ព្រះភិក្ខុធម្មបញ្ញោ តុញ សេងហ៊ាង មន្ត្រីសង្ឃវត្តជោតនារាមបឹងកុក មានសង្ឃដិការថា ថ្ងៃបុណ្យវិសាខបូជា ត្រូវបានរាជរដ្ឋាភិបាល ចាត់ទុកជាបុណ្យជាតិ។ ពិធីបុណ្យពិសាខបូជា គឺជាពិធីបុណ្យប្រពៃណីរបស់អ្នកកាន់ព្រះពុទ្ធសាសនា ដើម្បីរម្លឹកដល់ថ្ងៃព្រះពុទ្ធ ទ្រង់ប្រសូត្រ ត្រាស់ដឹង និងថ្ងៃព្រះអង្គចូលបរិនិព្វាន។
ព្រះអង្គមានសង្ឃដិការក្នុងកម្មវិធីសន្ទនាមតិនៃវិទ្យុជាតិភ្នំប្រុសភ្នំស្រីខេត្តកំពង់ចាមថា វិសាខបូជា គឺជាពិធីបុណ្យមួយដែលពុទ្ធសាសនិកចាត់ទុកថា មានសារសំខាន់បំផុតក្នុងចំណោមបុណ្យដទៃទៀតនៃព្រះពុទ្ធសាសនា។ តាមវត្តនានានៅទូទាំងប្រទេស បានប្រារព្ធពិធីបុណ្យពិសាខបូជាជារៀងរាល់ឆ្នាំ ហើយពិធីបុណ្យពិសាខបូជាត្រូវបានប្រារព្ធឡើង រៀងរាល់ឆ្នាំ នាថ្ងៃ១៥កើត ខែវិសាខ។ នៅឆ្នាំនេះ ត្រូវនឹងថ្ងៃសៅរ៍ទី១៨ ខែឧសភា ឆ្នាំ២០១៩។
ព្រះភិក្ខុធម្មបញ្ញោ តុញ សេងហ៊ាង មានសង្ឃដិការបញ្ជាក់ថា ការប្រារព្ធពិធីបុណ្យវិសាខបូជា គឺដើម្បីរម្លឹកដល់ព្រឹត្តិការណ៍ដ៏ពិសេសចំនួន៣ ដែលទាក់ទងនឹងព្រះសមា្មសម្ពុទ្ធ។ ព្រឹត្តិការណ៍ទាំងនោះ គឺ ការប្រសូត ការត្រាស់ដឹង និងការចូលនិព្វាន។
ព្រះពុទ្ធ មានព្រះនាមដើមថា សិទ្ធត្ថ (អានថា សិត-ធ័ត) ដែលជាព្រះរាជបុត្រារបស់ព្រះនាង សិរិមហាមាយា និងព្រះបាទ សុទ្ធោទនៈ។ ព្រះអង្គ ត្រូវបានគេហៅព្រះនាមជាច្រើនទៀត ដូចជា ព្រះសម្មាសម្ពុទ្ធ, ព្រះសមណគោតម, ព្រះជិនស្រី, ព្រះសក្យមុនី, ព្រះបរមគ្រូ, ព្រះសាស្តា ជាដើម។ ព្រះសាស្តា ទ្រង់ប្រសូត ត្រាស់ដឹង និងបរិនិព្វាន ក្នុងថ្ងៃ១៥កើត ពេញបូណ៌មី ខែវិសាខ ដូចគ្នា គឺខុសតែឆ្នាំប៉ុណ្ណោះ។ ដូច្នេះ បុណ្យវិសាខបូជា គឺតំណាងឲ្យ «ថ្ងៃទាំងបី» នេះឯឯ៕
អឿន ស្រ៊ួ
