ផ្លូវដីគ្រួសប្រវែងជាង៤០០០ម៉ែត្រនឹងចាប់ផ្តើមដំណើរការដាក់អោយដេញថ្លៃ សាងសង់ជូនប្រជាពលរដ្ឋដើម្បីជួយកាត់បន្ថយការលំបាកដល់សិស្សានុសិស្សលោកតាលោកយាយងាយស្រួលក្នុងការធ្វើដំណើរ នេះបើតាមការឲ្យដឹងពីលោក ទី គឹមឆយ ជំទប់ទី១ ឃុំតាអុង ។
លោក ទី គឹមឆយមានប្រសាសន៍ថានៅឆ្នាំ២០១៩នេះថវិការវិនិយោគឃុំប្រមាណជាង១០០លានរៀលនឹងដាក់ឲ្យក្រុមហ៊ុនដេញថ្លៃធ្វើផ្លូវដីគ្រួសចំនួនពីរភូមិមានប្រវែងជាង ៤០០០ម៉ែត្រឆាប់ ៗខាងមុខនេះ ។លោកបន្តថាកាលពីឆ្នាំ២០១៨កន្លងទៅឃុំបានធ្វើការអភិវឌ្ឍន៏កសាងផ្លូវមួយខ្សែរជូនប្រជាពលរដ្ឋ រស់នៅក្នុងភូមិតាអុង មានប្រវែង ៩៧២ម៉ែត្រ ក្រោមគម្រោងប្រាក់វិនិយោគរបស់ថ្នាក់ឃុំផ្ទាល់។
លោកបញ្ជាក់បន្ថែមថា ផ្លូវដែលគ្រោងនឹងធ្វើជូនប្រជាពលរដ្ឋនេះ មានចំនួនពីរភូមិ ទី១គឺ ភូមិតាអុងតភ្ជាប់ពីផ្លូវជាតិលេខ៧១ មានប្រវែង១១០០ម៉ែត្រ ទី២ ភូមិចំរើនផល តភ្ជាប់ចាប់ពីវត្តទួលមាស ប្រវែង៣០០០ម៉ែត្រ។លោកបានអោយដឹងថាគម្រោងកសាងផ្លូវទាំងពីរខ្សែរនេះសមាជិកឃុំតាអុងបានធ្វើការអនុម័តរួចរាល់ហើយ នៅតែរង់ចាំក្រុមហ៊ុនធ្វើការដេញ ថ្លៃងរួចនឹងចាប់ផ្តើមធ្វើជូនប្រជាពលរដ្ឋ។
លោកទីគឹមឆយបានអោយដឹងទៀតថាផ្លូវទាំងពីរខ្សែរនេះពីមុនមកបានបង្កផលលំបាកជាច្រើនសម្រាប់សិស្សនុសិស្សលោកតាលោកយាយព្រមទាំងប្រជាពលរដ្ឋរស់នៅទូទាំងឃុំដោយសារស្ថានភាពផ្លូវនៅរដូវប្រាំងវាមានប្រឡុកច្រើននិងហ៊ុយហើយនៅរដូវវស្សាវិញវាស្អិតក៏ប៉ុន្តែមិនយូរនោះទេក្រោយពីក្រុមហ៊ុនចុះមកធ្វើ ប្រជាពលរដ្ឋទាំងអស់គ្នានឹងបាន ធ្វើដំណើរលើផ្លូវទាំងពីរខ្សែនេះដោយងាយស្រួល។
ដោយ ភ័ណ្ឌ ប៉ាង
