បើតាមការឲ្យដឹងពីលោកស្រី ហ៊ូ ចាន់ថា បុគ្គលិកនៅមណ្ឌលសុខភាពសង្កាត់សំបួរមាស បានប្រាប់នៅក្នុងកម្មវិធីយើងធ្វើបាននៅថ្ងៃទី០៤ ខែកញ្ញា ថាស្រតីដែលរងគ្រោះដោយអំពើហិង្សាក្នុងគ្រួសារអាចមកទទួលសេវាព្យាបាលនៅមណ្ឌលសុខភាពគឺមិនគិតថ្លៃសេវានោះទេ។
លោកស្រី ហ៊ូ ចាន់ថាបានអោយដឹងថា កាលពីឆ្នាំ២០១៨ កន្លងទៅក៏ធ្លាប់មានស្ត្រីរងគ្រោះដោយអំពើហិង្សាក្នុងគ្រួសារមកទទួលសេវាព្យាបាលបែបវេជ្ជសាស្ត្រពីមណ្ឌលសង្កាត់សំបួរមាសចំនួន១ករណី ដោយសារប្ដីវាយបែកក្បាល។
លោកស្រីបន្តឲ្យដឹងទៀតថា ស្ត្រីរងគ្រោះដោយអំពើហិង្សាក្នុងគ្រួសារត្រូវបានទទួលសេវាពីមណ្ឌលសុខភាពដោយឥតគិតថ្លៃរហូតដល់ជាសះស្បើយ ហើយក្រុមគ្រូពេទ្យផ្ដល់ប្រឹក្សាយោបល់ និងលើកទឹកចិត្តដល់ស្ត្រីរងគ្រោះថែមទៀត។ លោកស្រីបញ្ជាក់ថា នៅពេលស្ត្រីមកទទួលសេវា មណ្ឌលសុខភាពនឹងរក្សាការសំងាត់ជូន។
លោកស្រី ហ៊ូ ចាន់ថា ឲ្យដឹងទៀតថា ដើម្បីឲ្យការផ្ដល់សេវាព្យាបាល ដល់ស្ត្រីរងគ្រោះដោយអំពើហិង្សាក្នុងគ្រួសារកាន់តែមានប្រសិទ្ធភាព មណ្ឌលសុខភាព នឹងធ្វើការកិច្ចសហការជាមួយកិច្ចការនារីឃុំ ឬ សង្កាត់ អាជ្ងាធរមានសមត្ថកិច្ចឲ្យខ្លាំងបន្ថែមទៀតជាពិសេសស្ត្រីរងគ្រោះត្រូវមានការសហការជាមួយផងដែរ។
សុខ សីលា
