មន្ទីរអប់រំ​ខេត្តកំពង់ចាម អំពាវនាវ​ដល់​អាណាព្យាបាល​នាំ​កុមារ​គ្រប់​អាយុ​ចូលរៀន​

មន្ទីរអប់រំ​យុវជន និង​កីឡា​ខេត្តកំពង់ចាម បាន​ណែនាំ​ឲ្យ​គ្រប់​សាលា​ទាំងអស់ សហ​ការណ៍​ជាមួយ​អាជ្ញាធរ ធ្វើ​យុទ្ធនាការ​ផ្សព្វផ្សាយ​ទូទាំង​ខេត្ត ដើម្បី​រំលឹក​ដល់​អាណាព្យាបាល នាំ​កុមារ​ដែលមាន​អាយុ​៦​ឆ្នាំ ទៅ​ចុះឈ្មោះ​ចូលរៀន​ឲ្យ​បាន​គ្រប់ៗ​គ្នា និង​ឲ្យ​បាន​មុន​ថ្ងៃ​បើក​បវេសនកាល​ឆ្នាំ​សិក្សា​ថ្មី ២០១៩-២០២០ ដែល​នឹង​ប្រព្រឹត្តទៅ​នៅ​ថ្ងៃទី​០១ ខែវិច្ឆិកា ឆ្នាំ​២០១៩​។
​បើតាម​លោក ជា សុខ​ចំរើន ប្រធានការិយាល័យ​បឋមសិក្សា​នៃ​មន្ទីរអប់រំ​យុវជន និង​កីឡា​ខេត្តកំពង់ចាម បាន​ឲ្យ​ដឹងថា ដំណើរ​ការទទួល​ពាក្យ​ចុះឈ្មោះ​ចូលរៀន​ឆ្នាំ​សិក្សា​ថ្មី​ប្រព្រឹត្ត​ពីថ្ងៃ​ទី​១៥ ខែតុលា ដល់​ថ្ងៃទី​២៥ ខែតុលា និង​ចូលរៀន​នៅ​ថ្ងៃទី​០១ ខែវិច្ឆិកា ឆ្នាំ​២០១៩​។

​ការបើក​យុទ្ធនាកា​ផ្សាយ​នេះ ក្នុង​គោលបំណង រំលឹក​ដល់​មាតាបិតា អាណាព្យាបាល ដែលមាន កូនចៅ​គ្រប់​អាយុ ០៦ ឆ្នាំ ដើម្បី​នាំទៅ​ចុះឈ្មោះ​ចូលរៀន និង​ជំរុញ​លើកទឹកចិត្ត ដល់​សិស្សានុសិស្ស ឲ្យ​បន្ត​ការសិក្សា​ទៅមុខទៀត​។ នេះ​បើតាម លោក ជា សុខ​ចំរើន​។ លោក​បាន​បន្ថែមថា ក្នុង​ខេត្តកំពង់ចាម​មាន​សាលាបឋមសិក្សា​ចំនួន ៤៣៧​សាលា នៅ​ទូទាំង​ឃុំ សង្កាត់​ក្នុង​ខេត្តកំពង់ចាម​។ នៅ​ខេត្តកំពង់ចាម​ការចុះឈ្មោះ​ចូលរៀន​ឆ្នាំ​សិក្សា ២០១៨-២០១៩ មាន​សិស្ស ៩៦,៨០% លើស​ផែនការ​របស់​ក្រសួង​ដែល​បានកំណត់​ដែលមាន ៩៦,៥០% ។

​លោក ជា សុខ​ចំរើន ថា​មន្ទីរ​មានសង្ឃឹម​យ៉ា​មុតមាំ​ថា ឪពុកម្តាយ ឬ​អាណាព្យាបាល​នឹង​បាន​នាំ​កូន​ដែល​គ្រប់​អាយុ​៦​ឆ្នាំ ទៅ​ចុះឈ្មោះ​ចូល​ឲ្យ​បាន​គ្រប់​គ្រប់គ្នា​នៅ​សាលា​ដែល​នៅ​ជិត​ផ្ទះ ហើយ​បើ​គ្រួសារ​មាន​ជីវភាព​ក្រីក្រ​សូម​ទាក់ទង​ទៅ​អាជ្ញាធរ​ភូមិ ឃុំ ឬ​លោកនាយក​សាលា នោះ​នឹង​ទទួលបាន​អាហារូបករណ៍ និង​អាហារូបត្ថម្ភ​ពី​ក្រសួង​អប់រំ​យុវជន និង​កីឡា​៕

ដោយ​ អឿន ស្រួ