នៅថ្ងៃទី០១ ខែមករា ឆ្នាំ២០២១នេះ ឯកឧត្ដម ហាន កុសល ប្រធានសហភាពសហព័ន្ធយុវជនកម្ពុជា ខេត្តកំពង់ចាម និងជាអភិបាលរងខេត្តបាន នាំយកថវិកាចំនួន ២លានរៀល ដែលជាអំណោយរបស់ឯកឧត្តម អ៊ុន ចាន់ ដា អភិបាល នៃគណៈអភិបាលខេត្ត កំពង់ចាម និង ស.ស.យ.ក ខេត្តបានផ្តល់ថវិកាចំនួន ១លានរៀល សរុប៣លានរៀលជូនដល់លោក សាយ ក្នុងយុទ្ធនាការរត់ដើម្បីរៃអង្គាសថវិកាជួយមន្ទីរពេទ្យកុមារ។
ឯកឧត្ដម ហាន កុសល ក្នុងនាមរដ្ឋបាលខេត្ត ក៏ដូចជា ស.ស.យ.ក ខេត្ត បានធ្វើការកោតសរសើរខ្ពស់ចំពោះទឹកចិត្តសប្បុរសពោរពេញដោយស្មារតីលះបង់របស់ក្រុមរត់សាយដែលខំរត់ធ្វើដំណើរជាច្រើនខេត្តដើម្បីបុព្វហេតុជួយដល់កុមារកម្ពុជា ព្រមទាំងបានលើកទឹកចិត្តឲ្យក្រុមរត់នេះបន្តនូវសកម្មភាពមនុស្សធម៌តាមគ្រប់រូបភាពបន្ថែមថ្មីៗទៀត។ ខេត្តកំពង់ចាមរង់ចាំស្វាគមន៍ និងសហការរីករាយជានិច្ចទោះបីស្ថានភាពបច្ចុប្បន្នកំពុងរងវិបត្តិកូវីដ១៩ក៏ដោយ។
គួរបញ្ជាក់ផងដែរថាក្រុមរត់របស់សាយបានរត់ឆ្លងកាត់ជាច្រើនខេត្តមកហើយដើម្បីប្រមូលថវិកាជួយដល់មន្ទីរពេទ្យកុមារក្នុងនោះក្រុមរត់នេះបានធ្វើដំណើរពីខេត្តត្បូងឃ្មុំមកដល់ខេត្តកំពង់ចាមកាលពីយប់ថ្ងៃទី៣០ ខែធ្នូ ឆ្នាំ២០២០ ដោយមានការទទួលស្វាគមន៍ពី ស.ស.យ.ក ខេត្តកំពង់ចាម ព្រមទាំងបានចូលរួមរត់ជាមួយសាយក្នុងយុទ្ធនាការនេះផងដែរ។
ព្រឹកថ្ងៃទី០២ ខែមករា ឆ្នាំ២០២១ ក្រុមរត់សាយនឹងបន្តដំណើរតាមស្ពានឬស្សីឆ្លងទៅកោះប៉ែនរួចបន្តដំណើរទៅខេត្តព្រៃវែងដែលជាគោលដៅបន្ទាប់។
