នួន សត្យា
(កំពង់ចាម)៖ មន្ត្រីរាជការរបស់រដ្ឋបាលស្រុកចំការលើនៅថ្ងៃទី ១៩ ខែកក្កដា ឆ្នាំ ២០២១នេះ ដឹកនាំដោយលោក សំ ពិសិដ្ឋ អភិបាលនៃគណៈអភិបាលស្រុកចំការលើ យកសំណាកលើកទី២ បានរកឃើញវិជ្ជមានកូវីត១៩ ១នាក់ ជាអ្នកអនាម័យ ។
បើតាមអភិបាលស្រុកចំការលើ លោក សំ ពិសិដ្ឋ បានឲ្យដឹងថា លោក រួមនឹងលោក កុយ សាវុធ ប្រធានក្រុមប្រឹក្សាស្រុក បានដឹកនាំ លោក លោកស្រី សមាជិកក្រុមប្រឹក្សាស្រុក មន្ត្រីរាជការនៃរដ្ឋបាលសាលាស្រុក កងកម្លាំងទាំងបី អ្នកអនាម័យ ធ្វើតេស្តរហ័សលើកទី២ (Rapit Test II) ចំនួន១២៦នាក់ ក្នុងនោះមានករណីវិជ្ជមាន ០១នាក់ ឈ្មោះ អ៊ុយ ណារាម ភេទស្រី (អ្នកអនាម័យនៅសាលាស្រុក) ។
លោកអភិបាលស្រុកបន្តថា ក្រោយពីបានតេស្តរហ័សដឹងថា មានករណីវិជ្ជមាន ០១នាក់ ក្រុមមន្ត្រីជំនាញសុខាភិបាលស្រុកចំការលើ បានបញ្ជូនទៅមន្ទីរពេទ្យខេត្តកំពង់ចាម ដើម្បីព្យាបាល ហើយក្រុមមន្ត្រីជំនាញសុខាភិបាល កំពុងស្រាវជ្រាវអ្នកដែលបានប៉ះពាល់ផ្ទាល់ និងប្រយោលបន្តទៀត។
