្មវិធីសន្ទនាមតិនៃវិទ្យុជាតិខេត្តកំពង់ចាមលោក សាយ សុធន ប្រធានការិយាល័យបេឡាជាតិរបបសន្តិសុខសង្គម (ប.ស.ស) ខេត្តកំពង់ចាមមានប្រសាសន៍ថា ត្រឹមខែមីនាឆ្នាំ២០១៩ នេះ ក្នុងខេត្តកំពង់ចាមមានតែ រដ្ឋបាលសាលាខេត្ត មន្ទីរកសិកម្មរុក្ខា ប្រម៉ាញ់ និងនេសាទ និងមន្ទីរសង្គមកិច្ចអតីតយុទ្ធជននិងយុវនីតិសម្បទាតែប៉ុណ្ណោះ ដែលទទួលបានការចុះផ្សព្វផ្សាយផ្ទាល់ដល់មន្ត្រីរាជការពីអត្ថប្រយោជន៍នៃប្រើប្រាស់ប័ណ្ណ (ប.ស.ស) ។
លោក សាយ សុធន បន្តថា នៅមានមន្ត្រីរាជការសាធារណៈ និងនិវត្តន៍ជនមួយចំនួនមិនទាន់បានយល់ពីអត្ថប្រយោជន៍ និងព័ត៌មានផ្សេងៗពីការប្រើប្រាស់ប័ណ្ណ (ប.ស.ស) នៅឡើយ ដូចនេះ ដើម្បីបង្កលក្ខណៈឲ្យពួកគាត់យល់ពីការទទួលបានសេវា (ប.ស.ស) កាន់តែច្បាស់ សូមអាជ្ញាធរក្រុង/ស្រុក និងមន្ទីរ/អង្គភាពនៅទូទាំងខេត្តកមពង់ចាម គួតែធ្វើលិខិតស្នើសុំទៅប្រធានប្រតិភូបេឡាជាតិរបបសន្តិសុខសង្គម ដើម្បីចាត់មន្ត្រីជំនាញចុះមកផ្សព្វផ្សាយបន្ថែម។
ការចែកប័ណ្ណបេឡាជាតិរបបសន្តិសុខសង្គម (ប.ស.ស) ចាប់ផ្តើមនៅខែវិច្ឆិកា ឆ្នាំ២០១៨ សម្រាប់ខេត្តកំពង់ចាមមានមន្ត្រីរាជការសាធារណៈនិងនិវត្តន៍ជនចំនួនជាង ១៥ពាន់នាក់ ហើយទទួលបាន ប័ណ្ណ (ប.ស.ស) យកទៅប្រើប្រាស់ទទួលសេវាថែទាំសុខភាព និងហានិភ័យការងារ៕
ដោយៈ លោក អឿន ស្រួ
