ឯកឧត្តម ខ្លូត ផន បើក​កិច្ចប្រជុំ​បូ​សរុប​ការងារ​ប្រចាំឆ្នាំ​២០២០ និង​លើក​ទិសដៅ​បន្ត​ឆ្នាំ​២០២១ ​របស់​គណៈកម្មាធិការ​ពិគ្រោះ​យោបល់​កិច្ចការ​ស្ត្រី និង​កុមារ ខេត្តកំពង់ចាម​

អត្ថបទ៖ ចិន សារ៉ាត

​នៅ​សាលាខេត្ត​កំពង់ចាម ថ្ងៃទី​២២ ខែកុម្ភៈ ឆ្នាំ​២០២១ មាន​បើក​កិច្ចប្រជុំ​បូកសរុប​លទ្ធផល​ការងារ​ប្រចាំឆ្នាំ​២០២០ និង​លើក​ទិសដៅ​បន្ត​ឆ្នាំ​២០២១ របស់​គណៈកម្មាធិការ​ពិគ្រោះ​យោបល់​កិច្ចការ​ស្ត្រី និង​កុមារ​ខេត្ត ក្រោម​អធិបតីភាព ឯកឧត្តម ខ្លូត ផន ប្រធាន​ក្រុមប្រឹក្សា ខេត្តកំពង់ចាម និង​ដោយ​បានការ អញ្ជើញ​ចូលរួម​ពី​សំណាក់​ក្រុមការងារ របស់​គណៈកម្មាធិការ នៅតាម​បណ្ដា​ក្រុង​/​ស្រុក ទាំង​១០ ព្រមទាំង តំណាង​អង្គការក្រៅរដ្ឋាភិបាល និង​ស្ថាប័ន​ពាក់ព័ន្ធ​មួយចំនួនទៀត ផងដែរ ។​

បន្ទាប់ពី លោកជំទាវ អន​ហេង លក្ខណា ប្រធាន​គណៈកម្មាធិការ​ពិគ្រោះ​យោបល់​កិច្ចការ​ស្ត្រី និង កុមារ​ខេត្តកំពង់ចាម បាន​ឡើង​របាយការណ៍ របស់​គណៈកម្មាធិការ​ពិគ្រោះ​យោបល់​កិច្ចការ​ស្ត្រី និ​កុមារ រួចមក លោកជំទាវ ជាន ឡេង​ទាង អនុប្រធាន​គណៈកម្មាធិកា​រ បាន​អាន​របាយ​ការ​បូកសរុប​ការអនុវត្ត​ការងារ​ប្រចាំឆ្នាំ​២០២០ និង​លើក​ទិសដៅ​បន្ត​ឆ្នាំ​២០២១ ។

ក្នុងរបាយការណ៍ បានបញ្ជាក់​ផងដែរ អំពី​លទ្ធផល​ការងារ​មួយចំនួន ដែល​ក្រុមការងារ​បាន​អនុវត្ត​កន្លងមក រហូត​ទទួលបាន​នូវ​លទ្ធផល ដ៏​ត្រចះត្រចង់​។​នៅក្នុង​នោះដែរ ក៏​ជួបប្រទះ និង​បញ្ហា​ប្រឈម​មួយចំនួន ដោយសារតែ​គណៈកម្មាធិកា​រ​ពិគ្រោះ​យោបល់​កិច្ចការ​ស្ត្រី និង​កុមារ​ក្រុង​/​ស្រុក​មួយចំនួន មិនទាន់​បានទទួល​ថ​វិកា ដើម្បី គាំទ្រ​សកម្មភាព​ការ​មួយចំនួន ក៏​មិន ទាន់​បាន​យល់ច្បាស់ អំពី​ទួ​នាទី និង​ភារកិច្ច ខ្លួន​ដែរ ។ ក្រៅពីនោះ ស្ត្រី​មួយចំនួន​គ្មាន​ការងារ​ធ្វើ មួយចំនួន ជា​ជន​វិកល​ច​រិ​ក អនាថា ចាស់ជរា​គ្មាន​ទីពឹង​ដែលជា​កង្វល់ ស្ត្រី​មួយចំនួនទៀត គ្មាន​ឆន្ទៈ​ជួយ​ខ្លួនឯង ដោយ​រង់ចាំតែ​ជំនួយ ពី​សប្បុរសជន និង​ជា​បញ្ហា​ផងដែរ គឺ​ដោយសារ​កូ​វីដ​១៩ ។ ជាមួយ​នោះ ក្នុង​របាយការណ៍ ក៏បាន​លើកឡើង​ផងដែរ អំពី​ទិសដៅ​សម្រាប់​ឆ្នាំ​២០២១ ដោយ​ការបន្ត​ស្វែងរក​ការគាំទ្រ ដើម្បី គ​.​ក​.​ស​.​ក​. ក្រុង​/​ស្រុក ដែល​ខ្វះ​ថវិកា​គាំទ្រ​សកម្មភាព ដោយ​ទទួលបាន​កញ្ចប់​ថវិកា​ទោះ​តិច ឬ​ច្រើន និង​បន្ត​ចុះ​គាំទ្រ​ពង្រឹងសមត្ថភាព គ​.​ក​.​ស​.​ក ក្រុង​/​ស្រុក និង គ​.​ក​.​ន​.​ក ឃុំ​/​សង្កាត់ បន្ត​ស្វែងរក​ការងារ ឲ្យ​ស្ត្រី​មានការ​ងារ​ធ្វើ បន្ត​ស្វែងរក​ដំណោះស្រាយ​បង្កើត ឲ្យ​មាន​មជ្ឈមណ្ឌល​ថែរក្សា​ចាស់ជរា គ្មាន​ទីពឹង និង​ជន​វិកល​ច​រិ​ក បន្ត​លើទឹក​ចិត្ត​ស្ត្រី​ឲ្យ​មាន​ឆន្ទៈ​ជួយ​ខ្លួនឯង បាន​រួច​ផុតពី​ភាពក្រីក្រ និង​បន្តការងារ ដោយ​ស្មារតី​ប្រុងប្រយ័ត្ន និង​ទទួលខុសត្រូវ​ខ្ពស់ តាម​ការណែនាំ របស់​ក្រសួងសុខាភិបាល ។​

ឯកឧត្តម ខ្លូត ផន ប្រធាន​ក្រុមប្រឹក្សា ខេត្តកំពង់ចាម បាន​សំដែង​នូវ​ការកោតសរសើរ យ៉ាង​ជ្រាលជ្រៅ​បំផុត ចំពោះ គណៈកម្មាធិការ​ពិគ្រោះ​យោបល់​កិច្ចការ​ស្ត្រី និង​កុមារ ដែល​បាន​អនុវត្ត​ការងារ រហូត​សម្រេច​លទ្ធផល ជោគជ័យ នាពេល​កន្លងមក ។ ឯកឧត្តម បន្តថា ជាកា​ពិតណាស់​ទៅ​បី​ជា​យើង​ទទួលបាន​ភាពជោគជ័យ​មែន ក៏ដោយ ប៉ុន្តែ ជ័យជំនះ ទាំងអស់នេះ នៅ​មិនទាន់​បានសម្រេច​ដូច​បំណង នៅឡើយ​ទេ ចឹ​ង​ទេ ក្រុមការងារ​របស់​យើង​ត្រូវតែ​តស៊ូ អត់ធ្មត់ ព្រោះ​ដំណើការ​ផ្អែកលើ​ផលទុន របស់​ជាតិ ។ ដូចនេះ ទាមទា​ឲ្យ​យើង​ស្វែងរក​ការគាំទ្រ​តាម​គម្រោង​ផែនការ​ប្រចាំឆ្នាំ របស់​ក្រុមប្រឹក្សា​ទាំងបី​ប្រភេទ ដៃគូ​អភិវឌ្ឍន៍ វិស័យ​ឯកជន បណ្ដា​សាសនា​នានា ដោយយោង​លើ​របាយការណ៍​ច្បាស់លាស់ មាន​លិខិតបទដ្ឋាន​គ្រប់គ្រាន់ ទុកជា​វត្ថុតាង ដើម្បី ទាមទារ​បាន​នូវ​សុក្រឹត្យភាព​ការងារ ។ ជាមួយ​នោះ សកម្មភាព​ចលនា​ស្ត្រី បម្រើ​កិច្ចការងារ​សង្គម ត្រូវ​រៀបចំ​ចលនា​ស្ត្រី​ឲ្យ​យល់​ពី​ការងារ​សុខមាលភាព ក្នុង​គ្រួសារ និង​សង្គម អប់រំ​ស្ត្រី​ចលនា​លើកស្ទួយ​ជីវភាព​គ្រួសារ ដោយ​ផ្សាភ្ជាប់​សេដ្ឋកិច្ច និង​មុខរបរ​ជា ជាង​ការរង់ចាំ​សំណាង មកដល់​នោះ។