នួន សត្យា
ឯកឧត្តម អ៊ុន ចាន់ដា អភិបាលខេត្តកំពង់ចាម ឯកឧត្តម ខ្លូត ផន ប្រធានក្រុមប្រឹក្សាខេត្ត នាព្រឹកថ្ងៃទី ៩ ខែមេសា ឆ្នាំ ២០២២នេះ បានដឹកនាំប្រធានមន្ទីរ អង្គភាពក្នុងខេត្តកំពង់ចាម ចុះសួរសុខទុក្ខ នាយទាហាន ពលទាហាន កងពលតូចអន្តរាគមន៍លេខ៦ ស្រុកត្រពាំងប្រាសាទ ខេត្តឧត្តរមានជ័យ ដោយមានវត្តមានដ៏ខ្ពង់ខ្ពស់ពីឯកឧត្តម ប៉ែន កុសល្យ អភិបាលខេត្តឧត្តរមានជ័យ អញ្ជើញចូលរួមផងដែរ។
ឯកឧត្តម អ៊ុន ចាន់ដា បានយកឱកាសនោះថ្លែងអំណរគុណ ដល់នាយទាហានពលទាហាននៃកងពលតូចអន្តរាគមន៍លេខ៦ ដែលកន្លងមកបានចូលរួមសហការយ៉ាងសស្រាក់សស្រាំ ជាមួយរាជរដ្ឋាភិបាល ក្នុងកិច្ចការពារទឹកដី និងក្នុងយុទ្ធនាការប្រយុទ្ធប្រឆាំងនឹងជំងឺកូវីដ១៩ ដូចជាការជួយត្រួតពិនិត្យពលករដែលបានធ្វើចត្តាឡីស័កតាមមណ្ឌលជាដើម ។
ក្នុងឱកាសសំណេះសំណាលជាមួយនាយទាហានពលទាហាននោះដែរ ឯកឧត្តមអភិបាលខេត្ត ក៏បានមានប្រសាសន៍ក្រើនរំលឹក ដល់បងប្អូនពលទាហាន ដែលជាកងកម្លាំងឆ្នើមទាំងអស់ សូមឲ្យយកចិត្តទុកដាក់ថែទាំសុខភាពជាចម្បង ជាពិសេសថ្មីៗកន្លងទៅនេះ ដោយសារមានការប្រែប្រួលនៃអាកាសធាតុ ដែលងាយធ្វើឱ្យប៉ះពាល់ដល់សុខភាពរបស់យើង ។ ទន្ទឹមនឹងនេះ ក៏ត្រូវពង្រឹងផ្នែកជីវភាពក្នុងគ្រួសារកងទ័ពរបស់យើង តាមរយៈការបង្កបង្កើតផល លើដីរបស់ខ្លួន ដែលរាជរដ្ឋាភិបាលផ្ដល់ជូន ៕
