អត្ថបទ៖ ចិន សារ៉ាត
កាលពីរសៀលថ្ងៃទី១៧ ខែតុលា ឆ្នាំ២០២០ ឯកឧត្ដម លន់ លឹមថៃ អ្នកតំណាងរាស្ត្រមណ្ឌលកំពង់ចាម និងលោកជំទាវ និងលោកជំទាវ ញូង ចរិយា អ៊ុន ចាន់ដា ប្រធានកិត្តិយសសាខាសមាគមនារី ដើម្បី សន្តិភាព និងអភិវឌ្ឍ ខេត្តកំពង់ចាម អមដំណើរ ដោយថ្នាក់ដឹកនាំ មន្ត្រីរាជការ នៃមន្ទីរ អង្គភាព ក្នុងខេត្ត បាននាំយកបច្ច័យ និងទេយ្យទានអង្គត្រៃ ទៅវេរប្រគេនព្រះសង្ឃ គង់ចាំព្រះវស្សាអស់កាលត្រីមាស នៅវត្តខែលជ័យ ស្ថិតនៅឃុំអូរស្វាយ ស្រុកកំពង់សៀម ខេត្តកំពង់ចាម ។
នាឱកាសនោះ ឯកឧត្ដម លន់ លឹមថៃ និងលោកជំទាវ បាននាំនូវគ្រឿងអង្គត្រៃ ១សម្រាប់ និងបច្ច័យ ៥០០ដុល្លារ លោកជំទាវ ញូង ចរិយា អ៊ុន ចាន់ដា ព្រមទាំង សហការីអមដំណើរ មានត្រៃអង្គធំ និងបច្ច័យ សរុបចំនួន ១លាន ៣សែនរៀល ដើម្បី វេរប្រគេនព្រះសង្ឃ ទៅតាមកិច្ចសាសនា ផងដែរ ។
សូមបញ្ជាក់ថា ព្រះសង្ឃ គណៈកម្មការអាចារ្យ និងប្រជាពុទ្ធបរិស័ទ ចំណុះជើងវត្ត បានផ្ដើមកឋិនសាមគ្គីមួយ ដង្ហែរចូលវត្តខែលជ័យ ដើម្បី ប្រមូលបច្ច័យកសាងសមិទ្ធផលបន្ត ដែលជាផ្នែកមួយបានចូលរួមចំណែក លើកកម្ពស់ដល់វិស័យព្រះសាសនា ដែលជាសាសនារបស់រដ្ឋ ឲ្យរីកចម្រើនថ្កុំថ្កើងរុងរឿង តទៅអនាគត ។
គួររំលឹកថា បុណ្យកឋិនទាន ជាបុណ្យប្រពៃណីជាតិខ្មែរ ក្នុងចំណោមបុណ្យជាច្រើនទៀត ដែលពុទ្ធសាសនិកខ្មែរយើង តែងតែប្រារព្ធធ្វើឡើង ក្នុងរយៈពេល ២៩ថ្ងៃ ចាប់ពីថ្ងៃទី ០១រោច ខែអស្សុជ រហូត ដល់ថ្ងៃទី ១៥កើត ខែកក្ដឹក រៀងរាល់ៗឆ្នាំ ដោយវត្តនីមួយៗ ទទួលបានអង្គកឋិនដង្ហែរចូល បានតែម្តង ប៉ុណ្ណោះ ។ ក្នុងនោះដែរ វត្តអារាមនានា ត្រូវតែមានការដង្ហែរអង្គកឋិនចូល ដោយពុំមានការខកខានឡើយ ។ ទន្ទឹមនឹងនោះ បើទោះបីជា មិនមានការដង្ហែរមកពីមជ្ឈដ្ឋានខាងក្រៅ យ៉ាងណាក៏ដោយ ក៏គណៈកម្មាការ អាចារ្យវត្ត រួមជាមួយបរិស័ទ ចំណុះជើងវត្ត នាំគ្នីគ្នា រៀបចំជាអង្គកឋិនសាមគ្គី ដើម្បី ដង្ហែរទៅប្រគេនព្រះសង្ឃ នៅក្នុងវត្តរបស់ខ្លួន ផងដែរ ៕