(កំពង់ចាម)៖ នៅព្រឹកសៅរ៍ទី២៣ ខែមេសា ឆ្នាំ២០២២ ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា និងជាប្រធានក្រុមការងារថ្នាក់ជាតិ ចុះជួយស្រុកកងមាស ឯកឧត្តម ឆាយ វណ្ណា សមាជិកព្រឹទ្ធសភាជាតិ និងប្រធានផ្នែកវប្បធម៌ និងសាសនានៃយុវជនគណៈបក្សថ្នាក់កណ្ដាលរបស់គណបក្សប្រជាជនកម្ពុជា និង ឯកឧត្តម យូ ស៊ីនឡុង រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានក្រុមការងារចុះជួយស្រុកកងមាស បានអញ្ជើញចុះសួរសុខទុក្ខប្រជាពលរដ្ឋ និងចែកអាហារស្រាយបួសជូនប្រជាពលរដ្ឋក្រីក្រ ចំនួន៥០០គ្រួសារ មកពី ៣ភូមិ ស្ថិតនៅក្នុងស្រុកកងមាស ខេត្តកំពង់ចាម ។កម្មវិធីនេះមានការចូលរួមពីសំណាក់ លោក តហើរ អ៊ូមើរ ប្រធានសមាគមប្រភពល្អកម្ពុជា និងថ្នាក់ដឹកនាំសមាគម អភិបាលស្រុកកងមាស សមាជិកក្រុមប្រឹក្សាស្រុក និងឃុំ មន្ត្រីរាជការ អាជ្ញាធរមូលដ្ឋាន និងបងប្អូនប្រជាពលរដ្ឋផងដែរ ។
លោក តហើរ អ៊ូមើរ ប្រធានសមាគមប្រភពល្អកម្ពុជា បានឲ្យដឹងថា សកម្មភាពកន្លងមក របស់សមាគម ក្រោមការដឹកនាំ ឯកឧត្តម សុះ មូហាំម៉ាត់ ជាអតីតប្រធានសមាគមប្រភពល្អកម្ពុជា ចាប់បដិសន្ធិឡើង ពីឆ្នាំ១៩៩៣ ដល់ឆ្នាំ១៩៩៩ និងឆ្នាំ២០២០ ដល់២០២១ បានសាងសង់មជ្ឈមណ្ឌលអប់រំ ឬសាលារៀនចាប់ ពី កម្រិតបឋមសិក្សារហូតដល់វិទ្យាល័យមានអន្តេវាសិកដ្ឋាន កំពុងដំណើរការ បានចំនួន៣២កន្លែងទូទាំងប្រទេស។សមាគមបានកំពុងរៀបចំកញ្ចប់អាហារស្រាយបួសផ្ទាល់ ជាមួយសប្បុរសជនគួវែតទូទាំងប្រទេសសម្រាប់ឆ្នាំ២០២២ មានចំនួន៧,៩៨៧កញ្ចប់ និងកំពុងរៀបចំកញ្ចប់អាហារស្រាយបួសជាមួយស្ថានទូគូវែត ៥៥០កញ្ចប់។ មានប្រសាសន៍សំណេះសំណាលនាឳកាសនោះ ឯកឧត្តមបណ្ឌិតសភាចារ្យ ហង់ ជួនណារ៉ុន បានលើកឡើងថា ដោយសារប្រទេសមានសុខសន្តិភាពក្រោមការដឹកនាំពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ទើបយើងទាំងអស់គ្នាមាន ការអភិវឌ្ឍន៍ទៅមុខ លើគ្រប់វិស័យ ដោយអង្គការ និងសមាគមនានា ជាដៃគូសហការគ្នា ក្នុងការអភិវឌ្ឍសហគមយើងអោយរួចផុតពីភាពក្រីក្រទៅកាន់ភាពរីកចម្រើនតទៅមុខ។
ឯកឧត្តម បានបន្តថា សាសនិកឥស្លាម មានឳកាសច្រើន ក្នុងការបម្រើការងារក្នុងជួររាជរដ្ឋាភិបាលមានដូចជាទេសរដ្ឋមន្ដ្រីអមនាយករដ្ឋមន្ត្រី រដ្ឋលេខាធិការ អនុរដ្ឋលេខាធិការ មានគ្រូបង្រៀន ១៥០០នាក់ ក្នុងក្របខណ្ឌរដ្ឋគ្រួបង្រៀនរដ្ឋដែលសម្ដេចតេជោនាយករដ្ឋមន្ត្រី បានអោយសាសនិកឥស្លាម ពិសេស នាពេលថ្មីៗនេះសម្ដេចបានផ្ដល់អោយសាសនិកឥស្លាម អាចជាអភិបាលរងខេត្ត អភិបាលរងក្រុងស្រុក បើសិនជាខេត្ត ឬស្រុកនោះមានសាសនិកឥស្លាមរស់នៅច្រើន ។
ឯកឧត្តម បានលើកឡើងថា សាសនិកឥស្លាមថ្ងៃការបួសក្នុងខែ រ៉ម៉ាឌនក្នុងការគោរព ប្រតិបត្តិតាមធម៌ឥស្លាមធ្វើអុីហ្ពាទត់ ទៅចំពោះអល់ឡោះទៅតាម ធម៌សាសនាឥស្លាមអោយបានច្រើន។ការបូសតមអាហារនេះទៀតគឺជាការជួយអោយដឹងពីសុខទុក្ខលំបាករបស់បងប្អូនដែលគាត់ក្រលំបាកអត់មានម្ហូបអាហារគ្រប់គ្រាន់។ឯកឧត្តមរដ្ឋមន្ត្រី បានផ្ដាំផ្ញើដល់បងប្អូនប្រជាពលរដ្ឋអោយនៅតែបន្តអនុវត្តន៍ ៣កុំនិង៣ការពារ តាមវីធានការរបស់ក្រសួងសុខាភិបាល ព្រមទាំងថ្នាក់ដឹកនាំ គ្រប់លំដាប់ថ្នាក់ និងនៅតែបន្តការគាំទ្ររាជរដ្ឋាភិបាលដែលមានការដឹកនាំពីសម្ដេចតេជោនាយករដ្ឋមន្ត្រី នៃព្រះរាជាណាចក្រកម្ពុជា ។
បន្ទាប់មក ឯកឧត្តមរដ្ឋមន្ត្រី និងក្រុមការងារ បានធ្វើការចែកអំណោយអាហារស្រាយបួស ជូនដល់ប្រជាពលរដ្ឋក្រីក្រទាំងអស់ សម្រាប់ផ្គត់ផ្គង់ស្បៀងអាហារបួស និងស្រាយបួសដល់គ្រួសារទាំង ៥០០គ្រួសារ ដែលកញ្ចប់អាហារស្រាយ បួសទាំងនោះរួមមានអង្ករ ២៥គីឡូក្រាម ទឹកដោះគោ ២កំប៉ុងប្រេងឆាមួយដបមួយលីត្រ ទឹកត្រី ១ដប អំបិល ១គីឡូក្រាម ស្ករសរ ២គីឡូក្រាម ល្មើ ១កញ្ចប់៕
