នួន សត្យា
(កំពង់ចាម)៖ ក្រុមសហភាពសហព័ន្ធយុវជនកម្ពុជាខេត្តកំពង់ចាម នៅថ្ងៃទី២០ ខែកញ្ញា ឆ្នាំ២០២១ បានចូលរួមបំពេញការងារបម្រើផលប្រយោជន៍សង្គម ជាមួយអាជ្ញាធរស្រុកចំនួន ៥ ស្រុក ក្នុងភូមិសាស្ត្រខេត្តកំពង់ចាម ។
ឯកឧត្តម ហាន កុសល អភិបាលរងខេត្តកំពង់ចាម និងជាប្រធានសហភាពសហព័ន្ធយុវជនកម្ពុជាខេត្ត បានមានប្រសាសន៍ឲ្យដឹងថា ស.ស.យ.ក ស្រុកស្ទឹងត្រង់ បានមកចូលរួមជាមួយគណៈអភិបាលស្រុក ក្នុងពិធីបើកបវេសនកាលនៅវិទ្យាល័យសម្តេចតេជោ ហ៊ុនសែន មេសរជ្រៃ ដែលមានចំនួន ២៥ថ្នាក់ មានសិស្សានុសិស្សសរុបចំនួន ៣៧៥នាក់ ។
ចំណែក ស.ស.យ.ក ស្រុកចំការលើ បានចូលរួមជាមួយក្រុមការងារស្រុក ការិយាល័យអប់រំ នាយក លោកគ្រូ អ្នកគ្រូ ក្រុមប្រឹក្សាឃុំ ចុះពិនិត្យការស្តាប្រឡាយចាស់នៅផ្នែកខាងក្រោយនៃទីធ្លា សាលាបឋមសិក្សាស្ពឺ(ក) ស្ថិតនៅភូមិស្ពឺ (ក) ឃុំជយោ ស្រុកចំការលើ ដើម្បីរំដោះទឹកកុំឲ្យលិចក្នុងទីធ្លាសាលា និងក្នុងការត្រៀមបើកសាលាបឋមសិក្សាឡើងវិញ នាពេលខាងមុខ ជួយសម្រួលដល់សិស្សានុសិស្ស មកសិក្សារៀនសូត្រ ឲ្យបានល្អប្រសើរ។
ដោយឡែក ស.ស.យ.ក ស្រុកព្រៃឈរ បានចូលរួមជួយសម្របសម្រួល និងរៀបចំសណ្តាប់ធ្នាប់ជូនដល់កុមារ អាយុចាប់ពី ៦ឆ្នាំ ដល់ អាយុក្រោម ១២ឆ្នាំដែលមកចាក់វ៉ាក់សាំងការពារកូវីដ-១៩ ដូសទី១ ទាំង ០៣ទីតាំងក្នុងស្រុកព្រៃឈរ ខេត្តកំពង់ចាម។ ក្នុងនោះ លោក វ៉ាន់ វណ្ណា ដែលជាសមាជិកក្រុមប្រឹក្សាស្រុកព្រៃឈរ និងភរិយា ព្រមទាំងបុត្រ បានឧបត្ថម្ភទឹកសុទ្ធវីតាល់ ០៤កេស នៅទីតាំងចាក់វ៉ាក់សាំង មណ្ឌលសុខភាពគរ ឃុំគរ។
និងក្រុម ស.ស.យ.ក. ស្រុកជើងព្រៃ ឯណោះវិញ បានសហការជាមួយការិយាល័យសុខាភិបាលស្រុកប្រតិបត្តិជើងព្រៃ ក្នុងការអនុវត្តវិធានការ ៣ការពារ និង៣កុំ និងការចាក់វ៉ាក់សាំងការពារជំងឺកូវីដ-១៩ ជូនកុមារ ដែលមានអាយុពី ៦ ដល់ក្រោម ១២ឆ្នាំ ក្នុងស្រុកជើងព្រៃ ខេត្តកំពង់ចាម នៅមណ្ឌលដូនដុំ ឃុំសូទិប។
ចំពោះ ស.ស.យ.ក ស្រុកស្រីសន្ធរ បានបន្តចូលរួមការងារចាក់វ៉ាក់សាំងជូន កុមារអាយុពី ៦ឆ្នាំ រហូតដល់ក្រោមអាយុ ១២ឆ្នាំ (ដូសទី១) នៅមណ្ឌលចាក់វ៉ាក់សាំងទាំង៣ គឺបានចំនួន ១០៥១នាក់ ស្រី ៥២៥នាក់ ។
- ការងារចាក់វ៉ាក់សាំងជូន កុមារនិងយុវវ័យអាយុពី១២ ឆ្នាំរហូតដល់ក្រោមអាយុ ១៨ឆ្នាំ(ដូសទី១) នៅមន្ទីពេទ្យបង្អែកស្រុក ដែលបានមកចាក់វ៉ាក់សាំងបានចំនួន ១៥នាក់ ស្រី ០៤នាក់ និងបន្ត សហការជាមួយនឹង ក្រុមគ្រូពេទ្យ ចាក់វ៉ាក់សាំងការពារជំងឺកូវីដ-១៩ (ដូសទី១) ជូនប្រជាពលរដ្ឋទូទាំងស្រុក បានចំនួន ២១នាក់ ស្រី០៨នាក់ ។ ហើយ បន្តសហការជាមួយនឹង ក្រុមគ្រូពេទ្យ ចាក់វ៉ាក់សាំងការពារជំងឺកូវីដ១៩ (ដូសទី២) ជូនប្រជាពលរដ្ឋទូទាំងស្រុក បានចំនួន ២៨នាក់ ស្រី១៣នាក់ និងការងារចាក់វ៉ាក់សាំងជូន កុមារ និងយុវវ័យអាយុពី១២ ឆ្នាំរហូតដល់ក្រោមអាយុ ១៨ឆ្នាំ(ដូសទី២) សរុបមណ្ឌលចាក់ទាំងបីក្នុងស្រុក ចំនួន ៣១នាក់ ស្រី១៨នាក់។
