ដោយៈ អឿន ស្រួ
កំពង់ចាម៖ កម្លាំងសមត្ថកិច្ចចម្រុះបានបើកយុទ្ធនាការបង្ក្រាបបទល្មើសនេសាទត្រីខុសច្បាប់ នៅរដូវបិទនេសាទឆ្នាំ២០១៨នេះ បានចំនួន៤២ករណី ព្រមទាំងបានដុតបំផ្លាញចោលនូវឧបករណ៍ខុសច្បាប់ជាច្រើន និងដោះលែងកូនត្រីចម្រុះចូលទៅក្នុងបឹងធម្មជាតិវិញបានជាង៤តោន។
លោក អ៊ុក ណារិន នាយខណ្ឌរដ្ឋបាលជលផលខេត្តកំពង់ចាមបានប្រាប់ថា ក្នុងរដូវបិទនេសាទឆ្នាំ២០១៨នេះ ការបង្ក្រាបបទល្មើសនេសាទកំពុងធ្វើយ៉ាងសស្រាក់សស្រាំគ្រប់តំបន់ទឹកលិច ដោយសហការជាមួយកម្លាំងសមត្ថកិច្ច សហគមន៍នេសាទ និងអាជ្ញាធរមូលដ្ឋាន។ លោកបន្តថា បទល្មើសនេសាទឆ្នាំ២០១៨នេះកើតឡើងច្រើនជាងឆ្នាំ ២០១៧ ដោយសារសកម្មភាពចុះបង្ក្រាបច្រើន និងឆ្នាំនេះកំពស់ទឹកខ្ពស់ជាងឆ្នាំមុនធ្វើឲ្យដែននេសាទកាន់តែរីកធំ។
លោកបានញ្ជាក់ថា «ជាលទ្ធផលពីថ្ងៃទី០១ ខែមិថុនា ដល់ ថ្ងៃទី២៩ ខែសីហា ឆ្នាំ២០១៨ បាន៤២ករណី ក្នុងនោះ លូស្បៃមុងចំនួន១០១៨មាត់, របាំងស្បៃមុងប្រវែង៤៩៦៧១ម៉ែត្រ, របាំងសាច់អួនប្រវែង៣២៣ម៉ែត្រ, បង្គោលចំនួន ១៧៦១២ដើម, លប៨គ្រឿង,ដាយសាច់អួនចំនួន៩មាត់,ឧបករណ៍រ៉ាវចំនួន១១មាត់, រុះរើរបាំងព្រួលរាំងផ្ជិតព្រែក ១១ម៉ែត្រ និងដោះលែងកូនត្រី៤៦៦២គីឡូក្រាម»។
ចំណែកលោកឧត្តមសេនីយត្រី អ៊ិត ដារ៉ា ស្នងការរងប្រឆាំងបទល្មើសនៃស្នងការដ្ឋាននគរបាលខេត្តកំពង់ចាម បានថ្លែងថា នៅរដូវទឹកឡើងឆ្នាំ២០១៨នេះ ការបង្ក្រាបបទល្មើសនេសាទគឺមានច្រើនករណី ហើយបើតាមរបាយការណ៍ និងការអនុវត្តលើបទល្មើសនេសាទមិនថយចុះទេ គឺមានការកើនឡើងជាងឆ្នាំ២០១៧។
លោកឧត្តមសេនីយត្រីបន្តថា «យើងធ្វើការផ្សព្វផ្សាយតាមរយៈភូមិឃុំមានសុវត្ថិភាពឲ្យពួកគាត់យល់ពីផលប៉ះពាល់ ពីការនេសាទខុសច្បាប់ និងប្រើវិធានការក្តៅ សហការណ៍ជាមួយជំនាញជលផលនិងសហគមន៍នេសាទចុះបង្ក្រាប ជាក់ស្តែងនូវឧបករណ៍ដែលច្បាប់ហាមឃាត់ហ្នឹងបានច្រើន។ ហើយយើងមិនមែនធ្វើតែពេលទឹកឡើងនេះទេ ពេលទឹកស្រកនឹងវិធានការខ្ពស់បំផុត អញ្ចឹងការបង្ក្រាបក៏ច្រើន យើងនឹងត្រៀមលក្ខណៈគ្រប់សព្វតាមបណ្តាស្រុក»។