អត្ថបទ៖ នួន សត្យា
ព្រះតេជគុណ ប៊ត តាំងឆេង មេគណខេត្តកំពង់ចាម នៅរសៀលថ្ងៃទី១៦ ខែកក្កដា ឆ្នាំ២០២០ បានដឹកនាំមន្ត្រីសង្ឃ នាំនូវអំណោយមានគ្រឿងឧបភោគបរិភោគ យកមកប្រគល់ជូន ឯកឧត្តម អ៊ុន ចាន់ដា ប្រធានសាខាកាកបាទក្រហមកម្ពុជា ខេត្តកំពង់ចាម នៅសាលាខេត្តកំពង់ចាមដើម្បីចូលរួមក្នុងកិច្ចការមនុស្សធម៌ ។
តាមព្រះមេគណខេត្តកំពង់ចាមបានមានសង្ឃដីកាថា អំណោយសប្បរសធម៌ទាំងនោះ មានការចូលរួមចែករំលែកពីមន្ដ្រីសង្ឃ ក្នុងខេត្ដកំពង់ចាម មានព្រះអនុគណ និងសហការី ទាំង១០ ក្រុង/ស្រុកក្នុងខេត្តកំពង់ចាមតែម្តង។ ដែលអំណោយរួមមាន អង្ករ ១០០បាវ (១បាវ ស្មើនឹង ៥០គីឡូក្រាម), ឃីត (បន្លុង) ១០០ កញ្ចប់ និងថវិកា ៦លានរៀល។
ព្រះអង្គ ប៊ត តាំងឆេង មានសង្ឃដីកា អោយដឹងទៀតថា អំណោយទាំងអស់ត្រូវបានប្រគល់ជូន សាខាកាកបាទក្រហមខេត្ត ទុកសម្រាប់ជាអំណោយមនុស្សធម៌ ជួយសង្គ្រោះដល់ជនរងគ្រោះ និងជនងាយរងគ្រោះ តាមការចាត់ចែង របស់សាខាកាកបាទក្រហមកម្ពុជាខេត្តកំពង់ចាម ។
ជាមួយគ្នានោះដែរ អភិបាលខេត្តឯកឧត្តម អ៊ុន ចាន់ដា បានសំដែងការគួរសម និងបានថ្លែងអំណរគុណយ៉ាងជ្រាលជ្រៅ ចំពោះព្រះអង្គមេគណខេត្ត និងមន្ដ្រីសង្ឃសាលាគណខេត្ដកំពង់ចាម .ព្រះអនុគណ ព្រមទាំងសហការី ទាំង១០ ក្រុង/ស្រុក ដែលមានសទ្ធាជ្រះថ្លា បានចូលរួមក្នុងកិច្ចការមនុស្សធម៌នេះ ។ ទន្ទឹមនឹងនោះលោកអភិបាលខេត្ត ក៏បានប្រគេន នូវលិខិតថ្លែងអំណរគុណ ប្រគេនគ្រប់វត្តទាំង ៣៧៦ វត្តផងដែរ៕
