មន្ទីរកសិកម្មខេត្តកំពង់ចាមជំរុញឲ្យកសិករជ្រើស រើសមុខរបបចិញ្ចឹមជ្រូក ដើម្បីបង្កើនប្រាក់ចំណូលក្នុងគ្រួសារ

អត្ថបទដោយ៖ លោកស្រី ពុធ ធាវី និង លោកស្រី ពាង សុមាន

​ការចិញ្ចឹមជ្រូកកំពុងតែ​ផ្តល់​​ឲ្យកសិករនូវប្រាក់ចំណូលច្រើន ខណៈជ្រូករស់ និងសាច់​ជ្រូកកំពុងមានទីផ្សារតម្លៃសមរម្យ ដូចច្នេះ មន្ទីរកសិកម្មខេត្ត​កំពង់ចាម សូមជំរុញឲ្យកសិករ ជ្រើស រើសមុខរបបចិញ្ចឹមជ្រូក ដើម្បីបង្កើនប្រាក់ចំណូលក្នុងគ្រួសារ និងការផ្គត់ផ្គង់ទីផ្សារ​ក្នុង​ស្រុកផងដែរ។នេះបើតាមការឲ្យដឹងពី​លោក អាន ស៊ិនទ្បុង ប្រធានផ្នែកសុខ ភាពសត្វ នៃមន្ទីរកសិកម្ម រុក្ខាប្រម៉ាញ់ និងនេសាទខេត្ត កំពង់ចាម។

លោក អាន ស៊ិនទ្បុង មានប្រសាសន៍ប្រាប់វិទ្យុជាតិ ភ្នំប្រុសភ្នំស្រី ៩២.៥០ នៃមន្ទីរព័ត៌មានខេត្តកំពង់ចាមក្នុងកម្មវិធីសន្ទនាមតិថា ជាក់​ស្តែងនៅក្នុងឆ្នាំ២០២០នេះ សាច់ជ្រូកមានតម្លៃខ្ពស់​នៅលើទី​ផ្សារ បើប្រៀបធៀបទីនឹងឆ្នាំ២០១៧-២០១៨កន្លងទៅ​ដែលមាន​តម្លៃ​ទាប ធ្វើអោយអ្នកចិញ្ចឹមជ្រូកភាគច្រើនមានការបោះបង់​មុខ​របរនេះ ហើយរហូតមកដល់ពេលនេះមានអ្នកខ្លះមិន​ទាន់ងាកមក​ចាប់យកមុខរបរចិញ្ចឹមសត្វជ្រូកនេះវិញទេ ប្រធានផ្នែក​​​​​សុខភាព​​​​​សត្វ​​រូប​​នេះ​​បន្តថា ក្នុងឆ្នាំ២០២០នេះ មន្ទីរកសិកម្មបានចុះពន្យល់​ណែនាំបងប្អូនប្រជាពលរដ្ឋនៅតាមមូលដ្ឋាន កុំឲ្យបោះបង់ការ​ចិញ្ចឹម​សត្វជ្រូកនិងសត្វមាន់ ទា ជាដើម ដោយសារតែឆ្នាំនេះ​សាច់​​សត្វទាំងអស់នោះងាយស្រួលរកទីផ្សារ និងមានតម្លៃខ្ពស់​នៅលើទីផ្សារ ហើយជាតម្រូវការរបស់​ប្រជាពលរដ្ឋទូទៅក្នុង​ការជីវិត។

លោក រ័តុ្ន រិទ្ធី ជាម្ចាស់កសិដ្ឋានចិញ្ចឹមជ្រូកនៅ​ក្នុងស្រុក​កំពង់​សៀម​​​​​​បានឲ្តដឹងផងដែរថា កន្លងមកលោកក៏ធ្លាប់ទទួល​បរា​ជ័យក្នុងការចិញ្ចឹមជ្រូកនេះផងដែរ ប៉ុន្តែលោកមិនបានបោះបង់​ចោលមុខរបរនេះទេ ព្រោះលោកតែងតែសហការណ៍​ជាមួយ​មន្រ្តី​ជំនាញមន្ទីរកសិកម្ម ក្នុងកាថែទាំសុខភាពសត្វ និងបច្ចេកទេស​ក្នុង​​ការចិញ្ចឹមពីមន្ទីរកសិកម្ម ទើបគាត់ទទួលបានជោគជ័យ​រហូត​ដល់សព្វថ្ងៃនេះ។

លោក អាន ស៊ិនទ្បុង បានបញ្ជាក់ថា ដោយសារតែមានចំណាត់​ការរបស់រាជរដ្ឋាភិបាលអោយកាត់បន្ថយការនាំចូលសាច់ជ្រូក មាន់ ទា ពីខាងក្រៅស្រុក ដើម្បីទុកឳកាសឲ្យប្រជាពលរដ្ឋយើង​ចាប់យកមុខរបរនេះ។

ហើយមន្ទីរកសិកម្មនៅតែបន្តជួយផ្តល់នូវចំណេះជំនាញបច្ចេកទេសក្នុងការចិញ្ចឹមនិងថែទាំសុខភាពសត្វទៅដល់បងប្អូន ដែលមាន​បំណងចង់ប្រកបមុខរបរចិញ្ចឹមសត្វឲ្យទទួលបានជោគជ័យ ដើម្បី​លើកស្ទួយជីវភាពគ្រួសារ នៅក្នុងអំទ្បុងពេលដែលប្រឈម​ជំងឺ​កូវិដ-១៩នេះផងដែរ៕