អាជ្ញាធរខេត្ត​កំពង់ចាម ប្រារព្ធ​បុណ្យ​ឯករាជ្យ​ជាតិ ៩ វិច្ឆិកា ជា​ខួប​អនុស្សាវរីយ៍​លើក​ទី​៦៧

អត្ថបទ៖ នួន សត្យា

៩ វិច្ឆិកា ឆ្នាំ ១៩៥៣-៩ វិច្ឆិកា ឆ្នាំ​២០២០ គឺជា​ខួប​អនុស្សាវរីយ៍​លើក​ទី​៦៧ នៃ​ទិវា​បុណ្យ​ឯករាជ្យ​ជាតិ ដែល​ព្រះរាជាណាចក្រ​កម្ពុជា​ប្រារព្ធ​ឡើង​ដើម្បី​រំឭក​ពី​ការទទួលបាន​ឯករាជ្យ​ពី​អាណានិគម​បារាំង ក្រោម​ព្រះ រាជ​បូជនីយកិច្ច​ដ៏​ឧត្តុង្គឧត្តម​របស់​ព្រះ​បរម​រតន​កោដ្ឋ នរោត្តម សីហនុ​។​

​នៅ​ព្រឹក​ថ្ងៃទី​៩ វិច្ឆិកា ឆ្នាំ​២០២០​នេះ អាជ្ញាធរខេត្ត​កំពង់ចាម ក្រោម​វត្តមាន​ឯកឧត្តម អ៊ុន ចាន់​ដា អភិបាលខេត្ត​កំពង់ចាម និង​ ឯកឧត្តម ខ្លូត ផន ប្រធាន​ក្រុមប្រឹក្សា​ខេត្ត ព្រមទាំង​ប្រធាន​មន្ទីរ​អង្គភាព​ជុំវិញ​ខេត្ត កង​ប្រដាប់អាវុធ​ទាំង ៣​ប្រភេទ បាន​អញ្ជើញ​ចូលរួម​ប្រារព្ធ​ខួប​អនុស្សាវរីយ៍​លើក​ទី​៦៧ នៃ​ការ​ដណ្តើមបាន​ឯករាជ្យ​សម្រាប់​កម្ពុជា​នៅមុខ​សាលាខេត្ត​កំពង់ចាម ដោយមាន​ការចូលរួម​ពី​មហាជន​ជាច្រើន​ទៀត​។​

​ស្ថិតក្នុង​ឱកាស​នោះ អភិបាលខេត្ត​កំពង់ចាម ឯកឧត្តម អ៊ុន ចាន់​ដា បាន​ថ្លែងថា
​ថ្ងៃនេះ​កាលពី ៦៧ ឆ្នាំមុន ក្រោម​ព្រះរាជ​បូជនីយកិច្ច​ដឹកនាំ កងជីវពល​ក្នុង​ព្រះរាជ​បេសកកម្ម ដ៏​ឧត្តុង្គឧត្តម​របស់​ព្រះករុណា​ព្រះបាទ សម្ដេចព្រះ​ន​រោ​ត្ដម សី ហ​នុ ព្រះមហាវីរក្សត្រ ព្រះ​វីរ​រាជបិតា​ឯករាជ្យ បូរណភាព​ទឹកដី និង​ឯកភាព​ជាតិខ្មែរ ព្រះ​បរម​រដ្ឋ​ន​កោដ្ឋ ក្នុងការ​ទាមទារ​ឯក​រាជ្យ​ពី​អា​និគម​និយម​បារាំង​។

​ ឯកឧត្តម ​អភិបាលខេត្ត​បាន​ថ្លែងបន្តថា ពេលវេលា​បាន​កន្លងទៅ​ជាង ៦០​ឆ្នាំ​ហើយ ប៉ុន្តែ​ប្រជានុរាស្ដ្រ​ទូទាំង​នគរ នៅតែ​ចងចាំ​ជានិច្ច នឹង​បាន​ចារ​ទុក ក្នុង​ក្រាំងមាស នៃ​ប្រវត្តិសាស្ត្រ​ជាតិ នូវ​មហា ករុណា​ទិ​គុណ ប្រកបដោយ ព្រះព្រហ្ម​វិហារធម៌​ដ៏​ជ្រាលជ្រៅ​របស់​ព្រះករុណា សម្ដេចព្រះ​ន​រោ​ត្ដម សី ហ​នុ ព្រះ​បរម​រតន​កោដ្ឋ ដែល​ព្រះអង្គ​បាន​បូជា​ព្រះកាយពល និង​ព្រះ​បញ្ញាញាណ ដ៏​ឈ្លាសវៃ ដើម្បី​បុព្វហេតុ ឯករាជ្យ​ជាតិ បូរណភាព​ទឹកដី សេចក្តីថ្លៃថ្នូរ សេចក្តីសុខសាន្ត និង​ការរីកចម្រើន នៃ​សង្គមជាតិ ។ ព្រះអង្គ​បាន​បង្រួបបង្រួម​អ្នកនយោបាយ ដែល​បែកបាក់​គ្នា ឬ​អ្នកមាន​និន្នាការ​នយោបាយ​ផ្សេង ឱ្យ​រូប​រួមគ្នា​ចូលរួម បម្រើ​ប្រជារាស្ត្រ អស់ពី​កម្លាំងកាយ​ចិត្ត និង​បាន​ស្ថាបនា​សង្គមរាស្ត្រនិយម​ដែលជា​ស្នាម​ព្រហស្ថ ដ៏​មានតម្លៃ​មិនអាច​កាត់ថ្លៃ​បាន ជាពិសេស​ព្រះអង្គ​បាន ត្រួសត្រាយ​មាគ៌ា​សន្តិភាព សាមគ្គីភាព និង​ការអភិវឌ្ឍន៍ សម្រាប់​សង្គមជាតិ​ខ្មែរ​ទាំងមូល ដែល​ប្រជារាស្ត្រ​ជំនាន់​ក្រោយ ពិសេស​ថ្នាក់ដឹកនាំ និង​អ្នកនយោបាយ​តែង​ដង្ហែ​តាម​មាគ៌ា​ដ៏​ថ្លៃថ្លា​នេះ រហូតមក​។

​ ឯកឧត្តម ​អភិបាលខេត្ត​បាន​បន្តថា ក្រោយពេល​ទទួលបាន​ឯករាជ្យ​ប្រទេស​កម្ពុជា​យើង មានការ​អភិវឌ្ឍ​លើ​គ្រប់​វិស័យ ប៉ុន្តែ​ជា​អកុសល ក្រោយពេល​រដ្ឋប្រហារ ១៨ មីនាឆ្នាំ ១៩៧០ ធ្វើ​ឲ្យ​ប្រទេស​កម្ពុជា​ធ្លាក់​ចូលក្នុង​សង្គ្រាមស៊ីវិល រ៉ាំរ៉ៃ​ជិត ៣ ទសវត្សរ៍ ប្រទេសជាតិ​ជួបប្រទះ​តែ​អសន្តិសុខ នឹង​ទទួលរង​ការបំផ្លិចបំផ្លាញ​លើ​គ្រប់​វិស័យ ។ ប៉ុន្តែ​បន្ទាប់មក ក្រោម​នយោបាយ​ឈ្នះ​ឈ្នះ នៃ​ការដឹកនាំ​ប្រកបដោយ​គតិបណ្ឌិត​រប​ស់ស​ម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា បានធ្វើ​ឲ្យ​កម្ពុជា មាន​សុខសន្តិភាព​ពេញលេញ នឹងមាន​ឱកាស​នៃ​ការអភិវឌ្ឍ​ប្រទេសជាតិ​ចាប់ពី​ចំណុចសូន្យ រហូតដល់​សព្វថ្ងៃនេះ ។

​ ឯកឧត្តម ​អភិបាលខេត្ត​បាន​បញ្ជាក់ថា ជាក់ស្ដែង ដូចជា​ខេត្តកំពង់ចាម បានទទួល​សមិទ្ធផល​ដូចជា ស្ពាន​គឺ​ហ្សូ​ណា ឆ្លងកាត់​ទន្លេមេគង្គ និង​ស្ពាន​ឆ្លងកាត់​ទន្លេមេគង្គ​ស្រុក​ស្ទឹងត្រង់ ស្រុក​ក្រូចឆ្មារ ផ្លូវជាតិ​លេខ ៦ លេខ ៧ និង​ផ្លូវ​គមនាគមន៍​ខ្វាត់ខ្វែង គ្រប់​ច្រកល្ហក សាលារៀន វត្ត​អារាម មន្ទីរពេទ្យ រោងចក្រ​សហគ្រាស​ជាដើម ។ ល​។ ដែល​សមិទ្ធផល​ទាំងអស់នេះ កើតឡើង​ទៅបាន ដោយសារ​កត្តា​សុខសន្តិភាព ។ កត្តា​សន្តិភាព ស្ថេរភាព​សង្គម បាន​បង្កើត​ទំនុកចិត្ត ឲ្យ​អ្នកវិនិយោគ មក​ដាក់ទុន បង្កើត​រោងចក្រ​សហគ្រាស​តូច ធំ ក្នុង​ខេត្តកំពង់ចាម ដែល​បាន​ស្រូបយក​កម្លាំង​ពលកម្ម​ប្រមាណ​ជាង ៣​ម៉ឺន​នាក់ និង​បាន​បង្កើត​ការងារ​ជាច្រើន​កន្លែង​ផ្សេងទៀត ដែលជា​ការចូលរួម​លើកកម្ពស់​សេដ្ឋកិច្ច​គ្រួសារ បង្កើន​កំណើនសេដ្ឋកិច្ច​ខេត្ត និង​សេដ្ឋកិច្ចជាតិ និង​ចូលរួមចំណែក ក្នុងការ​កាត់បន្ថយ​ភាពក្រីក្រ​របស់​ប្រជាពលរដ្ឋ ស្របតាម​គោលនយោបាយ​របស់​រាជ​រដ្ឋាភិបាល​កម្ពុជា ។​