អត្ថបទដោយ៖ លោក អឿន ស្រួ
សាខាកាំកុងត្រូលខេត្តកំពង់ចាមបានឲ្យដឹងថា ប្រជាពលរដ្ឋត្រូវតែមានការយល់ដឹងឲ្យខ្ពស់មុនទិញចំណីអាហារនៅលើទីផ្សារយកទៅបរិភោគ ព្រោះចំណីអាហារមួយចំនួនអាចជាទំនិញខូចគុណភាព និងគ្មានបច្ចេកទេសស្តង់ដារគុណភាពចំណីអាហារត្រឹមត្រូវនោះទេ។
លោក ស៊ាន ស៊ីណា ប្រធានសាខាកាំកុងត្រូលខេត្តកំពង់ចាម បានប្រាប់វិទ្យុជាតិខេត្តកំពង់ចាមថា សាខាកាំកុងត្រូលបានរួមសហការជាមួយមន្ត្រីមន្ទីរពាណិជ្ជកម្ម និងគណៈកម្មការផ្សារ អាជ្ញាធរដែនដី បានចុះត្រួតពិនិត្យចំណីអាហារ ផលិតផលកំប៉ុង គ្រឿងសមុទ្រ និងទំនិញជាច្រើនមុខទៀតដែលដាក់លក់លើទីផ្សារតាមទីប្រជុំជនទូទាំងខេត្តកំពង់ចាម ឃើញមានទំនិញខ្លះមានលាយសារធាតុគីមីហាមឃាត់ ខ្លះគ្មានគុណភាព និងខ្លះទៀតខូចគុណភាព។
លោកបន្តថា តាមការចុះត្រួតពិនិត្យនៅតាមទីផ្សារកន្លងទៅ គឺធ្លាប់ចាប់បានគ្រឿងសមុទ្រ ខ្ញីហាន់ ដើមចេកហាន់ សណ្តែកបណ្តុះ និងសសៃរគុយទាវ មានលាយសារធាតុគីមីហាមឃាត់ ដែលធ្វើឲ្យប៉ះពាល់ដល់សុខភាពអ្នកទិញទៅបរិភោគយ៉ាងខ្លាំង។ លោកបន្ថែមថា ទឹកម្ទេសម៉ាកខ្លះដែលលក់នៅលើទីផ្សារក្នុងខេត្តកំពង់ចាមសព្វថ្ងៃនេះ ក៏មិនទាន់មានលក្ខណៈបច្ចេកទេសស្តង់ដារគុណភាពចំណីអាហារបានត្រឹមត្រូវដែរ។ បញ្ហានេះលោកស្នើសុំដល់មន្ទីរឧស្សាហកម្មនិងសិប្បកម្មត្រូវចុះត្រួតពិនិត្យដល់ទីតាំងផលិតផ្ទាល់។
តាមការចុះត្រួតពិនិត្យតាមទីតាំងលក់កន្លងមក ដកហូតទំនិញហួសកាលបរិច្ឆេតបានភាគច្រើននៅតាមផ្សារប្រជុំជននៅតំបន់ដាច់ស្រយាល មានដូចជា គ្រឿងកំប៉ុង នំកញ្ចប់ និងស្ករគ្រប់។ នេះជាការបញ្ជាក់ របស់លោក ស៊ាន ស៊ីណា។ លោកឲ្យដឹងទៀតថា ក្នុងមួយឆ្នាំៗសាខាកាំកុងត្រូលបានចុះត្រួតពិនិត្យចំណីអាហារ ណែនាំអាជីវករ និងអ្នកប្រើប្រាស់បានច្រើនដងណាស់ ពិសេសតាមដានលើអាជីវករដែលធ្លាប់ធ្វើកិច្ចសន្យាជាមួយសាខាកាំកុងត្រូលពីមុនមក ថាបានបញ្ឈប់ការលក់ទំនិញគ្មានគុណភាពដែរឬទេ។ ចំណែកទំនិញឬចំណីអាហារខូចគុណភាពដែលដក់ហូតបានត្រូវដុតកំទិចចោលផងដែរ។
ប្រធានសាខាកាំកុងត្រូលខេត្តកំពង់ចាមរូបនេះ ក៏បានអំពាវនាវដល់អ្នកផលិត និងអាជីវករទាំងអស់ត្រូវមានមនសិការខ្ពស់ ដោយគិតគូអំពីសុខភាពអ្នកប្រើប្រាស់ជាធំ ចំណែកអ្នកទិញត្រូវមានការប្រុងប្រយ័ត្នខ្ពស់ មុនទិញចំណីអាហារត្រូវចេះមើលស្ថានភាពខាងក្រៅ មើលប្រភពទំនិញ មើលទីតាំងផលិត មើលថ្ងៃផុតកំណត់ប្រើប្រាស់ និងមើលការដាក់តាំងលក់មានអនាម័យត្រឹមត្រូវដែរឬទេ៕