អត្ថបទដោយ៖ លោក អឿន ស្រួ
(កំពង់ចាម)៖ លោកស្រី ប៉ាន មករា មន្ត្រីឆ្លើយតបបន្ទាន់នៃមន្ទីរសុខាភិបាលខេត្តកពង់ចាម នាព្រឹកថ្ងៃទី០២ ខែកក្កដា ឆ្នាំ២០២០នេះ បានក្រើនរំលឹក និងអំពាវនាវសារជាថ្មីម្តងទៀត ជូនដល់បងប្អូនប្រជាពលរដ្ឋទាំងអស់ ឲ្យបន្តអនុវត្តន៍វិធានការការពារការចម្លងវីរុសកូវីដ-១៩ ឲ្យបានខ្ជ្ជាប់ខ្ជួន ដើម្បីកុំឲ្យកើតមានជំងឺកូវីដ-១៩ ដែលអាចឈានដល់ការស្លាប់បាត់បង់ជីវិតផងដែរ។
លោកស្រី លោកស្រី ប៉ាន មករា បានណែនាំថា ត្រូវនាំគ្នាបន្តអនុវត្តន៍វិធានការការពារដែលក្រសួងសុខាភិបាលបានដាក់ចេញ ជាពិសេសចៀសវាងកន្លែងប្រមូលផ្តុំគ្នាច្រើន នៅក្នុងកន្លែងបិទជិត ហើយគ្មានខ្យល់ចេញចូល ត្រូវពាក់ម៉ាស់ក្នុងករណីចាំបាច់ អនាម័យដៃស្អាតជានិច្ច និងរក្សាគម្លាតសុវត្ថិភាពសង្គម និងគម្លាតសុវត្ថិភាពបុគ្គលលើសពីមួយម៉ែត្រកន្លះឡើងទៅ គឺជាការចាំបាច់ដែលត្រូវតែនាំគ្នាអនុវត្តន៍ នៅក្នុងដំណាក់កាលទប់ស្កាត់រលកទីពីរ នៃការចម្លងវីរុសកូវីដ-១៩នេះ។
លោកស្រីស្នើដល់អាជ្ញាធរមូលដ្ឋាន ជូនព័ត៌មានមកមន្ទីរសុខាភិបាលឲ្យបានលឿន បើមានពលករ ឬពលរដ្ឋខ្មែរដែលទើបវិលត្រឡប់មកពីក្រៅប្រទេស ដើម្បីមានវិធានការចត្តាឡីស័ក និងយកសំណាកមកធ្វើតេស្តរកកូវីដ-១៩ និងណែនាំពួកគាត់ឲ្យអនុវត្តតាមវិធានសុខាភិបាល។
លោកស្រីបានបញ្ជាក់ថា កន្លងមកក្នុងខេត្តកំពង់ចាមមានអ្នកឆ្លងជំងឺកូវីដ១៩ ចំនួន១៦ករណី និងបានព្យាបាលជាសះស្បើយទាំងអស់ ហើយទាំង១៦ករណីនេះសុទ្ធតែករណីនាំចូល។ ដោយឡែកគិតត្រឹមថ្ងៃទី០២ កក្កដានេះ គឺមានពលរដ្ឋខ្មែរមកពីក្រៅប្រទេសចំនួន២៨នាក់ កំពុងធ្វើចត្តាឡីស័ក ក្រោមការតាមដានយ៉ាងយកចិត្តទុកដាក់ពីគ្រូពេទ្យ។
សូមបញ្ជាក់ថា ប្រទេសកម្ពុជាគិតត្រឹមថ្ងៃទី០២ ខែកក្កដា ឆ្នាំ២០២០ មានអ្នកជំងឺកូវីដ១៩ ចំនួន១៤១ករណី ដោយ១០ករណីបន្តស្ថិតក្រោមការព្យាបាល និង១៣១ករណី បានព្យាបាលជាសះស្បើយ៕