ករណីលែងលះមានតែតុលាការមួយគត់ដែលអាចសម្រេសេចក្តីបាន នេះជាកាលើកឡើងរបស់លោកស្ត្រី គុណ សុមុន្នី ប្រធានការិយាល័យផ្នែកច្បាប់នៃមន្ទីរកិច្ចការនារីខេត្តកំពង់ចាម។
កាលើកឡើងបែបនេះ នាក្នុងឱកាសលោកស្រីចូលរួមជាវាគ្មិនក្នុងកម្មវិធីសន្ទនាមតិ របស់វិទ្យុជាតិភ្នំប្រុសភ្នំស្រី ខេត្តកំពង់ចាម ក្រោមប្រធានបទ ដំណើរការលែងលះករណីហិង្សាក្នុងគ្រួសារ នាថ្ងៃ១៧ ខែកក្កដា នេះ។
លោកស្រីបន្តថា ករណីលែងលះអាចត្រូវបានលើកមកនិយាយជាពីចំណុច ទី១ ករណីអ្នកមានចំណងផ្លូវច្បាប់ បានចុះសំបុត្រអាពាហ៍ពិពាហ៍ អ្នកដែលផ្ដាច់ចំណងបានមានតែតុលាការតែប៉ុណ្ណោះ ទី២ ករណីអ្នកមិនមានសំបុត្រអាពាហ៍ពិពាហ៍ ច្បាប់មិនបានទទួលស្គាល់គាត់ជាប្ដីប្រពន្ធទេដូចនេះប្ដីប្រពន្ធអាច បង្ហាញថាចែកផ្លូវគ្នាត្រឹមឃុំសង្កាត់បាន តែនៅមានបញ្ហាបែងចែកទ្រព្យ និងសិទ្ធគ្រប់គ្រប់កូន ដែលជាចាំបាច់ត្រូវតែដាក់ពាក្យបណ្ដឹងទៅតុលាការជាអ្នកសម្រេចព្រោះ ឃុំគ្មានសិទ្ធិសម្រេចនោះទេ។
លោក ប្លោក សុវណ្ណ ចៅសង្កាត់កំពង់ចាម បានប្រាប់វិទ្យុជាតិភ្នំប្រុសភ្នំស្រីដែរថា បើតាមច្បាប់ស្ដីពីការគ្រប់គ្រងរដ្ឋាភិបាលថ្នាក់ក្រោមជាតិ មិនផ្ដល់សិទ្ធិសម្រេចករណីលែងលះ ឬបែងចែកទ្រព្យនោះទេគឺប្រើវិធានការសម្របសម្រួល តែប៉ុណ្ណោះ។
លោកបានបន្ថែមទៀតថា ក្រមរដ្ឋប្បវេណី ខ្មែរក៏បានកំណត់ផងដែរថា ឃុំ សង្កាត់ អាចសាកល្បងធ្វើការសម្របសម្រួលករណីលែងលះតែបើមិនត្រូវគ្នា ក្នុងអំឡុងពេល១៥ថ្ងៃត្រូវបញ្ជូនទៅកាន់តុលាការដើម្បីបន្តនីតិវិធី។
លោកស្រី គុណ សុមុន្នី បានបញ្ចាក់ប្រាប់ថា មន្ត្រីកិច្ចការនារីនិងផ្ដល់ការប្រឹក្សាផ្នែកច្បាប់ជូនស្រីរងគ្រោះ និងជួយសម្រួលដល់ការដំណើរការនីតិវិធីនៅតុលាការប្រសិនបើស្រីរងគ្រោះស្មើសុំ៕
មួន ធារី
