ដី​តំបន់​អភិរក្ស​រមណីយដ្ឋាន​ភ្នំ​ជើងព្រៃ​អភិបាលខេត្ត​កំពង់ចាម​ប្រគល់ឱ្យ​ក្រសួង​វប្បធម៌ និង​វិចិត្រសិល្បៈ ជា​អ្នកសម្រេច​ចេញ​ប្លង់​កម្មសិទ្ធិ

អត្ថបទ៖ នួន សត្យា

អភិបាលខេត្ត​កំពង់ចាម បានសម្រេច​ប្រគល់ ដី​ក្នុង​តំបន់​អភិរក្ស រមណីយដ្ឋាន​ភ្នំ​ជើងព្រៃ លើ​ទំហំ​ផ្ទៃដី ៧១,៨១២ ម៉ែត្រការ៉េ ស្ថិតនៅ​ក្នុងភូមិ​គោក​រវៀង ឃុំ​គោក​រវៀង ស្រុក​ជើងព្រៃ ឲ្យ​ក្រសួង​វប្បធម៌​និង​វិចិត្រសិល្បៈ ជា​អ្នកសម្រេច​ក្នុង​ការចេញ​ប័ណ្ណកម្មសិទ្ធិ ។

​ការសម្រេច​នេះ​បាន​ធ្វើឡើង នៅ​ព្រឹក​ថ្ងៃទី​១៣ ខែកក្កដា ឆ្នាំ​២០២០ បន្ទាប់ពី​លោក​អភិបាលខេត្ត អញ្ជើញ​ដឹកនាំ​កិច្ចប្រជុំ​ពិគ្រោះ​ពិភាក្សា លើ​ការស្នើសុំ​ចុះបញ្ជី​ប្លង់ ធ្វើ​ប័ណ្ណកម្មសិទ្ធិ​ដីធ្លី មួយកន្លែង ស្ថិតនៅក្នុង​តំបន់​អភិរក្ស រមណីយដ្ឋាន​ភ្នំ​ជើងព្រៃ​នោះ ។

​សូម​បញ្ជាក់ដែរថា បន្ទាប់ពី​មាន​សំណើសុំ​ធ្វើ​ប័ណ្ណកម្មសិទ្ធិ​កាន់កាប់​ដី​នៅ​តំបន់​រមណីយដ្ឋាន​ភ្នំ​ជើងព្រៃ លោក​អភិបាលខេត្ត​កំពង់ចាម បានសម្រេច​បង្វែ​សំណើ​ខាងលើ ជូនទៅ​ក្រសួង​វប្បធម៌​និង​វិចិត្រសិល្បៈ ដើម្បី​ធ្វើការ​ពិនិត្យ​សម្រេច ព្រោះថា ដី​នៅក្នុង​តំបន់​អភិរក្សរ​ម្មណី​យ​ដ្ឋា​ន​ភ្នំ​ជើងព្រៃ កន្លងមក​ស្ថិតក្នុង​ការគ្រប់គ្រង របស់​ក្រសួង​វប្បធម៌ និង​វិចិត្រសិល្បៈ​។​