អត្ថបទដោយ៖ អឿន ស្រួ
មន្ទីរឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ខេត្តកំពង់ចាម ជាអង្គភាពជំនាញ នឹងចាប់អនុវត្តត្រួតពិនិត្យការផ្ទៀងផ្ទាត់លើកដំបូង និងក្នុងពេលប្រើប្រាស់សម្រាប់ឆ្នាំ២០២១ ចាប់ពីថ្ងៃទី១ ខែមីនា ឆ្នាំ២០២១ នេះតទៅ តាមបណ្តាស្ថានីយ៍ /អនុស្ថានីយ៍ (ដេប៉ូ) ប្រេងឥន្ទនៈ ដើម្បីបញ្ជាក់ពីសុក្រឹតភាពផ្នែករង្វាស់រង្វាល់នៃឧបករណ៍បែងចែកវត្ថុរាវ(ប្រេងឥន្ទនៈ) ជាដៃបាញ់ប្រេង ឬដៃរវៃបូមប្រេង សំដៅធានាផលប្រយោជន៍ទាំងម្ចាស់ និងប្រជាពលរដ្ឋជាអ្នកទទួលទិញប្រេងឥន្ទនៈទាំងអស់។ នេះបើតាមការឲ្យដឹងពីលោក ហេង បូ ប្រធានការិយាល័យស្តង់ដារ និងមាត្រាសាស្រ្តនៃមន្ទីរឧស្សាហកម្ម វិទ្យាសាស្រ្តបច្ចេកវិទ្យា និងនវានុវត្តន៍ខេត្តកំពង់ចាម ប្រាប់វិទ្យុជាតិភ្នំប្រុសភ្នំស្រី នាថ្ងៃទី២៥ ខែមីនា ឆ្នាំ២០២១។
លោក ហេង បូ មានប្រសាសន៍ថា ចំពោះឧបករណ៍បែងចែកប្រេងឥន្ទនៈ ជាដៃបាញ់ប្រេង ឬដៃរវៃបូមប្រេង ទាំងឡាយណាដែលមិនមានការត្រួតពិនិត្យផ្ទៀងផ្ទាត់ ដាក់សញ្ញាត្រួតពីនិត្យត្រឹមត្រូវ និងលិខិត្អនុញ្ញាតប្រើប្រាស់ទេ រដ្ឋបាលខេត្តកំពង់ចាមនឹងចាត់វិធានការចំពោះម្ចាស់ស្ថានីយ៍ /អនុស្ថានីយ៍ (ដេប៉ូ) ប្រេងឥន្ទនៈនោះ ស្របតាមច្បាប់ស្តីពីមាត្រាសាស្រ្តកម្ពុជា ដោយសាហការជាមួយមជ្ឈមណ្ឌលមាត្រាសាស្រ្តជាតិ នៃក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដើម្បីព្រមាន ពិន័យអន្តរកាណ៍ជាប្រាក់ និង/ឬរៀបចំសំណុំរឿងបញ្ជូនទៅតុលាការមានសមត្ថកិច្ច។
លោក ហេង បូ បញ្ជាក់ថា ក្នុងខេត្តកំពអ់ចាម មានស្ថានីយ៍ អនុស្ថានីយ៍ (ដេប៉ូ) ប្រេងឥន្ទនៈចំនួន ២៨៥កន្លែង ដែលមានទូប្រេង ៥៦៦ទូ និងដៃប្រេងចំនួន ១៥៣៤ដៃ។ លោកក៏អំពាវនាវដល់ម្ចាស់ស្ថានីយ៍ /អនុស្ថានីយ៍ (ដេប៉ូ) ប្រេងឥន្ទនៈទាំងអស់សហការអនុត្តកិច្ចការត្រួតពិនិត្យផ្ទៀងផ្ទាត់ឲ្យមានប្រសិទ្ធភាពខ្ពស់ និងស្របតាមច្បាប់ដែលបានកំណត់៕
