កំពង់ចាម ៖ ឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម និងឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម នៅថ្ងៃទី ៩ ខែមិនា ឆ្នាំ ២០២៥ នេះ បានអញ្ជើញសម្ភោធដាក់ឲ្យប្រើប្រាស់ជាផ្លូវការ នូវផ្លូវក្រាលកៅស៊ូមួយខ្សែប្រវែងជាង ៥,០០០ ម៉ែត្រ និងសមិទ្ធផលនានា ក្នុងវត្តព្រះវិហារ ស្ថិតក្នុងឃុំតាំងក្រសាំង ស្រុកបាធាយ ដែលចំណាយថវិកាសាងសង់សរុបប្រមាណជាង ១លាន ៣សែនដុល្លារអាមេរិក ។
ស្ថិតនៅក្នុងឱកាសសំណេះសំណាលជាមួយប្រជាពលរដ្ឋ អភិបាលខេត្តកំពង់ចាម ឯកឧត្តម អ៊ុន ចាន់ដា បានមានប្រសាសន៍ហើយដឹងថា ក្រៅពីផ្លូវក្រាលកៅស៊ូមួយខ្សែ ដែលមានប្រវែង ៥,៥០០ ម៉ែត្រ ពីទីប្រជុំជន ឃុំតាំងក្រសាំង ភ្ជាប់ទៅវត្តភ្នំព្រះវិហារ និងភូមិក្រដាស<ក> ភូមិក្រដាស<ខ> នៅមានសមិទ្ធផល ១៥ មុខទៀត ចំណាយថវិកាសាងសង់សរុបប្រមាណជា ១កាន ៣សែន ដុល្លារអាមេរិក ត្រូវបានសម្ពោធដាក់ឲ្យប្រើប្រាស់តាមសេចក្តីត្រូវការរបស់ប្រជាពលរដ្ឋក្នុងថ្ងៃនេះ ។
ឯកឧត្តមអភិបាលខេត្ត ក៏បានយកឱកាសនោះពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលសម្ដេច តែងតែមានការគិតគូរ អំពីសុខទុក្ខរបស់បងប្អូនប្រជាពលរដ្ឋមិនថានៅទីជិត ឬឆ្ងាយឡើយ។
ឯកឧត្តមអភិបាលខេត្ត បាន មានប្រសាសន៍ទៀតថា ស្របពេលដែលប្រទេសជាតិយើងមានសុខសន្តិភាព មានមេដឹកនាំដ៏ត្រឹមត្រូវ ធ្វើឲ្យមានការអភិវឌ្ឍន៍រីកចម្រើនក្នុងសហគមន៍ ក្នុងសង្គមជាតិ ពិតជាបានបោះជំហានយ៉ាងលឿន ធ្វើឱ្យបងប្អូនប្រជាពលរដ្ឋយើងមានសេចក្តីសោមនស្សរីករាយ និងជីវភាពធូរធារ ។ ជាមួយគ្នានេះដែរ ក៏ជាឱកាសឲ្យបងប្អូនប្រជាពលរដ្ឋយើងមានលទ្ធភាព ក្នុងការចូលរួមជាបច្ច័យដើម្បីកសាង នូវសមិទ្ធផលនានា តាមទីវត្តអារាម ធ្វើឱ្យទីវត្តអារាមមានការរីកចម្រើន និងអភិវឌ្ឍទៅមុខជាលំដាប់ ពោលគឺ វិស័យពុទ្ធចក្រនិងវិស័យអាណាចក្រមានការអភិវឌ្ឍន៍រីកចម្រើនព្រមជាមួយគ្នា៕
