អត្ថបទ៖ នួន សត្យា
អភិបាលខេត្តកំពង់ចាមឯកឧត្តម អ៊ុន ចាន់ដា នៅថ្ងៃទី ១៧ ខែតុលា ឆ្នាំ២០២០ នេះ បានដឹកនាំមន្ត្រីជំនាញពាក់ព័ន្ធ ចុះពិនិត្យការស្ថាបនឃឿនការពារច្រាំងទន្លេ ដែលបានសាងសង់រួច ១០០% នៅភូមិពង្រលិច ឃុំពង្រ ស្រុកកោះសូទិន ដែលកន្លងមកធ្លាប់ទទួលរងការវាយប្រហារ ពីទឹកជំនន់ដែលបណ្តាលឲ្យបាក់ច្រាំងជារឿយៗ ស្ទើរតែខូចផ្លូវ ដែលប្រជាពលរដ្ឋធ្វើដំណើរឆ្លងកាត់ ។
បន្ទាប់ពីអញ្ជើញចុះពិនិត្យច្រាំងទន្លេ នោះ ឯកឧត្តមអភិបាលខេត្ត និងក្រុមការងារ បានបន្តដំណើរ ចុះពិនិត្យស្ថានីយបូមទឹកនៃប្រព័ន្ធធារាសាស្ត្រវ៉ៃកូ និងស្ថានភាពទឹកនៅទ្វារទឹកប្រព័ន្ធធារាសាស្ត្រវ៉ៃកូ ស្ថិតនៅភូមិរកាកោងត្បូង ឃុំមហាលាភ ស្រុកកោះសូទិនផងដែរ។
ក្នុងឱកាសនៃការចុះពិនិត្យនោះ លោកអភិបាលខេត្ត បានណែនាំដល់អាជ្ញាធរស្រុក ឃុំ និងអំពាវនាវដល់បងប្អូនប្រជាពលរដ្ឋ ឲ្យចូលរួមថែរក្សាសមិទ្ធិផលថ្មីនេះ ដើម្បីប្រើប្រាស់ជាប្រយោជន៍ដល់មនុស្សជំនាន់ក្រោយៗ។ ជាមួយគ្នានោះលោកអភិបាលខេត្ត ក៏បានណែនាំដល់អភិបាលស្រុក និងជាប្រធានគណៈកម្មាធិការគ្រប់គ្រងគ្រោះមហន្តរាយស្រុក លោកមេឃុំ ឲ្យបន្តការតាមដានស្ថានភាពអាកាសធាតុ និងផលប៉ះពាល់នៅក្នុងមូលដ្ឋានរបស់ខ្លួន ហើយត្រូវត្រៀមលក្ខណៈជាស្រេច ដោយប្រើប្រាស់កម្លាំងសរុប មធ្យោបាយសរុប ដើម្បីត្រៀមឆ្លើយតប និងជួយសង្គ្រោះប្រជាពលរដ្ឋឲ្យបានទាន់ពេលវេលា ក្នុងករណីកើតមានជាយថាហេតុនូវគ្រោះមហន្តរាយក្នុងភូមិសាស្ត្ររបស់ខ្លួន។
សូមរំលឹកផងដែរថា ប្រជាពលរដ្ឋក្នុងខេត្តកំពង់ចាមពេលបច្ចុប្បន្ននេះ មិនទាន់មានរងផលប៉ះពាល់ដោយគ្រោះទឹកជំនន់នោះទេ។ ប៉ុន្តែទោះជាយ៉ាងនេះក្តី គណៈអភិបាលខេត្តកំពង់ចាម ឯកឧត្តម អ៊ុន ចាន់ដា តែងតែឆ្លៀតពេលដឹកនាំមន្ត្រីក្រោមឱវាទ ចុះពិនិត្យស្ថានភាពរស់នៅរបស់ប្រជាពលរដ្ឋតាមមូលដ្ឋានជាប្រចាំ ។
