ដើម្បីបង្ហាញពីលទ្ធផលនិងការវិវត្តន៏រីកចំរើនទៅលើកំណើនសេដ្ឋកិដ្ឋផ្នែកផលិតផលក្នុងស្រុក នាព្រឹកថ្ងៃ២៨តុលា ខេត្តកំពង់ចាមបើកិច្ចប្រជុំ ផ្សព្វផ្សាយពីលទ្ធផលបឋមផលិតផលក្នុងស្រុកសរុប(GDP) ឆ្នាំ២០១៨ នៅមន្ទីរផែនការខេត្ត ដោយមានការអញ្ជើញចូលរួមពី ឯកឧត្តម រិន វីរៈ រដ្ឋលេខាធិការប្រចាំការក្រសួងផែនការ ឯកឧត្តម អ៊ុន ចាន់ដា អភិបាលខេត្តកំពង់ចាម និងមន្ត្រីរាជការមន្ទីរពាក់ពន្ធ័ក្នុងខេត្ត។
ឯកឧត្តម អ៊ុន ចាន់ដា បានលើកឡើងថា សព្វថ្ងៃនេះរដ្ឋបាលខេត្តកំពង់ចាម មានការរីកចម្រើនឥតឈប់ឈរ តាមរយៈការលើកកម្ពស់គុណភាពនៃការផ្តល់សេវាសាធារណៈ ជូនប្រជាពលរដ្ឋឲ្យកាន់តែមានប្រសិទ្ធភាពខ្ពស់ស្របតាមគោលនយោបាយ និងកម្មវិធីអភិវឌ្ឍន៍ជាតិ។ ជាក់ស្តែងខេត្តក៍បានទាក់ទាញអ្នកវិនិយោគធំតូច បានសាងសង់រោងចក្រមានចំនួន១៧រោងចក្រ ស្ថិតក្នុងស្រុកបាធាយ ស្រុកជើងព្រៃ ស្រុកព្រៃឈរ និងស្រុកចំការលើ ដែលអាចស្រូបយកកំលាំងពលកម្ម កម្មករ កម្មការនី សរុប ៣១,៣៣៦នាក់ ដែលជាចំណែកមួយចូលរួមក្នុងការកាត់បន្ថយភាពក្រីក្ររបស់ប្រជាពលរដ្ឋ ក៏ដូចជាចូលរួមក្នុងកំណើនសេដ្ឋកិច្ចរបស់ខេត្តផងដែរ។
មានប្រសាសន៏នៅក្នុងកិច្ចប្រជុំ ឯកឧត្តម រិន វីរៈ មានប្រសាសន៏ថា ក្នុងអណាត្តិទី៥កន្លងទៅ កម្ពុជាសម្រេចបានកំណើនសេដ្ឋកិច្ចជាមធ្យម ៧% ដែលជាកំណើនដ៏ខ្ពស់ទី ៦ ក្នុងចំណោមប្រទេសមានកំណើនសេដ្ឋកិច្ចខ្ពស់ក្នុងតំបន់ ។ ដោយសាការបានរក្សាកំណើនសេដ្ឋកិច្ច រង្វង់ ៧.០%ជាប់ៗគ្នាច្រើនឆ្នាំ ធនាគារអភិវឌ្ឍន៌អាស៊ី (ADB) ក្នុងឆ្នាំ២០១៦ កន្លងមក បានវាយតម្លៃថាកម្ពុជានឹងក្លាយជាខ្លាអាស៊ីថ្មី។ ក្នុងនោះខេត្តកំពង់ចាមគឺជាខេត្តមួយ ដែលមានសត្តានុពលសម្រាប់វិស័យជាច្រើន ជាពិសេសវិស័យកសិកម្ម ឧស្សាហកម្ម សេវាកម្ម ដែលជាក្បាលម៉ាស៊ីនជំរុញកំណើនសេដ្ឋកិច្ចជាតិកម្ពុជា។
ឯកឧត្តម រិន វីរៈ បញ្ជាក់ថា លទ្ធផលថ្ងៃនេះបង្ហាញថាខេត្តកំពង់ចាម មានចំនួនប្រជាជនប្រមាណជាង ១លាន ១ សែននាក់ នាក់ទំហំសេដ្ឋកិច្ច ៧.០៧០.៨៦១ លានរៀលគិតជាដុល្លារ ១.៧៤៥ លានដុល្លារអាមេរិក ដែលទំហំសេដ្ឋកិច្ចស្មើនឹង ៧% នៃផលិតផលក្នុងស្រុកសរុប របស់ប្រទេសកម្ពុជា។ ក្នុងនោះសេដ្ឋកិច្ចមានកំណើន ៦,៥% និងចំណូលសម្រាប់ម្នាក់មាន ១.៥២១ ដុល្លារអាមេរិក នៅឆ្នាំ ២០១៨។ លទ្ធផលខាងលើនេះបង្ហាញខេត្តកំពង់ចាមមានចំណូលសម្រាប់ម្នាក់ប្រហែលងថ្នាក់ជាតិ ដែលមាន ១.៥៤៨ ដុល្លារអាមេរិក នៅឆ្នាំ ២០១៨។ សេដ្ឋកិច្ចខេត្តមានវិស័យបីសំខាន់ៗ ៖ កសិកម្មដែលមានសមាមាត្រ ធៀបនឹងផលិតផលក្នុងស្រុកខេត្ត ៣៩,១% ឧស្សាហកម្មមានសមាមាត្រ ១៧,៣% និងសេវាកម្មមាន ៤៣,៦% នេះបង្ហាញថា ខេត្តកំពង់ចាមមានសក្តានុពលកសិកម្ម និងឧស្សាហកម្ម សេវាកម្ម ដែលអាចជំរុញវិស័យវិស័យសេដ្ឋកិច្ចខេត្តកាន់ខ្លាំងថែមទៀត ។
ដោយ ជួន រតនាវង្ស
