អត្ថបទ៖ ហ៊ាង ថាច
ដើម្បីជាការឆ្លើយតបទៅនឹងសំណូមពរ និងបំពេញសេចក្តីត្រូវការប្រជាពលរដ្ឋ និងការ គ្រប់គ្រងការប្រើប្រាស់ទឹក និងទាញយកទឹកទៅស្រោចស្រពស្រែប្រាំងលើកទី១ បានទាំង អស់គ្នា ទាំងផ្នែកខាងលើ និងផ្នែកខាងក្រោមឯកឧត្តម អ៊ុន ចាន់ដាអភិបាលនៃគណៈអភិបាល ខេត្តកំពង់ចាមនៅក្នុងរយះពេលពេញមួយថ្ងៃ គឺថ្ងៃទី១៩កុម្ភៈឆ្នាំ២០២១គឺបានដឹកនាំមន្ត្រី ជំនាញដើម្បីចុះទៅពិនិត្យស្ថានភាពការបង្ករបង្កើនផល និងការប្រើប្រាស់ទឹករបស់ប្រជា កសិករ ស្ថិតនៅចំណុចនៅតំបន់ បឹងជ្រោយ តំបន់ភូមិស្ទឹងឆ្វេង ចំណុចខ្លាក្រទាម ចំណុច ក្រពើប្រជុល និងនៅចំណុច អន្លុងជ្រៃ ស្ថិតនៅក្នុងឃុំចំនួន៥ នៃស្រុកកងមាស ស្រុកជើងព្រៃ និងស្រុកបាធាយ ខេត្តកំពង់ចាម។
នៅក្នុងដំណើរចុះពិនិត្យស្ថានភាពការបង្ករបង្កើនផល ប្រមូល ផលស្រូវ និងដោះស្រាយេបញ្ហានានាជូនប្រជាពលរដ្ឋនៅក្នុងឃុំចំនួន៥នៃស្រុកបាធាយ ស្រុកកងមាស និងស្រុកជើងព្រៃ ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ក៏បានណែនាំដល់មន្ទីរកសិកម្មខេត្ត មន្ទីរធនធានទឹក រួមទាំងអាជ្ញាធរស្រុកពាក់ព័ន្ធទាំងអស់ ត្រូវសហការគ្នា បង្កើតក្រុមការងាគណៈកម្មការតាមដាន ចំពោះការបើកទឹកបង្ហូរពីលើមកផ្នែក ខាងក្រោមនៃទឹកបឹង ព្រែក ដើម្បីឲ្យទឹកស្រកចុះ និងមានផ្ទៃដីសម្រាប់ធ្វើការបង្ករបង្កើនផលស្រូវលើកទី១។
បើតាមលោក អ៊ុម វិបុល ប្រធានមន្ទីរធនធានទឹក និងឧតុនិយម ខេត្តកំពង់ចាម បានបញ្ជាក់ថាស្ថានភាពបង្ហូរទឹកគឺមាន៤កន្លែងដែលត្រូវបានធ្វើការកាយ និងបើកមុខទឹក ហើយនៅក្នុងរយៈពេលប្រមាណ៥ថ្ងៃទៅមុខទៀត គឺទឹកអាចស្រក ក្នុងកម្រិតកម្ពស់ប្រមាណ១ម៉ែត្រ គឺពេលនោះកសិករដែលមានផ្ទៃដីស្រែប្រាំងនៅផ្នែកខាង លើគឺអាចធ្វើការបង្ករបង្កើនផលបានដូចគ្នា។
បន្ទាប់ពីធ្វើការចុះដោះស្រាយ និងឆ្លើយតបបន្ទាន់ទៅនឹងសេចក្តីត្រូវការជាមួយបងប្អូនប្រជាកសិករក្នុងឃុំចំនួន៥នៃស្រុកចំនួន៣ពីសំណាក់ឯកឧត្តមអភិបាលខេត្តកំពង់ចាម គឺបងប្អូនប្រជាពលរដ្ឋមានការស្រុះស្រួលគ្នាព្រមទទួលយកនូវគោលការណ៍ឈ្នះឈ្នះទាំងអស់គ្នា ទន្ទឹមនោះដែរឯកឧត្តម អ៊ុន ចាន់ដា អភិបាលនៃគណៈអភិបាលខេត្ត កំពង់ចាមក៏បាន សំណូមពរដល់ កសិករទាំងអស់គ្នាចេះយោគយល់គ្នា ជៀសវាងការបង្ករទំនាស់ដាក់គ្នា និងប្រើអំពើហិង្សាណាមួយក្នុង នាមជាខ្មែរតែមួយ និងរស់ក្រោមដំបូលសន្តិភាពជាមួយគ្នា។