ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម បានមានប្រសាសន៍ថា រដ្ឋបាលខេត្ត និងក្រសួងសាធារណការ និងដឹកជញ្ជូន បានឯកភាពគ្នារួចរាល់ ជាផែនការបឋម ត្រូវជួសជុលផ្លូវដែលខូចខាតក្នុងក្រុងកំពង់ចាមឡើងវិញ ដោយពិនិត្យមើលទៅលើស្ថានភាពផ្លូវ ប្រសិនបើផ្លូវកន្លែងណាខូចតិចតួច ត្រូវជួសជុលឲ្យស្អាតវិញ ប្រសិនបើផ្លូវកន្លែងដែលខូចខាត់ទាំងស្រុង ត្រូវធ្វើផ្លូវថ្មីវិញតែម្ដង ក្នុងរង្វង់ប្រវែងប្រមាណជាង១០គីឡូម៉ែត្រ ដោយជម្រុញធ្វើឲ្យលឿនរួចរាល់នៅចុងឆ្នាំ២០២៥នេះ ។
ឯកឧត្តមអភិបាលខេត្ត ថ្លែងបែបនេះ ក្នុងកិច្ចប្រជុំសាមញ្ញលើកទី១២ អាណត្តិទី៤ របស់ក្រុមប្រឹក្សាខេត្តកំពង់ចាម ក្រោមអធិបតីភាព ឯកឧត្តម ខ្លូត ផន ប្រធានក្រុមប្រឹក្សាខេត្ត នាព្រឹកថ្ងៃទី១៣ ខែឧសភា ឆ្នាំ២០២៥ នៅសាលប្រជុំសាលាខេត្តកំពង់ចាម។
ជាមួយគ្នានោះដែរ ឯកឧត្តម អ៊ុន ចាន់ដា ក៏បានបញ្ជាក់ថា គម្រោងសាងសង់ប្រព័ន្ធលូរំដោះទឹកកខ្វក់ និងប្រព័ន្ធលូរំដោះទឹកភ្លៀង ក្រុងកំពង់ចាម បច្ចុប្បន្នសម្រេចបានប្រមាណ៧៨% ហើយ ដូច្នេះសូមការយោគយល់ អធ្យាស្រ័យ ពីបងប្អូនប្រជាពលរដ្ឋ ដែលរស់នៅ និងប្រកបអាជីវកម្មក្នុងក្រុងកំពង់ចាម ចំពោះការសាងសង់ប្រព័ន្ធលូរំដោះទឹកកខ្វក់ និងប្រព័ន្ធលូរំដោះទឹកភ្លៀងក្រុងកំពង់ចាម ព្រោះជាធម្មតាការអភិវឌ្ឍ តែងតែមានផលប៉ះពាល់ដល់បងប្អូនប្រជាពលរដ្ឋ ក៏ដូចជាអ្នកធ្វើដំណើរឆ្លងកាត់ជាដើម ។ ដូច្នេះសូមបងប្អូនប្រជាពលរដ្ឋចូលរួមទាំងអស់គ្នាធ្វើយ៉ាងណា ដើម្បីពន្លឿនការងារមួយនេះ ឲ្យលឿនតាមការគ្រោងទុក ដើម្បីផ្តល់អត្ថប្រយោជន៍យ៉ាងច្រើនដល់ការរស់នៅ ក៏ដូចជាការប្រកបរបរប្រចាំថ្ងៃរបស់បងប្អូនប្រជាពលរដ្ឋនៅក្នុងក្រុងកំពង់ចាម ផងដែរ៕
