លោក ហ៊ល ញ៉ុង ប្រធានក្រុមប្រឹក្សាឃុំសណ្តែកបានឲ្យដឹងថា ត្រឹមឆ្នាំ២០១៩នេះ ទូទាំងឃុំសណ្តែក ប្រជាជនដែលមានបង្គន់អនាម័យប្រើប្រាស់ត្រឹមតែជាង ៩០០បង្គន់តែប៉ុណ្ណោះ ក្នុងចំណោមប្រជាជនសរុបជាង៣៤០០គ្រួសារ។
លោកមេឃុំបានប្រាប់វិទ្យុជាតិភ្នំប្រុសភ្នំស្រីខេត្តកំពង់ចាមថា តាមផ្ទះប្រជាពលរដ្ឋមួយចំនួនធំ ពុំទាន់គិតគូរសង់បង្គន់អនាម័យប្រើប្រាស់នោះទេ ពោលគឺ ការបន្ទោបង់ប្រព្រឹត្តទៅនៅទីវាល ឬការជីកដីកប់នៅទីឆ្ងាយពីផ្ទះ។ បើទោះបីចំនួនបង្គន់មានតិច ប្រហែល៣០ភាគរយនៃចំនួនគ្រួសារសរុប ប៉ុន្តែនេះជាការកើតយ៉ាងលឿន ព្រោះប៉ុន្មានឆ្នាំមុនមានគ្រួសារតិចតួចណាស់ដែលមានបង្គន់អនាម័យប្រើប្រាស់។
លោកបន្ថែមថា ឃុំសណ្តែកមានអង្គការចំនួន៣ ដែលបានសហការណ៍ជាមួយមន្ទីរអភិវឌ្ឍន៍ជនបទ និងរដ្ឋបាលឃុំដើម្បីធ្វើបង្គន់អនាម័យឲ្យអ្នកគ្មានលទ្ធភាព ដោយពួកគាត់គ្រាន់តែជួយជាបដិភាគតិចតួចទៅតាមប្រភេទបង្គន់តែប៉ុណ្ណោះ។ លោកបន្តថា គម្រោងឆ្នាំ២០១៩នេះ មានអ្នកមកចុះឈ្មោះដើម្បីធ្វើបង្គន់រួច ចំនួន៦៨៨គ្រួសារ និងមានមកបន្តចុះឈ្មោះជាបន្តបន្ទាប់ទៀត។ លោករំពឹងថា បើតាមចំនួនកើនឡើងនេះ ត្រឹមឆ្នាំ២០២៣ ឬ២០២៥ ប្រជាជនលោកនឹងមានបង្គន់អនាម័យប្រើប្រាស់ពី ៧០ទៅ ៨០ភាគរយ។
ឃុំសណ្តែកស្ថិតនៅក្នុងស្រុកបាធាយ ខេត្តកំពង់ចាម មានប្រជាពលរដ្ឋសរុបចំនួន១២៨៣៥នាក់ ដែលស្មើនឹង៣៤៩៥គ្រួសារ។កង្វះបង្គន់អនាម័យជា មូលហេតុចម្បង ធ្វើឲ្យមានការបំពុលដី ខ្យល់ និងទឹក តាមរយៈការបន្ទោបង់នៅតាមព្រៃ ឬទីវាល។ មិនត្រឹមតែបំពុលដល់បរិស្ថាន ហើយវាក៏បង្កជាផលលំបាកជាច្រើនដល់សុខភាពមនុស្សផងដែរតួយ៉ាង ការចម្លងមេរោគយ៉ាងឆាប់រហ័ស ដែលបង្កឲ្យ រាគរូស មានជំងឺឆ្លងផ្សេងៗធ្វើឲ្យខាតពេលវេលា រៀនសូត្រ និងការរកស៊ី និងខាតលុយកាក់ចំណាយលើការព្យាបាលផងដែរ។
ការពុំមានបង្គន់អនាម័យប្រើប្រាស់ត្រឹមត្រូវ ក៏បង្កឲ្យ ប្រជាពលរដ្ឋមានអារម្មណ៍ខ្មាសអៀន និងអាចជួបបញ្ហាផ្សេងទៀត ពេលទៅបន្ទោរបង់ក្នុងព្រៃ ឬទីឆ្ងាយពីផ្ទះ ដូចជាសត្វកាចសាហាវខាំ ឬការបំពានលើរាងកាយជាដើម៕
អឿន ស្រួ
