នួន សត្យា
(កំពង់ចាម)៖ អាជ្ញាធរខេត្តកំពង់ចាម កំពុងមមាញឹកក្នុងការរៀបចំផែនការគ្រប់គ្រងស្ថានភាព ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ខណៈពេលខេត្តមួយនេះ បានរកឃើញអវិជ្ជមានកូវីត-១៩ កើនឡើងជាបន្តបន្ទាប់ ។
ក្នុងកិច្ចប្រជុំបូកសរុបការងាររបស់គណៈកម្មការខេត្ត ប្រយុទ្ធប្រឆាំងជំងឺកូវីដ-១៩ នៅថ្ងៃទី ២១ ខែឧសភាឆ្នាំ ២០២១នេះ អភិបាលខេត្តកំពង់ចាម ឯកឧត្តម អ៊ុន ចាន់ដា បានមានប្រសាសន៍ថា អាជ្ញាធរខេត្តនៅគ្រប់គ្រងស្ថានភាពបាន ទោះបីជាការឆ្លងរាលដាលជំងឺកូវីដ-១៩ កំពុងតែមានការកើនឡើង ជាបន្តបន្ទាប់ក៏ដោយ ។
ឯកឧត្តម អភិបាលខេត្ត បានមានប្រសាសន៍ថា មកដល់ពេលនេះ ស្ថានភាពអ្នកជំងឺកូវីដ-១៩ មានការកើនឡើងជាបន្តបន្ទាប់។ ហើយអ្វីដែលជាការរំពឹងទុកនោះ ជំងឺកូវីដ-១៩ នេះ អាចនៅមានឆ្លងរាលដាលបន្តទៀត ចេញពីរោងចក្រមួយទៅរោងចក្រមួយទៀត អាចពាក់ព័ន្ធនៅគ្រប់រោងចក្រ ក្នុងខេត្តកំពង់ចាមតែម្ដង ដែលមានចំនួន ១៧ រោងចក្រ ដែលមានកម្មករ-កម្មការិនីសរុបប្រមាណជា ៤ ម៉ឺននាក់ ពោល ប្រសិនបើមានការឆ្លងរាលដាលត្រឹម ១០% នៃចំនួននោះ ក៏អាចមានកម្មករ-កម្មការិនី ចំនួន ៤ពាន់នាក់ដែរ ដែលឆ្លងជំងឺកូវីដ-១៩ ។
ឯកឧត្តម អភិបាលខេត្ត បានឲ្យដឹងទៀតថា បច្ចុប្បន្នមន្ទីរពេទ្យមេគង្គកំពង់ចាម អាចដាក់ព្យាបាលអ្នកជំងឺកូវីដ-១៩ មិនទាន់ពេញនៅឡើយទេ ប៉ុន្តែប្រសិនបើ នៅមន្ទីរពេទ្យមេគង្គកំពង់ចាម ដាក់ពេញហើយនោះ អ្នកជំងឺកូវីដ-១៩ នឹងត្រូវរំលែកដាក់ព្យាបាលនៅមន្ទីរពេទ្យបង្អែកខេត្តកំពង់ចាម ។
ឯកឧត្តម អភិបាលខេត្តបានថ្លែងបន្តថា អាជ្ញាធរខេត្ត ក៏បានរៀបចំត្រៀមគ្រូពេទ្យគ្រប់ចំនួន ក្នុងនោះមានក្រុមគ្រូពេទ្យសម្រាប់ចាក់វ៉ាក់សាំង , មានក្រុមគ្រូពេទ្យស្ម័គ្រចិត្តរបស់ ឯកឧត្តម ហ៊ុន ណេង អ្នកតំណាងរាស្ត្រមណ្ឌលខេត្តកំពង់ចាម , និងក្រុមគ្រូពេទ្យស្ម័គ្រចិត្តរបស់ ឯកឧត្តម ខៀវ កញ្ញារិទ្ធ ក៏បានត្រៀមលក្ខណៈគ្រប់គ្រាន់ ដើម្បីជួយអន្តរាគមន៍ នៅពេលដែលមានតម្រូវការចាំបាច់ផងដែរ។ទន្ទឹមនឹងនេះដែរ អាជ្ញាធរខេត្តមានសម្ភារៈ បរិក្ខាពេទ្យគ្រប់គ្រាន់ សម្រាប់ប្រើប្រាស់ ដោយមានភាពម្ចាស់ការ។
ឯកឧត្តម អភិបាលខេត្តបានបញ្ជាក់ថា កិច្ចការបន្តអាជ្ញាធរខេត្ត បានរៀបចំយុទ្ធសាស្ត្រ គ្រប់គ្រងស្ថានភាពកុំឲ្យជំងឺកូវីដ-១៩ នេះ ឆ្លងរាលដាលក្នុងទ្រង់ទ្រាយធំ ដោយប្រើប្រាស់វិធានការគ្រប់បែបយ៉ាង ដើម្បីរងចាំវ៉ាក់សាំងមកដល់ ។
គូររំលឹកផងដែរថា គិតត្រឹមថ្ងៃទី ២០ ខែឧសភាឆ្នាំ ២០២១ ខេត្តកំពង់ចាម បានរកឃើញវិជ្ជមានកូវីដ-១៩ ចំនួនសរុប ៤០០នាក់ ។ ក្នុងនោះ ចំនួន ៩៣នាក់រកឃើញក្នុងរយៈពេលតែមួយថ្ងៃ គឺថ្ងៃទី ២០ ខែឧសភា ឆ្នាំ ២០២១នោះតែម្តង។