ឯកឧត្ដម អ៊ុន ចាន់​ដា បើក​ការដ្ឋាន​ស្ថាបនា​ផ្លូវ ក្រាល​កៅស៊ូ​ប្រភេទ DBST ១​ខ្សែ នៅ​សង្កាត់​សំបួរមាស និង​ស្រុក​កំពង់សៀម ​និង​សម្ពោធ​ដាក់​ឲ្យ​ប្រើប្រាស់​ផ្លូវ​ក្រាល​កៅស៊ូ​ប្រភេទ AC ៥​ខ្សែ ស្ថិតនៅក្នុង​ក្រុង​កំពង់ចាម​

អត្ថបទ៖ ចិន សារ៉ាត

នា​ព្រឹក​ថ្ងៃទី​២២ ខែមករា ឆ្នាំ​២០២១ នេះ ឯកឧត្ដម អ៊ុន ចាន់​ដា អភិបាល នៃ​គណៈ​អភិបាល ខេត្តកំពង់ចាម អមដំណើរ​ដោយ ឯកឧត្ដម លោកជំទាវ អភិបាលរង​ខេត្ត និង​ថ្នាក់ដឹកនាំ​មន្ទីរ អង្គភាព ជុំវិញ​ខេត្ត និង​អាជ្ញាធរ​មូលដ្ឋាន បាន​អញ្ជើញ​បើក​ការដ្ឋាន​ស្ថាបនា​ផ្លូវ ក្រាល​កៅស៊ូ​ពីរ​ជាន់​ប្រភេទ DBST ០១​ខ្សែ មាន​ប្រវែង ៦.៥៥០​ម៉ែត្រ ភូមិ​បឹង​ស្នាយ សង្កាត់​សំបួរមាស ក្រុង​កំពង់ចាម ដល់​ភូមិ​អូរ​ឈ្លើង ឃុំ​កោះ​រការ ស្រុក​កំពង់សៀម និង​សម្ពោធ​ដាក់​ឲ្យ​ប្រើប្រាស់​ជា​ផ្លូវការ ផ្លូវ​ក្រាល​កៅស៊ូ​ប្រភេទ AC ចំនួន ៥​ខ្សែ ប្រវែង ៥.២៥៥​ម៉ែត្រ ក្នុង​ក្រុង​កំពង់ចាម ។

នាឱកាស​នោះ ឯកឧត្ដម អ៊ុន ចាន់​ដា អភិបាល ខេត្តកំពង់ចាម បាន​ថ្លែងថា ផ្លូវ​ដែល​បើក​ការដ្ឋាន​ស្ថាបនា គឺជា​ផ្លូវ​ក្រាល​កៅស៊ូ​ពីរ​ជាន់ ប្រភេទ​DBST មាន​ប្រវែង​៦.៥៥០​ម៉ែត្រ គុណ​នឹង​ទទឹង ៧​ម៉ែត្រ និង​លូ​ជ្រុង​ទោល ប្រវែង ៩​ម៉ែត្រ ចំនួន ២​កន្លែង ចាប់ពី​ចំណុច​ខាងមុខ​សាលាបឋមសិក្សា​បឹង​បាសាក់ ភូមិ​បឹង​ស្នាយ សង្កាត់​សំបួរមាស ក្រុង​កំពង់ចាម ឆ្ពោះទៅ​ផ្លូវ​ខេត្ត លេខ ២៧០ ត្រង់ចំណុច​ភូមិ​អូរ​ឈ្លើង ឃុំ​កោះ​រការ ស្រុក​កំពង់សៀម ។ ដោយឡែក គម្រោង​ផ្លូវ​ដែល​សាងសង់​រួចរាល់​ជា​ស្ថាពរ ហើយនឹង​ត្រូវ​សម្ពោធ​ដាក់​ឲ្យ​ប្រើប្រាស់​ជា​ផ្លូវការ នាពេល​នេះដែរ គឺមាន​ចំនួន ០៦​ខ្សែ គឺ ៖ ១.​ផ្លូវ​អ៊ុត​កៅស៊ូ ប្រភេទ AC ប្រវែង ៥១២​ម៉ែត្រ ទទឹង ៨​ម៉ែត្រ ចាប់ពី​ស្តុ​ប​លំហែរ ផ្លូវ​លេខ​៧ ថ្មី ភូមិ​បឹង​ស្នាយ សង្កាត់​សំបួរមាស ទល់​ផ្លូវ​លេខ​៧ ចាស់​មុខ​សាលា​កសិកម្ម ភូមិ​ទី​៦ សង្កាត់​វាលវង់ ក្រុង​កំពង់ចាម ។ ២.​ផ្លូវ​អ៊ុត​កៅស៊ូ​ប្រភេទ AC ប្រវែង ៧៧១​ម៉ែត្រ ទទឹង ៨​ម៉ែត្រ ចាប់​ផ្លូវភ្លោះ​ព្រះបាទ​មុនី​វង្ស ភូមិ​ទី​៤ សង្កាត់​វាលវង់ ទល់​ផ្លូវ​លេខ​៨៥ ភូមិ​ទី​៦ សង្កាត់​វាលវង់ ក្រុង​កំពង់ចាម ។ ៣.​ផ្លូវ​ក្រាល​កៅស៊ូ​ប្រភេទ AC ប្រវែង ៨៤០​ម៉ែត្រ ទទឹង ៨​ម៉ែត្រ វិថី​កម្ពុជា​ក្រោម (​ចាប់ពី​រង្វង់​មូល ១-៧៩ ដល់​ផ្សា​របឹង​កុក​) ភូមិ​ទី​១៣ សង្កាត់​បឹង​កុក ។ ៤.​ផ្លូវ​អ៊ុត​កៅស៊ូ ប្រភេទ AC ប្រវែង ១.៥៦២​ម៉ែត្រ ទទឹង ១០​ម៉ែត្រ ចាប់ពី​កែង​រង្វង់​មូល ១-៧៩ ភូមិ​ទី​៦ សង្កាត់​វាលវង់ ទល់​ផ្លូវ​ព្រះបាទ​មុនី​វង្ស ភូមិ​ទី​៤ សង្កាត់​វាលវង់ ក្រុង​កំពង់ចាម ។

៥.​ផ្លូវ​អ៊ុត​កៅស៊ូ​ប្រភេទ AC ប្រវែង ១.៥៧០​ម៉ែត្រ ទទឹង ៨​ម៉ែត្រ ចិញ្ចើមផ្លូវ​សងខាង ប្រវែង ៣.១៤០​ម៉ែត្រ ចាប់ពីរ​ង្វ​ល់​មូល​នាង​គ​ង្ហី​ង ដល់​ស្ពាន​ព្រែក​ដើម​ចាន់ ស្ថិតនៅ​សង្កាត់​សំបួរមាស ក្រុង​កំពង់ចាម ។ និង​៦.​ផ្លូវ​ក្រាល​កៅស៊ូ ពីរ​ជាន់​ប្រភេទ​DBST ប្រវែង ២.៨៥០​ម៉ែត្រ ទទឹង ៧​ម៉ែត្រ ស្ថិតនៅ​ភូមិ​ប្រ​សំ និង​ភូមិ​វាល​ខ្សាច់ ឃុំ​រអាង ស្រុក​កំពង់សៀម ។

ឯកឧត្ដម​អភិបាលខេត្ត បញ្ជាក់ដែរថា ផ្លូវ​ដែល​យើង​ត្រូវ​បើក​ដ្ឋា​ន​ស្ថាបនា នាពេលនេះ គឺជា​ផ្លូវ​ដែល​យើងទាំងអស់គ្នា បាន​រង់ចាំ​ជា​យូរ​មកហើយ និង​ក៏ដូចជា​ច​ត្ខុ​វិស័យ របស់​អតីត​អភិបាលខេត្ត​កំពង់ចាម ក្នុងការ​ផ្ដោត​ការយកចិត្តទុកដាក់ ជម្រុញ​ធ្វើ​ឲ្យ​សមិទ្ធផល​ក្នុង​សង្កាត់​សំបួរមាស មានការ​អភិវឌ្ឍ​រីកចំរើន ដូចគ្នា ទៅនឹង​សង្កាត់ ៣​ផ្សេងទៀត របស់​ក្រុង​កំពង់ចាម ផងដែរ ។ ដោយឡែក គម្រោង​ផ្លូវ​ទាំង ០៦​ខ្សែ ដែល​ត្រូវ​សម្ពោធ​ដាក់​ឲ្យ​ប្រើប្រាស់ នាពេលនេះ មាន​ផ្លូវ​ពីរ​ប្រភេទ គឺ ៖ ជា​ប្រភេទ​កៅស៊ូ DBST មាន ១​ខ្សែ និង​ប្រភេទ​កៅស៊ូ AC ចំនួន ០៥​ខ្សែ ។ ឯកឧត្ដម បន្តថា គម្រោង​ផ្លូវ​អ៊ុត​កៅស៊ូ AC ទាំង ០៥​ខ្សែ នេះ ដំបូង​ឡើយ គឺជា​ប្រភេទ​ផ្លូវ DBST ក៏ប៉ុន្តែ ដោយសារ ការរង​ការខូចខាត ជាពិសេស ភាព​ទ្រុឌទ្រោម នៃ​ផ្លូវ ដោយសារ​អាយុ​កាលនោះ ទើប​រដ្ឋបាល​ខេត្តកំពង់ចាម សម្រេច​អ៊ុត​កៅស៊ូ​ពីលើ ២​ជាន់ ទុក​សម្រាប់​ប្រជាពលរដ្ឋ​ប្រើប្រាស់​បានយូរ​អង្វែង ។​

ស្ថិត​ក្នុងឱកាស​នោះដែរ ឯកឧត្ដម ក៏បាន​សូម​ការយោគយល់​អធ្យាស្រ័យ ចំពោះ សំណង់​តាម​ដងផ្លូវ​មួយចំនួន មានការ​ប៉ះពាល់ ពីព្រោះថា នៅពេល​ក្រុមការងារ​ចុះ​អនុវត្ត នឹងត្រូវ​ធ្វើការ​ពង្រីក ដែល​ទាមទារ​ឲ្យ​រួមគ្នា​ដោះស្រាយ ដើម្បី យើង​ទទួលបាន​ផ្លូវ​ស្អាត ត្រូវ​តាម​ស្តង់ដារ​បច្ចេកទេស ។ ដោយឡែក ចំពោះមុខ យើង​ចលនា​គ្នា ជាពិសេស នៅពេល​ផ្លូវ​ស្ថាបនា រួចរាល់​នោះ សូម​ឲ្យ​ប្រជាពលរដ្ឋ​ទាំងអស់​ចូលរួម ដាំ​ដើមឈើ និង​ដាក់​អំពូល​បំភ្លឺ ពោលគឺ ផ្ទះមួយ​ដាំ​ដើមឈើ ១​ដើម ឬក៏​ផ្ទះមួយ អំពូល​សូ​សឡា ១​ដើម ដើម្បី ឲ្យ​ភូមិ សង្កាត់​របស់​យើង ក្លាយទៅជា​ភូមិ សង្កាត់​ស្រស់ស្អាត មាន​សោ​ភណ្ឌ​ភាពល្អ និង​ផាសុខភាព សម្រាប់​ប្រជាពលរដ្ឋ​យើង​គ្រប់ៗ​គ្នា ផងដែរ ៕