ដោយ៖ ចិន សារ៉ាត
មន្ត្រីសមាហរណកម្ម ក្នុងរចនាសម្ព័ន្ធថ្មី របស់ក្រុង/ស្រុក ចំនួន ៦ ក្នុងនោះមាន ៖ ស្រុកកំពង់សៀម កោះសូទិន ស្រីសន្ធរ ជើងព្រៃ ស្ទឹងត្រង់ និងក្រុងកំពង់ចាម សរុបចំនួន ២០០នាក់ ទទួលបានការបណ្ដុះបណ្ដាលតម្រង់ទិស ស្ដីពីការគ្រប់គ្រងរដ្ឋបាលក្រុង/ស្រុក ។
ថ្លែងនៅក្នុងពិធីបើកវគ្គបណ្ដុះបណ្ដាលតម្រង់ទិស កាលពីព្រឹកថ្ងៃទី០៩ ខែមីនា ឆ្នាំ២០២០ នេះ ឯកឧត្ដម កៅ សុខអាន អភិបាលរង តំណាងដ៏ខ្ពង់ខ្ពស់ ឯកឧត្ដម អភិបាលខេត្តកំពង់ចាម មានប្រសាសន៍ថា យោងតាមបទពិសោធន៍ នៃការអនុវត្តយុទ្ធសាស្ត្រចតុកោណ ដំណាក់កាលទី៣ កន្លងមក រាជរដ្ឋាភិបាល អាចធ្វើការវាយតម្លៃបាន ពីភាពខ្លាំង និងភាពខ្សោយ ក៏ដូចជា បញ្ហាប្រឈម និងកាលានុវត្តភាព ផងដែរ ។ ឯកឧត្ដមបន្តថា ឈរលើមូលដ្ឋាននេះ ស្ថិតក្នុងបរិបទ នៃកំណែទម្រង់ដ៏ស៊ីជម្រៅ នោះគឺការកំណែទម្រង់ នៃការផ្ដល់សេវាសាធារណៈ ជូនប្រជាពលរដ្ឋ ដែលជាផ្នែកមួយ នៃកំណែទម្រង់វិមជ្ឈការ និងវសហមជ្ឈការ ជាពិសេស ការផ្ទេរមុខងារ និងធនធានពីក្រសួង ស្ថាប័ន នៅថ្នាក់ក្រោមជាតិ ឲ្យទៅរដ្ឋបាលថ្នាក់ក្រោមជាតិ ដែលនៅគៀកប្រជាពលរដ្ឋ គឺក្នុងគោលបំណងលើកកម្ពស់ការផ្ដល់សេវា និងការអភិវឌ្ឍមូលដ្ឋាន ដើម្បី ឆ្លើយតបទៅនឹងសេចក្ដីត្រូវការរបស់ប្រជាពលរដ្ឋ ប្រកបដោយគុណភាព ប្រសិទ្ធភាព តម្លាភាព គណនេយ្យភាព និងសមធម៌សង្គម ។ គិតមកដល់ពេលនេះ យើងបានរួមសហការគ្នា រៀបចំ និងអនុវត្តកម្មវិធីជាតិ អស់រយៈពេល ៩ឆ្នាំ ហើយ ដោយសម្រេចបាននូវសមិទ្ធផលជាច្រើន គួរឲ្យកត់សម្គាល់ ។ ជាក់ស្ដែង សម្រាប់ខេត្តកំពង់ចាម យើបានរៀបចំពិធីប្រកាសដាក់ឲ្យដំណើរការ រចាសម្ព័ន្ធថ្មី នៃរដ្ឋបាលក្រុង ស្រុក រួចរាល់ហើយ នាពេលថ្មីកន្លងទៅនោះ ។ ឯកឧត្ដមអភិបាលរងខេត្ត លើកឡើងថា ជាការពិតណាស់ ការចាប់ផ្ដើមប្រាកដ ជាជួបប្រទះបញ្ហាស្មុគ្រស្មាញ និងការប្រឈមនានា ដែលត្រូស្នើដល់ក្រុមប្រឹក្សា និងគណៈអភិបាលក្រុង ស្រុក ទាំងអស់ ត្រូវបង្កើនស្មារតីទទួលខុសត្រូវខ្ពស់ ក្នុងការចាត់ចែងដឹកនាំ និងគ្រប់គ្រងការងារថ្មីនេះ ។ ដូច្នេះ វគ្គបណ្ដុះបណ្ដាលតម្រង់ទិសនេះ វាពិតជាមានអត្ថប្រយោជន៍ យ៉ាងសំខាន់ណាស់ សម្រាប់សិក្ខាកាមទាំងអស់ ដើម្បី យកទៅអនុវត្តជាក់ស្ដែង នៅតាមរដ្ឋបាលនីមួយៗ ប្រកបដោយតម្លភាព គណនេយ្យភាព និងប្រសិទ្ធភាពខ្ពស់ ។
ស្ថិតក្នុងឱកាសនោះ ឯកឧត្ដម កៅ សុខអាន ក៏បានផ្ដាំផ្ញើ ដល់សិក្ខាកាមទាំងអស់ ត្រូវផ្ដោតការយកចិត្តទុកដាក់ ហើយត្រូវកំណត់ថា រាល់ខ្លឹមសារ និងការពន្យល់បកស្រាយ របស់គ្រូឧទ្ទេស គឺជាគន្លឹះល្អៗ និងជាកិច្ចការសំខាន់ចាំបាច់ សម្រាប់យកទៅអនុវត្តផ្ទាល់លើកិច្ចការប្រចាំថ្ងៃ ។ ដូច្នេះ សូមលើកទឹកចិត្តដល់សិក្ខាកាមទាំងអស់ ត្រូវមានវិន័យល្អ និងគោរពពេលវេលា ឲ្យបានទៀតទាត់ ។ ត្រូវចូលរួមសកម្មភាពផុលផុសទាំងការសួរសំណួរ នូវអ្វីដែលខ្លួនមិនទាន់ច្បាស់លាស់ ។ សូមកុំមានគំនិតថា គ្រូមុខដដែលៗ មេរៀនដដែលៗ មិនបាច់រៀនទេ ខ្លួនចេះអស់ហើយ ។ តាមពិត មិនដូច្នោះទេ អស់លោក លោកស្រី ត្រូវយល់ថា គ្មានការរៀនសូត្រណា មានទីបញ្ចប់នោះឡើយ ៕
