ដោយ៖ លោក ធឹម សារ៉ន
ក្រោយមានសារាចរណែនាំ ក្រសួងធនធានទឹក និងឧតុនិយមស្តីពីការរក្សាទឹកទុកប្រើប្រាស់ អាជ្ញាធរខេត្តបានបែងចែកភារកិច្ចជាបន្ទាន់ ដល់ថ្នាក់ដឹកនាំមន្ត្រីជំនាញនិងអាជ្ញាធរ ឲ្យចុះតាមគោលដៅ ដើម្បីផ្សព្វផ្សាយដល់ប្រជាពលរដ្ឋនៅមូលដ្ឋានជាពិសេសតំបន់ប្រឈមទៅនឹងការខ្វះទឹកប្រើប្រាស់ នេះបើតាមការអោយដឹងពីលោក ឡោ ភារម្យ ប្រធានការិយាល័យទឹកស្អាតនៃមន្ទីរធនធានទឹក និងឧតុនិយម ខេត្តកំពង់ចាម។
លោកឡោភារម្យមានប្រសាសន៏បែបនេះនៅក្នុងខណៈដែលលោកចូលជាវាគ្មិនក្នុងកម្មវិធីវិទ្យុជាតីភ្នំប្រុសភ្នំស្រីដែលពិភាក្សាលើប្រធានបទ« ការក្សាទឹកទុកសម្រាប់ប្រើប្រាស់នៅរដូវប្រាំង»។ លោកថាយោងតាមការព្យាករ ក៏ដូចជាស្ថានភាពជាក់ស្ដែង បានបង្ហាញយ៉ាងច្បាស់ថា ក្នុងឆ្នាំ២០១៩ ប្រទេសកម្ពុជា ក៏ដូចជាបណ្ដាប្រទេសក្នុងតំបន់ បានទទួលរងឥទ្ធិពលយ៉ាងធ្ងន់ធ្ងរពីបាតុភូត អែល នីណូ ( El Nino ) ដោយបានបង្កឲ្យមានកត្តាអវិជ្ជមានជាច្រើនដូចជា ធាតុអាកាសមានសភាពក្តៅហួតហែងខ្លាំង រដូវវស្សាមកដល់មានសភាពយឺតយ៉ាវ របាយទឹកភ្លៀង មានភាពរអាក់រអួលមិនស្មើគ្នារបបទឹកទន្លេមេគង្គមានការប្រែប្រួលខ្លាំង ពិសេសជំនន់មានតែមួយលើក ហើបន្ទាប់មកក៏បានស្រកចុះជាបន្តបន្ទាប់ដល់កម្រិតទាបបំផុតមួយដែលមិនធ្លាប់ជួបប្រទះក្នុងរយៈកាលកន្លងមក។
លោកបានអោយដឹងទៀតថាការងារបង្កបង្កើនផលស្រូវប្រាំងក្នុងឆ្នាំ២០១៩-២០២០ គឺអាចធ្វើបានតែ១ដងប៉ុណ្ណោះ ដោយមិនអាចធ្វើស្រូវប្រាំងលើកទី២ បានទេ បើទោះបីជាទឹក នៅតាមបណ្តាអាងដែលបានរក្សាទុក និងកន្លែងមួយចំនួនដែលមានទឹកជាធម្មជាតិក៏ដោយ គួរគប្បីរក្សាទឹកទាំងនោះទុកសម្រាប់ប្រើប្រាស់ប្រចាំថ្ងៃ។
លោកមានប្រសាសន៍បន្តែមទៀតថា ក្នុងអំឡុងខែវិច្ឆិកា ឆ្នាំ២០១៩កន្លងទៅថ្មីៗនេះ មន្ទីរធនធានទឹកបានអន្តរាគមន៍បូមទឹកជួយសង្គ្រោះស្រូវវស្សាចំនួន ១.២៣១ហិចតា នៅឃុំសំរោង ស្រុកព្រៃឈរ និងនៅឃុំព្រែករំដេង ស្រុកស្រី សន្ធរ ។
