អត្ថបទដោយ៖ លោក អឿន ស្រួ
ដើម្បីពន្លឿន កិច្ចការងាររដ្ឋបាលជូនប្រជាពលរដ្ឋនៅតាមមូលដ្ឋានឲ្យបានឆាប់រហ័សបន្ថែមទៀត ប្រធានអង្គភាពច្រកចេញចូលតែមួយខេត្តកំពង់ចាម ប្តាជ្ញាផ្តល់សេវាសាធារណៈឲ្យល្អបំផុត ជូនប្រជាពលរដ្ឋទូទៅក្នុងខេត្តកំពង់ចាម។
លោក អ៊ឹង ទី ប្រធានអង្គភាពច្រកចេញចូលតែមួយខេត្តកំពង់ចាម បានប្រាប់វិទ្យុជាតិខេត្តកំពង់ចាម នាថ្ងៃទី២៣ ខែកក្កដា ឆ្នាំ២០២០នេះ ថា ដើម្បីពន្លឿនកិច្ចការងាររដ្ឋបាលជូនប្រជាពលរដ្ឋបានឆាប់រហ័សអង្គភាពច្រកចេញចូលតែមួយខេត្តកំពង់ចាម បានធ្វើការផ្សព្វផ្សាយតាមគ្រប់រូបភាពដល់ប្រជាពលរដ្ឋឲ្យបានយល់ជ្រួតជ្រាបតាមកម្រិតនៃវិស័យសេវាដែលត្រូវមកទទួល។ លោកបានប្តាជ្ញារដឹកនាំអង្គភាពច្រកចេញចូលតែមួយខេត្ត បម្រើសេវាជូនប្រជាពលរដ្ឋ គឺដើម្បីសម្រេចគោលដៅផ្តល់សេវាសាធារណ:ជូនប្រជាពលរដ្ឋឲ្យទាន់ពេលវេលា ដោយឈរលើគោលការណ៍ «ធ្វើឳ្យបានធ្វើឳ្យលឿន» និងប្រកបដោយតម្លាភាព។
លោក អ៊ឹង ទី បានបន្តទៀតថា អាជ្ញាធរខេត្តកំពង់ចាមបានបើកឲ្យដំណើរការអង្គភាពច្រកចេញចូលតែមួយកាលពីថ្ងៃទី២០ ខែកក្កដា ឆ្នាំ២០១៨។ ដោយនៅឆ្នាំ២០១៨ ដល់ ២០២៩ បានផ្តល់សេវាជូនប្រជាពលរដ្ឋបានចំនួនជាង ៣ម៉ឺនសេវា ស្មើទឹកប្រាក់ជាង ១០០០លានរៀល និង១ឆមាសឆ្នាំ២០២០នេះ បានផ្តល់សេវាជូនប្រជាពលរដ្ឋចំនួនជាង១៤៣០០សេវា ស្មើទឹកប្រាក់ជាង១០០០លានរៀល។ ដោយមានសេវាចំនួនជាង៥០០ វិស័យ ដែលមាននៅតាមបណ្តាមន្ទីរ និងអង្គភាពក្នុងខេត្តកំពង់ចាម។
ក្នុងនោះផងដែរមានសេវាវិស័យ: រៀបចំដែនដី នគរូបនីយកម្ម និងសំណង់, ការងារ និងបណ្តុះបណ្តាលវិជ្ជាជីវ:, សាធារណការ និងដឹកជញ្ជួន, ការដាក់បន្ទុកនិងការដោះបន្ទុក និងវិស័យអប់រំជាដើម ដែលមានការមមាញឹកខ្លាំងក្នុងការផ្តល់សេវាជូនប្រជាពលរដ្ឋ។
លោក អ៊ឹង ទី បានបន្ថែមថា ច្រកចេញចូលតែមួយ គឺជាយន្តការសម្រាប់ការផ្តល់សេវារដ្ឋបាល និងការបង្កើតការិយាល័យប្រជាពលរដ្ឋសម្រាប់ទទួល និងសម្របសម្រួលដោះស្រាយបណ្តឹងតវ៉ានានារបស់ប្រជាពលរដ្ឋនៅរដ្ឋបាលថ្នាក់ក្រោមជាតិដែលជាក្របខណ្ឌគតិយុត្ត និងជាឯកសារបច្ចេកទេសដ៏មានសារៈសំខាន់ ក្នុងការរួមចំណែកសម្រេចបាននូវចក្ខុវិស័យនៃគោលនយោបាយសេវាសាធារណៈរបស់រាជរដ្ឋាភិបាលក្នុងការលើកកម្ពស់ប្រសិទ្ធភាព និងគុណភាពនៃការផ្តល់សេវារដ្ឋបាលឱ្យកាន់តែប្រសើរឡើងជូនប្រជាពលរដ្ឋ។
លោកបានបញ្ជាក់ដែរថា ប្រសិនបើបងប្អូនប្រជាពលរដ្ឋមានចម្ងល់អំពីការផ្តល់ និងការទទួលសេវាសាធារណៈនៅអង្គភាពច្រកចេញចូលតែមួយខេត្តកំពង់ចាម សូមចូលទៅមើលផេកហ្វេសប៊ុក «អង្គភាពច្រកចេញចូលតែមួយខេត្តកំពង់ចាម» ឬទូរសព្ទមកកាន់លេខលោកដោយផ្ទាល់គឺ ០៩៩ ៥៣ ៥៥ ៥៧ ៕
