ផ្លូវបេតុងប្រវែង៦៥៤ម៉ែត្រ ក្នុងឃុំអំពិល ស្ថាបនា ជូនប្រជាពលរដ្ឋរួចរួលហើយ

អត្ថបទដោយ៖ ភ័ណ្ឌ ប៉ាង

ផ្លូវរងការខូចខាតប្រវែង៦៥៤ម៉ែត្រ ឆ្លងកាត់ភូមិចំនួន២ ត្រូវបាន​អាជ្ញាធរឃុំស្ថាបនាជាផ្លូវបេតុងឡើងវិញ ដែលកន្លងមក ប្រជាពល​​រដ្ឋ​​​ទាំងពីរភូមិនេះ តែងតែលើកឡើងពី ការលំបាកធ្វើ​ដំណើរឆ្លងកាត់ នេះបើតាមការឲ្យដឹងពី លោក មេឃុំអំពិល នៅថ្ញៃ​ទី២៣ ខែវិច្ចកាឆ្នាំ២០២០នេះ។

​​លោក រ័ត្ន គឹមហៃ មេឃុំអំពិល ស្រុកកំពង់សៀមបាន មាន​ប្រសាសន៍ថា គម្រោងអភិវឌ្ឍក្នុងឆ្នាំ២០២០នេះ អាជ្ញាធរឃុំបាន​អនុម័តយល់ព្រម ធ្វើផ្លូវបេតុងមួយខ្សែ មានប្រវែង ៦៥៤ម៉ែត្រ ឆ្លង​កាត់ ចំនួនពីរភូមិ គឺភូមិវាលស្បូវមានប្រវែង ៥០៤ម៉ែត្រ និងភូមិ​អណ្តូង​ច្រុះ មានប្រវែង១៥០ម៉េត្រ ក្នុងការស្ថាបនាផ្លូវបេតុង ប្រើប្រាស់កញ្ចប់ថវិកា ប្រមាណជាង២៥០លានរៀល។

លោកបន្ថែមថា ផ្លូវបេតុងប្រវែង ៦៥៤ម៉ែត្រ ធ្វើរួចរួល កាលពី​ថ្ញៃ​ទី​១២ ខែវិច្ចកា ឆ្នាំ២០២០នេះ បន្ទាប់ពីស្ថាបនារួច ប្រជាពលរដ្ឋ​ម្នាក់ៗ ក្នុងអារម្មណ៍បានសម្តែងការសប្បាយចិត្ត រីករាយ និង​អបសារទរ ចំពោះអាជ្ញាធរដែលបានដោះស្រាយ​បញ្ហា​លំបាក​ជូន​ប្រជាពលរដ្ឋ។លោកបញ្ជាក់ថា មូលហេតុ ដែលក្រុម​ប្រឹក្សាឃុំ​សម្រេចធ្វើការអភិវឌ្ឍទាំងពីរភូមិនេះ ដោយសារ ស្ថានភាព​ផ្លូវរង​ការខូច ខាតជាច្រើនកន្លែង ធ្វើឲ្យប្រជាពលរដ្ឋ ពិបាកធ្វើដំណើរ​ឆ្លងកាត់ពី ភូមិទៅភូមិមួយទៀត យ៉ាងទៀត ធ្វើឲ្យប្រលាក់ខោ អាវសិស្សានុសិស្សដែលធ្វើដំណើរសាលារៀនរាល់ម្តង។

ផែនការអភិវឌ្ឍឆ្នាំ២០២១ ខាងមុខអាជ្ញាធរឃុំ​អំពិលមានគម្រោង​ចំនួនពីរ គឺទី១ ធ្វើផ្លូវបេតុងអរន្តឃុំ រវាងឃុំអំពិល ជាមួយឃុំរអាង បូករួមទាំងស្រុក និងគម្រោងទី២ ធ្វើផ្លូវបេតុងជាបន្តទៅទៀត ក្នុងភូមិជើងគោក មានប្រវែង១០០០ម៉ែត្រ។