នៅថ្ងៃទី០២ ខែវិច្ឆិកា ឆ្នាំ២០២២ នេះ ឯកឧត្តម ឡោ ចាន់លី អភិបាលរង នៃគណៈអភិបាលខេត្ត និងជាតំណាងដ៏ខ្ពង់ខ្ពស់ ឯកឧត្ដម អ៊ុន ចាន់ដា អភិបាល នៃគណៈអភិបាល ខេត្តកំពង់ចាម បានអញ្ជើញជាអធិបតីភាពក្នុងពិធីប្រកាសតែងតាំងអភិបាលរង នៃគណៈអភិបាលស្រុកព្រៃឈរ ដោយមានការអញ្ជើញចូលរពី លោក ខេង ម៉េងឈុន អភិបាល ស្រុកព្រៃឈរ លោកប្រធានក្រុមប្រឹក្សាស្រុក លោក លោកស្រី អភិបាលរង ស្រុក លោកមេបញ្ជាការកម្លាំងទាំង ៣ លោក លោកស្រី ប្រធានក្រុមប្រឹក្សាឃុំ នាយកប៉ុស្តិ៍រដ្ឋបាលឃុំ ស្មៀនឃុំ លោកនាយកសាលា លោក លោកស្រី ប្រធានការិយាល័យ ចំណុះរដ្ឋបាលសាលាស្រុកស្រុកព្រៃឈរ ជាច្រើននាក់ ផងដែរ ។
លោកជា សិលា នាយករងរដ្ឋបាលសាលាខេត្ត បានអានប្រកាសរបស់រាជរដ្ឋាភិបាលក្រសួងមហាផ្ទៃ លេខ ៥៦៦៥ ប្រក ដែលប្រកាសអភិបាលរងស្រុក ចំនួន ០២រូប គឺ៖ ទី១.លោក អ៊ឹម សំអាត ឋានន្តរស័ក្តិនាយក្រមការ ថ្នាក់លេខ៥ ជាអភិបាលរងស្រុក ។ ទី២.លោក កយ ចន្ធី ឋានន្តរស័ក្តិគ្រូបង្រៀនកម្រិតមូលដ្ឋានដើមខ្សែពិសេស ថ្នាក់លេខ៦ ជាអភិបាលរងស្រុកព្រៃឈរ ។
ឯកឧត្តម ឡោ ចាន់លី អភិបាលរង ខេត្តកំពង់ចាម បានកោតសរសើ ចំពោះ វឌ្ឍនភាព នៃការរីកចម្រើនក្នុងស្រុក ដែលរដ្ឋបាលស្រុក ដែលបានខំប្រឹងប្រែងកសាង និងអភិវឌ្ឍ មូលដ្ឋាន ធ្វើឲសម្រេចបានលទ្ធផល នាពេលកន្លងមក ។ ឯកឧត្តម ក៏បានវាយតម្លៃខ្ពស់ ចំពោះ ការខិតខំប្រឹងប្រែងយកចិត្តទុកដាក់ខ្ពស់ គោរពអនុវត្តតាមគោលការណ៍ដឹកនាំចង្អុលបង្ហាញ និងរាល់ការផ្តល់នូវអនុសាសន៍ របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា សម្តេចក្រឡាហោម ឧបនាយករដ្ឋមន្ត្រី ឯ.ឧ អភិបាលបាលខេត្តកំពង់ចាម ប្រកបដោយប្រសិទ្ធភាព និងគណនេយ្យភាព ក្នុងការបំពេញភារកិច្ច នៅរដ្ឋបាលថ្នាក់ក្រោមជាតិ ផងដែរ ។
ឯកឧត្តមអភិបាលរង ក៏បានណែនាំផ្តាំផ្ញើ ដល់គណៈអភិបាលស្រុក និងមន្ត្រីរាជការទាំងអស់ ក្នុងស្រុក ត្រូវរួមគ្នាពង្រឹងការងារផ្តល់សេវា ជូនប្រជាពលរដ្ឋ ឱ្យបានល្អប្រសើរ ប្រកបដោយគុណភាព ប្រសិទ្ធភាព និងស្នាមញញឹម អនុវត្តឱ្យបាននូវគោលនយោបាយយុទ្ធសាស្ត្រ របស់រាជរដ្ឋាភិបាលកម្ពុជា ត្រូវរួមគ្នារក្សាស្ថេរភាពប្រទេសជាតិ ក្នុងគោលដៅជំរុញកំណើនសេដ្ឋកិច្ច ដោយអនុវត្តវិធានការច្បាប់ ចំពោះ ជនទាំងឡាយណា ដែលបង្កអស្ថេរភាពសង្គម ប៉ះពាល់ដល់សន្តិសុខជាតិ ។ ឯកឧត្តម ក៏បានក្រើនរំឮកបន្ថែមដល់អាជ្ញាធរស្រុក ឃុំ ត្រូវពង្រឹងការគ្រប់គ្រងបញ្ហាគ្រឿងញៀន ទាំងវិធានការអប់រំ វិធានការរដ្ឋបាល និងវិធានការត្រួតពិនិត្យ ត្រូវអនុវត្តឱ្យបានជាប់ជាប្រចាំ និងជំរុញការអនុវត្តគោលនយោបាយ កំណែទម្រង់ ដែលរដ្ឋាភិបាល ដាក់ចេញឲ្យមានប្រសិទ្ធភា ផងដែរ ៕
