ដើម្បី ចូលរួមចំណែកសម្រាលនូវទុក្ខលំបាក របស់ប្រជាពលរដ្ឋ ថ្ងៃទី ០៧ ខែ កញ្ញា លោក ប៊ិន ឡាដា អភិបាលនៃគណ:អភិបាលស្រុកកំពង់សៀម បានដឹកនាំក្រុមការងារថ្នាក់ស្រុក យុវជន កងកម្លាំងទាំងបីអាជ្ញាធរ ឃុំ ភូមិ និងមានការនិមន្តចូលរួមពីព្រះគ្រូចៅអធិការវត្តកោះគល់ និងវត្តតាមាង សរុបចំនួន 79 អង្គ/នាក់ បាន ចុះជួយរុះរើផ្ទះប្រជាពលរដ្ឋ ១ខ្នង ឈ្មោះ អុល ផុន ផ្ទះមានទំហំ ៥មx៦ម ដែលរងគ្រោះដោយការបាក់ ច្រាំងទន្លេ ខណៈបច្ចុប្បន្ននេះ កម្ពស់ទឹកទន្លេមេគង្គ បានបន្តហក់ឡើងជាបន្តបន្ទាប់នោះ ស្ថិតនៅភូមិកោះគល់ ឃុំកោះរកា ។
ក្នុងឱកាសនោះដែរ ឯកឧត្តម អ៊ុង សំអាត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាអនុប្រធានក្រុមការងារចុះជួយស្រុកកំពង់សៀម បានពាំនាំ នូវការសាកសួរសុខទុក្ខដល់បងប្អូនប្រជាពលរដ្ឋ ដែលរងគ្រោះទឹកជំនន់ និងការបាក់ច្រាំងទន្លេ ពីសំណាក់ ឯកឧត្តម វេង សាខុន ប្រធានក្រុមការងារថ្នាក់កណ្ដាល ចុះជួយស្រុកកំពង់សៀម និងជារដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ចាម បានអំពាវនាវដល់ប្រជាពលរដ្ឋរស់នៅតាមបណ្ដោយដងទន្លេមេគង្គ តោងប្រុងប្រយ័ត្នជានិច្ច ក្រៅពីនោះ ប្រសិនបើ បងប្អូនប្រជាពលរដ្ឋយើងមានតម្រូវការកងកម្លាំង ដើម្បី ចុះមកជួយអន្តរាគមន៍ រុះរើលំនៅដ្ឋាន សូមរាយការណ៍មកអាជ្ញាធរមូលដ្ឋាន ជាបន្ទាន់ ។
ក្នុងនោះ ឯកឧត្តម បានឧបត្ថម្ភ ថវិកា ២.៤០០.០០០រៀល ជូនដល់ប្រជាពលរដ្ឋ ចំនួន១២គ្រួសារ ក្នុង ០១គ្រួសារទទួលបានថវិកា ២០០,០០០រៀល និង ប្រគេនបច្ច័យ ព្រះចៅអធិការវត្តកោះគល់ ចំនួន២០០ដុល្លារ សម្រាប់ទិញម៉ាស៊ីនដាក់ទូក, ជាមួយគ្នានោះដែរ លោក លី ប៉េងស៊ាង បានឧបត្ថម្ភថវិកា ចំនួន ១០០ដុល្លារ សម្រាប់ចំណាយផ្សេងៗ និងមានចូលរួមពីព្រះគ្រូចៅអធិការវត្ត មួយចំនួន នូវគ្រឿងឧបភោគបរិភោគ និងបច្ច័យ រួមមាន៖ ព្រះចៅអធិការវត្តកោះរកាក្រៅចំនួន ៣០០.០០០រៀល អង្ក និងគ្រឿងឧបភោគ បរិភោគ ។ ព្រះចៅអធិការវត្តអូឈ្លើង ១០០.០០០រៀល អង្ក គ្រឿងបរិភោគ។ ព្រះចៅអធិការវត្តតាមាង ១០០.០០០រៀល អង្ក ២បេ និងគ្រឿងបរិភោគ។
បន្ទាប់មក លោក ប៊ិន ឡាដា និងក្រុមការងារ បានអមដំណើ ឯកឧត្តម ចុះពិនិត្យមើលស្ថានភាពបាក់ច្រាំងទន្លេ ចំនួន ០៦ឃុំក្នុងស្រុកកំពង់សៀម ។
ជា គឹមហុង
