អត្ថបទ៖ ចិន សារ៉ាត
ឯកឧត្ដម ឡូយ សុផាត សមាជិកគណៈកម្មាធិការអចិន្ត្រៃយ៍ នៃរដ្ឋសភា និងជាប្រធានគណៈកម្មការទី ៣ នៃរដ្ឋសភា នាព្រឹកថ្ងៃទី២៣ ខែសីហា ឆ្នាំ២០២០នេះ បានដឹកនាំប្រតិភូ សិក្សាស្វែងយល់អំពីវិស័យកសិកម្ម នៅក្រុមហ៊ុន ឡុង ស្រេង International ស្ថិតនៅឃុំព្រែកកក់ ស្រុកស្ទឹងត្រង់ ខេត្តកំពង់ចាម ។
រួមដំណើរក្នុងឱកាសនោះមានឯកឧត្តមលន់ លឹមថៃ លេខាគណៈកម្មការទី ៣នៃរដ្ឋសភា លោកជំទាវ ខុងស៊ុន អេង លោកជំទាវ ស្រីគឹម ឆយ លោកជំទាវ កុល ធារិន អ្នកតំណាងរាស្ត្រមណ្ឌលកំពង់ចាមនិងឯកឧត្តមកៅសុខអាន អភិបាលរងខេត្តព្រមទាំងថ្នាក់ដឹកនាំមន្ទីរជំនាញពាក់ពន្ធ័ និងអាជ្ញាធរមូលដ្ឋានផងដែរ។
លោកឧកញ៉ា ហេង ឡុង ប្រធានក្រុមហ៊ុន ឡុង ស្រេង International បានឲ្យដឹងថា ដើម្បី រួមចំណែក ជាមួយរាជរដ្ឋាភិបាល ក្នុងការលើកស្ទួយវិស័យកសិកម្ម នៅកម្ពុជា បច្ចុប្បន្ននេះ ក្រុមហ៊ុនកំពុងធ្វើការដាំដុះនូវដំណាំផ្សេងៗ ដែលជារួមមាន ៖ ១.ចេកអំបូងលឿង លើផ្ទៃដីប្រមាណជា ១.៨០០ហ.ត ហើយបាននឹងកំពុងពង្រីកការដាំដុះ ជាបន្តបន្ទាប់ទៀត ។ ២.ខ្នុរការ៉ុត លើផ្ទៃដីប្រមាណជា ១២៥ហ.ត ។ ៣.តាង៉ែត លើផ្ទៃដីប្រមាណជា ២៤០ហ.ត ។ ៤.ក្រូចថ្លុង លើផ្ទៃដីប្រមាណជា ១៨០ហ.ត និង ៥.ធុរេន លើផ្ទៃដីប្រមាណជា ១៨០ហ.ត ។ ក្រៅពីផ្ទៃដីដាំដំណាំទាំងនេះ គឺជាផ្ទៃដី សម្រាប់ដំណាំកៅស៊ូ ។ លោកឧកញ៉ា ហេង ឡុង បានអោយដឹងទៀតថា ក្រុមហ៊ុន បានប្រើប្រាស់អ្នកជំនាញការ កម្មករខ្មែរ និងបរទេស ប្រមាណជិត ១ម៉ឺននាក់ ដើម្បី ថែទាំដាំណាំ ទាំងអស់នេះ ។ ក្រៅពីនោះ ដើម្បី សម្រួលដល់ការដាំដុះដាំណាំទាំងអស់នេះ ក្រុមហ៊ុន ក៏បានរៀបចំនូវប្រព័ន្ធស្រោចស្រព រួមជាមួយនឹងការរៀបចំនូវថ្នាលបណ្ដុះពូជ ទីកន្លែងផលិតជីបែបធម្មជាតិ និងឃ្លាំងសម្រាប់ស្តុកកសិផល ដើម្បី ត្រៀមយកទៅកាន់ទីផ្សារ ។
នាឱកាសនោះ ឯកឧត្ដម ឡូយ សុផាត សមាជិកគណៈកម្មាធិការអចិន្ត្រៃយ៍ នៃរដ្ឋសភា ក៏បានថ្លែងថ្លែងនូវការកោតសរសើរ ចំពោះ លោកឧកញ៉ា ហេង ឡុង ម្ចាស់ក្រុមហ៊ុន ឡុង ស្រេង International ដែលបានចូលរួមចំណែក ជាមួយរាជរដ្ឋាភិបាល ក្នុងការលើកស្ទួយវិស័យកសិកម្ម នៅកម្ពុជា ។
ឯកឧត្ដមប្រធានប្រតិភូ មានប្រសាសន៍បញ្ជាក់ថា ដោយផ្អែកតាមស្ថានភាព នាបច្ចុប្បន្ន ជាពិសេស ការរីករាលដាល នៃជម្ងឺកូវីដ ១៩ នៅក្នុងពិភពលោក ក៏ដូចជា ប្រទេសយើង ផងដែរ រាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី បានជម្រុញប្រជាកសិករយើង ឲ្យងាគមកបង្កើនការដាំដុះដំណាំកសិកម្មវិញ ។ឯកឧត្ដម ក៏បានកោតសរសើរ ចំពោះ ការប្រើប្រាស់នូវគំនិតច្នៃប្រឌិតខ្ពស់ របស់លោកឧកញ៉ា ហេង ឡុង ក្នុងការដាំដុះនូវប្រភេទដំណាំទាំងនេះឡើង ដែលជាការចូលរួមចំណែក ដើរឲ្យទាន់សភាពការវិវឌ្ឍន៍ នៃទីផ្សារសកលលោក ។ យ៉ាងណាម៉ិញ ឆ្លងតាមការចុះសិក្សាជាក់ស្ដែង ទៅលើប្រភេទដំណាំទាំងអស់នោះ ក្រៅអំពីអត្ថប្រយោជន៍សន្ធឹកសន្ធាប់ របស់ក្រុមហ៊ុនខ្លួនឯងផ្ទាល់ ក្រុមហ៊ុន ឡុង ស្រង ក៏បានជួយផ្ដល់នូវការងារ សម្រាប់កម្មរនៅក្នុងស្រុក ប្រមាណជិត ១ម៉ឺននាក់ ។
ស្ថិតក្នុងឱកាសនោះដែរ ឯកឧត្ដមប្រធានប្រតិភូ ក៏បានលើកទឹកចិត្ត និងផ្ដល់ការជម្រុញ ទៅដល់ក្រុមហ៊ុន ឡុង ស្រេង ឲ្យធ្វើការអភិវឌ្ឍន៍បន្ថែមទៀត ទាំងផ្នែកហេដ្ឋារចនាសម្ព័ន្ធ ដូចជា ៖ ផ្លូវ កន្លែងស្នាក់នៅសម្រាប់ភ្ញៀវ ដើម្បី ប្រែក្លាយតំបន់នេះ ទៅជាតំបន់កសិទេសចរណ៍ នាពេលអនាគត ពីព្រោះថា ផ្អែកតាមស្ថានភាពបច្ចុប្បន្ន ក្រុមហ៊ុនមានសក្ដានុពលយ៉ាងច្រើនសន្ធឹកសន្ធាប់ រួចជាស្រេចទៅហើយ ។
សូមបញ្ជាក់ថា នាឱកាសនោះ ឯកឧត្ដមប្រធានប្រតិភូ រួមជាមួយសហការី ជាគណៈប្រតិភូអមដំណើរ ក៏បានអញ្ជើញ ចុះទៅសិក្សាផ្ទាល់ នៃដីចំការដំណាំនីមួយៗ មានដូច ៖ ចំការខ្នុរ ចេក ធុរេន ក្រូច និងចំការតាង៉ែន រួមជាមួយនឹងដំណាំរួមផ្សំផ្សេងៗទៀត ជាពិសេស ការសិក្សាស្វែងយល់លើបច្ចេកទេស នៃការផលិតជីតាមបែបធម្មជាតិ និងថ្នាលបណ្ដុះពូជចេកអំបូងលឿង ក៏ដូចជា សកម្មភាព នៃការដាំដុះ របស់បងប្អូនកម្មករ នៅលើផ្ទៃដីចំការ ដែលក្រុមហ៊ុនកំពុងធ្វើការពង្រីកបន្ថែមទៀត ផងដែរ។