អាជ្ញាធរស្រុកកងមាសបានឲ្យដឹងថា ផ្ទះចំនួន៥៨ខ្នង នៅតាមបណ្តោយដងទន្លេមេគង្គក្នុងឃុំសូគង ស្រុកកងមាស ខេត្តកំពង់ចាម កំពុងប្រឈមនឹងការបាក់ស្រុតចូលក្នុងទន្លេនៅរដូវវស្សាឆ្នាំ២០១៩នេះ ហើយអាជ្ញាធរកំពុងតែផ្សព្វផ្សាយ ណែនាំ និងជំរុញឲ្យប្រជាពលរដ្ឋរុះរើមុនពេលស្ថានភាពកាន់តែធ្ងន់ធ្ងរ។
លោក ភោគ សាវុធ អភិបាលរងស្រុកកងមាស មានប្រសាសន៍ប្រាប់វិទ្យុជាតិខេត្តកំពង់ចាមថា បើទោះបីកម្ពស់ទឹកទន្លេនៅទាប តែអាជ្ញាធរខេត្តកំពង់ចាម ប្រកាសឲ្យប្រជាពលរដ្ឋរស់នៅតាមដងទន្លេត្រូវមានការប្រុងប្រយ័ត្នឲ្យបានខ្ពស់បំផុត ពិសេសផ្ទះដែលនៅតាមតំបន់ដែលកំពុងបាក់ស្រុតច្រាំងចូលទៅក្នុងទន្លេ។
លោកបន្តថា ដោយមានការយកចិត្តទុកដាក់ខ្ពស់ពីលោកអភិបាលខេត្ត និងលោកអភិបាលស្រុកកងមាស បានឲ្យអាជ្ញាធរឃុំចុះពិនិត្យមើលស្ថានភាពគ្រោះថ្នាក់ជាក់ស្តែង និងស្រង់ចំនួនផ្ទះដែលប្រឈមនឹងការបាក់ស្រុតច្រាំងទន្លេ តាមដងទន្លេក្នុងនោះមាន ឃុំសូគង ឃុំរការគយ ឃុំពាមជីកង ឃុំនគរបាន ឃុំខ្ចៅ ឃុំអាកាអា ឃុំកងតាណឹង និងឃុំស្តៅ។ ដោយឃុំសូគង មានផ្ទះចំនួន៥៨ខ្នងត្រូងរុះរើ ប៉ុន្តែទើបរើបាន៣ខ្នងប៉ុណ្ណោះ នៅសល់៥៥ខ្នងទៀតដោយសាពួកគាត់ចាំមើលស្ថានភាពបន្តិចសិន ព្រោះទឹកមិនទាន់ហក់ឡើងនៅឡើយ និងការបាក់និងឃុំមួយចំនួនទៀតអាជ្ញាធរមូលដ្ឋានកំពុងចុះស្រង់ស្ថិតិ។
លោកអភិបាល រងស្រុក បានបន្ថែមថា អាជ្ញាធរស្រុក បានត្រៀមរួចជាស្រេចនូវកម្លាំង និងសម្ភារៈ ដើម្បីឆ្លើយតមនឹងគ្រោះទឹកជំនន់។ លោកបញ្ជាក់ថា អាជ្ញាធរនៅតែបង្កើនការផ្សព្វផ្សាយឲ្យប្រជាពលរដ្ឋស្តាប់សភាពការទឹកជំនន់ ពិសេសអ្នកនៅជាប់ច្រាំងទន្លេដែលអាចប្រឈមនឹងការបាក់ស្រុតច្រាំង គឺត្រូវរាយការណ៍មកកាន់អាជ្ញាធរឲ្យទាន់ពេលវេលា ដើម្បីមានកម្លាំងចុះជួយរុះរើ ជួយសង្គ្រោះតាមសភាពជាក់ស្តែង និងរកទីកន្លែងមានសុវត្តិភាពបញ្ចៀសពីគ្រោះថ្នាក់កើតឡើង៕
ដោយ លោក អឿន ស្រួ
