ឯកឧត្ដម អ៊ុន ចាន់​ដា ណែនាំ​ឲ្យ​ស្ត្រី​ជា​មាតា​ទាំងអស់ ត្រូវ​ដឹង​ឲ្យ​បាន​ច្បាស់ អំពី​វិធីសាស្ត្រ នៃ​ការចិញ្ចឹម និង​ការ​ថែ​រទាំ​ទារក និង​កុមារ​តូច​

អត្ថបទ៖ ចិន សារ៉ាត

ឯកឧត្ដម អ៊ុន ចាន់​ដា ប្រធាន​គណៈកម្មាធិការ​សាខា​កាកបាទក្រហមកម្ពុជា ខេត្តកំពង់ចាម ណែនាំ​ឲ្យ​ស្ត្រី​ជា​មាតា​ទាំងអស់ ត្រូវ​ដឹង​ឲ្យ​បាន​ច្បាស់ អំពី​វិធីសាស្ត្រ នៃ​ការចិញ្ចឹម និង​ការ​ថែ​រទាំ​ទារក និង​កុមារ​តូច ជាពិសេស ការតាមដាន​ការលូតលាស់​របស់​កូន ដើម្បី ឲ្យ​ម្តាយ​មាន​សុខភាព​រឹងមាំ ហើយ​កូនៗ​មាន​សុខភាព​ល្អប្រសើរ ។ ថ្លែង​យ៉ាង​ដូច្នេះ នៅក្នុង​ឱកាស​ដែល ឯកឧត្តម និង​លោកជំទាវ ញូ​ង ចរិយា អញ្ជើញ​ក្នុង​ពិធី​សំណេះសំណាល អបអរសាទរ​ខួប​ទី ១១ ទិវា​ជាតិ សុខភាព​មាតា ទារក និង​កុមារ ២១ កុម្ភៈ និង​នាំយក​អំណោយ​សម្ដេច​កិត្តិ​ព្រឹទ្ធ​បណ្ឌិត ចែកជូន​ស្ត្រី​មាន​ផ្ទៃពោះ និង​ស្ត្រី​មានកូន​តូច ១៥៨​នាក់ ដែល​រៀបចំ​ដោយ គណៈកម្មាធិការ​សាខា​កាកបាទក្រហមកម្ពុជា ខេត្តកំពង់ចាម នៅ​មន្ទីរ​សុខាភិបាល នៃ​រដ្ឋបាលខេត្ត នៅ​ព្រឹក​ថ្ងៃទី​២២ ខែកុម្ភៈ ឆ្នាំ​២០២១ នេះ ។​

បន្ទាប់ពី​ការអាន​នូវ​ខ្លឹមសារ​ទាំងស្រុង នៃ​សារលិខិត របស់​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា និង​ជា ឥស្សរជន​ឆ្នើម​ថ្នាក់ជាតិ ដែល​ផ្ញើជូន បងប្អូន ជនរួមជាតិ ក្នុងឱកាស​ទិវា​ជាតិ​សុខភាព​មាតា ទារក និង​កុមារ ថ្ងៃទី​២១ ខែកុម្ភៈ ឆ្នាំ​២០២១ ដោយ លោកជំទាវ ប៉ាង ដា​នី អនុប្រធាន​អចិន្ត្រៃយ៍ គណៈកម្មាធិការ​សាខា​កាកបាទក្រហមកម្ពុជា ខេត្តកំពង់ចាម រួចមក ឯកឧត្តម អ៊ុន ចាន់​ដា បាន​អំពាវនាវ​ដល់ គ្រប់​ថ្នាក់ គ្រប់ផ្នែក ត្រូវ​យកចិត្តទុកដាក់ អនុវត្តតាម​អនុសាសន៍ ដ៏​ខ្ពង់ខ្ពស់ របស់​សម្តេច​កិត្តិ​ព្រឹទ្ធ​បណ្ឌិត ប្រធាន​កាកបាទក្រហមកម្ពុជា បានផ្តល់​ក្នុង​សារលិខិត​នេះ ដោយ​ត្រូវ​រួមគ្នា ជួយ​ឲ្យ​ស្ត្រី​មាន​ផ្ទៃពោះ​ទាំងអស់ ទទួលបាន​ការពិនិត្យ​ថែទាំ តាំងពី​ពរ​ពោះ រហូត​ដល់ពេល​សម្រាល និង​បន្ទាប់ពី​សម្រាល ត្រូវ​បន្ត​ថែទាំ​សុខភាព ទាំង​ម្តាយ ទាំង​ទារក រហូត​កូន​មាន​អាយុ ២​ឆ្នាំ ។ ប្រការ​ដែល​សំខាន់ គឺ​ស្ត្រី​ជា​មាតា​ទាំងអស់ ត្រូវ​ដឹង​អោយបាន​ច្បាស់​ពី​ការចិញ្ចឹម​ទារក និង​កុមារ​តូច ការតាមដាន​ការលូតលាស់​របស់​កូន ការជួយ​ឲ្យ​ម្តាយ​មាន​សុខភាព​រឹងមាំ ហើយ​កូន​អាច​ទទួលបាន​ការថែទាំ​ពេញលេញ​ពី​ម្តាយ និង​មាន​សុខភាព​ល្អ ។ ដោយឡែក ក្នុងស្ថានភាព​ដែល​ប្រទេស​យើង មានការ​រំខាន ពី​មេរោគ​កូ​វីដ ១៩ នោះ ឯកឧត្តម​ប្រធាន​គណៈកម្មាធិការ​សាខា បាន​ក្រើនរំលឹក​ដល់ ស្ត្រី​មាន​ផ្ទៃពោះ ស្ត្រី​ជា​មាតា និង​អ្នកចូលរួម​ទាំងអស់ ត្រូវ បន្ត «​រស់នៅ​ធម្មតា តាមបែប​គន្លង​ថ្មី​» ដោយ​អនុវត្ត​ឲ្យ​បាន​ខ្ជាប់ខ្ជួន នូវ​វិធានការ​ការពារ​ខ្លួន តាមរយៈ យុទ្ធសាស្ត្រ «៣​ការពារ និង ៣​កុំ​» របស់​សម្តេច​តេ​ជោ សែន និង​វិធានកា​រើ​ណែនាំ​នានា របស់​ក្រសួងសុខាភិបាល ផងដែរ ។​

នាឱកាស​នោះដែរ ឯកឧត្ដម អ៊ុន ចាន់​ដា និង​លោកជំទាវ និង​ប្រតិភូ ក៏បាន​ចែក​អំណោយ របស់​សម្តេច​កិត្តិ​ព្រឹទ្ធ​បណ្ឌិត ជូន​ស្ត្រី​ដែល​បាន​ចូលរួម ១០០​នាក់ ម្នាក់ៗ​ទទួលបាន ៖ មី ១​កេស ឃី​ត ១​កញ្ចប់ ស្ករស ១​គ​.​ក្រ ទឹកដោះខាប់ ១​កំប៉ុង ម្សៅ​លាប​ខ្លួន​ទារក ១​ដប សាប៊ូ​ដូ​ស​ខ្លួន​ទារក ១​ដប ខោ​ទឹកនោម​ទារក ១​យួរ និង​ថវិកា ២០.០០០​រៀល ។​

ក្នុងឱកាស​នោះដែរ លោកជំទាវ ញូ​ង ចរិយា អ៊ុន​ចាន់​ដា និង លោកជំទាវ ប៉ាង ដា​នី ក៏បាន​បន្តដំណើរ អញ្ជើញ​ចុះសួរសុខទុក្ខ អ្នក​ជម្ងឺ​ជា​ស្ត្រី ដែល​ទើប​សម្រាលកូន កំពុង​សម្រាក​ក្នុង​មន្ទីរពេទ្យ​ខេត្ត ផងដែរ។