នួន សត្យា
(កំពង់ចាម)៖ លោក អូត ឈាងលី អភិបាល នៃគណៈអភិបាលស្រុកជើងព្រៃ នៅព្រឹកថ្ងៃទី២២ ខែឧសភា ឆ្នាំ២០២១ បានដឹកនាំក្រុមការងារ ចុះធ្វើការប្រមូលសំណាក កម្មករ-កម្មការិនី ចំនួន ២៥០០ នាក់ ដែលពាក់ព័ន្ធនឹងជំងឺកូវីដ-១៩ នៅរោងចក្រ ជូ ហួយ ហ្វូតវៃ និងរៀបចំកន្លែងធ្វើចត្តាឡីស័កបន្ថែម ក្នុងភូមិសាស្ត្រ ស្រុកជើងព្រៃ ខេត្តកំពង់ចាម ។
អភិបាលនៃគណៈអភិបាលស្រុកជើងព្រៃលោក អូត ឈាងលី បានឲ្យដឹងថា លោក រួមជាមួយក្រុមការងារ បានចុះសម្របសម្រួលដល់ក្រុមការងារគ្រូពេទ្យ ចុះយកសំណាកកម្មការនី នៃរោងចក្រ ជូ ហួយ ហ្វួតវែ ចំនួន២៥០០នាក់ ដែលពាក់ព័ន្ធជាមួយអ្នកកើតជំងឺកូវីដ-១៩ មកធ្វើតេស្ត រកលទ្ធផល។
លោកអភិបាលស្រុក បានឲ្យដឹងទៀតថា ជាមួយគ្នានោះដែរក្រុមការងាររបស់ លោក បានចុះពិនិត្យការរៀបចំកន្លែង បន្ថែមសម្រាប់ធ្វើចត្តាឡីស័ក នៅវិទ្យាល័យ ហ៊ុន សែន ផ្ដៅជុំ ដែលមានបន្ទប់សរុបចំនួន២៨បន្ទប់ ។ និងបានជួបសួរសុខទុក្ខក្រុមការងារយាមប្រចាំការ កន្លែងមណ្ឌលធ្វើចត្តាឡីស័ក នៅវីទ្យាល័យហ៊ុនសែនស្គន់ និងសាលាបឋមសិក្សាស្គន់សរុបចំនួន ៥៨៦នាក់ និងបានផ្ដល់ម៉ាស ដល់ពួកគាត់ម្នាក់មួយ ផងដែរ ។
បន្ទាប់មក ក្រុមការងារបានចុះពិនិត្យស្ថានភាព យកសំណាកអ្នកពាក់ព័ន្ធប្រយោល និងផ្ទាល់ ជាមួយអ្នកវិជ្ចមានកូវីដ-១៩ ចំនួន២៣នាក់នៅសាលាបឋមសិក្សាសង្កែពងផងដែរ ។
