លោកជំទាវ កុល ធា​រិ​ន បាននាំយកសម្ភារៈ​និង​ថវិកា របស់​ឯកឧត្តម ហ៊ុន ណេង ចែកជូន​ប្រជាពលរដ្ឋ រងគ្រោះ​ដោយ​អគ្គិភ័យ ៣​គ្រួសារ នៅ​ឃុំ​ព្រែកកក់ ស្រុក​ស្ទឹងត្រង់​

ដោយ៖ សម ផល្លា

បន្ទាប់ពី​ទទួលបាន​ព័ត៌មាន អំពី​ហេតុការណ៍ ដ៏​រន្ធត់​ថា មាន​បងប្អូន​ប្រជាពលរដ្ឋ​ទទួលរង​គ្រោះ ដោយ​អគ្គិភ័យ​ឆាបឆេះ​លំនៅដ្ឋាន ស្ទើ​គ្មាន​សល់ នា​ថ្ងៃទី​១៥ ខែមករា ឆ្នាំ​២០២០ នេះ លោកជំទាវ ជំទាវ​កុល ធា​រិ​ន សមាជិក​រដ្ឋសភា រួម​ដំណើរ​ដោយ ឯកឧត្តម ច្រឹង គឹម​ស្រ៊ាង​សមាជិក​ព្រឹទ្ធសភា លោកជំទាវ ស្រី គឹម​ឆ​យ សមាជិក​រដ្ឋសភា​អញ្ជើញ​ចុះសួរសុខទុក្ខ​និង​នាំ​អំណោយ​សង្គ្រោះបន្ទាន់​របស់​ឯកឧត្តម ហ៊ុន ណេង និង លោកជំទាវ​ទៅ​ចែកជូន​ប្រជាពលរដ្ឋ​រងគ្រោះ ដោយ​អគ្គីភ័យ ៣​គ្រួសារ ស្ថិតនៅ​ភូមិ​បឹង​ដែង ឃុំ​ព្រែកកក់ ស្រុក​ស្ទឹងត្រង់ ខេត្តកំពង់ចាម ។

​នាឱកាស​នោះដែរ ឯកឧត្តម ច្រឹង គឹម ស្រ៊ាង បាន​ពាំនាំ នូវ​ប្រសាសន៍​ផ្ដាំផ្ញើ និង​ការសាកសួរ​សុខទុក្ខ ពី​សំណាក់ ឯកឧត្ដម ហ៊ុន ណេង ជូន​ចំពោះ បងប្អូន​ប្រជាពលរដ្ឋ​រងគ្រោះ ទាំង ៣​គ្រួសារ ។ ជាមួយ​នោះ ឯកឧត្តម ក៏បាន​ចូលរួម នូវ​ការសោកស្ដាយ ចំពោះ គ្រោះថ្នាក់​នេះ ដែល​បានធ្វើ​ឲ្យ​បងប្អូន​បាត់បង់ ទាំង​ទ្រព្យសម្បត្តិ និង​ផ្ទះសម្បែង ដែល​បានមក​ដោយ​ការបាក​បំផុត ហើយ​ត្រូវបាន​បំផ្លាញ តែមួយ​ពព្រិច​ភ្នែក ដោយសារ​អគ្គិភ័យ ដូច​ពាក្យចាស់​លោក​ថា ៖ «​ស៊ូស្លាប់​បា កុំ​ឲ្យ​ស្លាប់​មេ ស៊ូ​លិច​ទឹក​កណ្ដាលទន្លេ កុំ​ឲ្យ​តែ​ភ្លើង​ឆេះ​ផ្ទះ​» នោះ ។

​ដោយឡែក​ជាមួយនឹង​ការចូលរួម​រំលែក​ទុក្ខលំបាក​ទាំងអស់​នេះដែរ ឯកឧត្តម ក៏បាន​លើកទឹកចិត្ត ទៅដល់​គ្រួសារ​រងគ្រោះ​ទាំង​៣​សូមកុំ​អស់សង្ឃឹម​ពោលគឺ​ត្រូវ​ប្រឹងប្រែង​សារជាថ្មី​ដើម្បី ស្ដារ​ជីវភាព ឡើង វិញ​ពីព្រោះថា​ពេលនេះ​អ្វីៗ​វា​បាន​រលាយ​អស់​ទៅ​ក៏ពិតមែន​ប៉ុន្តែ​យើង​នៅមាន​ជីវិត​រស់នៅ ដែល​ចាំបាច់ ណាស់​ត្រូវតែ​ជំនះ​ឧបសគ្គ និង​តស៊ូ​ព្យាយាម​ក្នុង​ជីវិត​បន្តទៀត តាមរយៈ ការខិតខំ​ប្រឹងប្រែង​បង្កបង្កើនផល និង​ការប្រកប​អាជីវកម្ម​ផ្សេងៗ ដើម្បី ជីវភាព​ក្នុង​គ្រួសារ នាពេល​អនាគត ។

នាឱកាស​នោះដែរ​លោកជំទាវ​សមាជិក​រដ្ឋសភា​ឯកឧត្តម​សមាជិក​ព្រឹទ្ធសភា​ក៏បាន​នាំយក​អំណោយ​របស់​ឧ​ត្ត​ម​ហ៊ុន ណេង​និង​លោកជំទាវ ទៅ​ចែកជូន​គ្រួសារ​ប្រជាពលរដ្ឋ​រងគ្រោះ​ទាំង ៣​គ្រួសារ ដោយ​ក្នុង ១​គ្រួសារ ទទួលបាន ៖ អង្ករ ១​បេ មី ១​កេស ទឹកត្រី ១​យួរ ទឹកស៊ីអ៊ីវ ១​យួរ ត្រី ១​យួរ ប្រេងឆា​១​ដប​និង​ថវិកា ៥០​ម៉ឺន​រៀល ក្នុងនោះ​ថវិកា​ឯកឧត្តម ច្រឹង គឹម​ស្រ៊ាង​១​គ្រួសារ ៥​ម៉ឺន​រៀល ៕