អត្ថបទ៖ ចិន សារ៉ាត
អនុវត្តទៅតាមការណែនាំ របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងក្រសួងសុខាភិបាល នាព្រឹកថ្ងៃទី២៦ ខែមីនា ឆ្នាំ២០២០ នេះ គណៈកម្មការប្រឆាំងជំងឺកូវីត-១៩ ខេត្តកំពង់ចាម ក្រោមដឹកនាំដោយ ឯកឧត្ដម អ៊ុន ចាន់ដា ប្រធានគណៈកម្មការប្រឆាំងជំងឺ កូវីដ១៩ ខេត្តកំពង់ចាម បានអញ្ជើញ និងចាត់ឲ្យឯកឧត្ដម លោកជំទាវ ជាអភិបាលរងខេត្ត ដើម្បី ចុះបើកយុទ្ធនាការចុះផ្សព្វផ្សាយ ដល់ប្រជាពលរដ្ឋ ស្ដីពីការបង្ការទប់ស្កាត់ ការរីករាលដាលមេរោគកូវីដ១៩ នៅតាមរដ្ឋបាល ក្រុង/ស្រុក ទាំង ១០ នៃខេត្តកំពង់ចាម ។
សូមបញ្ជាក់ផងដែរថា មកដល់ថ្ងៃទី២៦ ខែមីនា ឆ្នាំ២០២០នេះ អាជ្ញាធរខេត្តកំពង់ចាម រួមនិងកម្លាំងសមត្ថកិច្ចជំនាញ តាមបណ្ដាក្រុង-ស្រុកនីមួយៗ បាននឹងកំពុងបន្តសកម្មភាពផ្សព្វផ្សាយសារអប់រំ ស្តីពីវិធានការបន្ទាន់បង្ការ ជំងឺ COVID-19 នៅតាមខ្នងផ្ទះ និងតាមដងផ្លូវទីចុងកាត់មាត់ញក យ៉ាងសកម្មបំផុត ក្នុងគោលបំណងធ្វើយ៉ាងណា ឲ្យប្រជាពលរដ្ឋបានជ្រួតជ្រាប និងចូលរួមទប់ស្កាត់ ការរីករាលដាលនៃជំងឺ COVID-19 ជាពិសេស បងប្អូនពលរដ្ឋ ដែលទើបត្រឡប់មកពីក្រៅប្រទេស បានចូលរួមទាំងអស់គ្នា ផងដែរ ។
គួរកត់សម្គាល់ថា វិធានការនេះ ត្រូវបានចាត់ទុកថា ជាការចុះផ្សព្វផ្សាយដល់គោលដៅ ពោលគឺនៅតាមខ្នងផ្ទះ របស់ប្រជាពលរដ្ឋតែម្តង ដើម្បី ឲ្យពួកគាត់បានយល់ដឹង និងចេះបង្ការការពារខ្លួនពីជំងឺកូវីដ ១៩ ដែលកំពុងរីករាលដាល នៅតាមបណ្តាប្រទេសទូទាំងសាកលលោក រួមទាំងកម្ពុជា ផងដែរ ។
សូមជម្រាបថា ដើម្បី រួមគ្នាបង្ការទប់ស្កាត់ ការរីករាលដាលជំងឺ Covid-19 នៅប្រទេសកម្ពុជា ក្រសួងសុខាភិបាល បានបញ្ចេញសារអប់រំជាអាទិភាពសំខាន់ៗចំនួន ៤ សម្រាប់បងប្អូនប្រជាពលរដ្ឋអនុវត្តន៍ គឺ ៖ ទី១. អ្នកមកពីបរទេស សូមនៅតែក្នុងផ្ទះក្នុងរយៈពេល ១៤ថ្ងៃ ដើម្បី ការពារការឆ្លងជំងឺកូវីដ១៩ ចាប់ពីថ្ងៃចូលមកប្រទេសកម្ពុជាវិញ ។ ទី២.ប្រសិនបើលោកអ្នក មានរោគស ញ្ញាយ៉ាងតិចមួយ ក្នុងចំណោមសញ្ញាដូចជា៖ គ្រុនក្តៅយ៉ាងតិច៣៨អង្សាសេ ក្អក ហៀរសំបោរ ឈឺបំពង់ក ពិបាកដកដង្ហើម និងមានប្រវត្តិធ្វើដំណើរមកពីប្រទេសផ្សេងទៀត ក្រៅពីកម្ពុជា សូមទាក់ទងលេខទូរស័ព្ទ ១១៥ ជាបន្ទាន់។ ទី៣.ប្រសិនបើលោកអ្នក មានរោគសញ្ញាយ៉ាងតិចមួយក្នុងចំណោមសញ្ញាដូចជា គ្រុនក្តៅយ៉ាងតិច៣៨អង្សាសេ ក្អក ហៀរសំបោរ ឈឺបំពង់ក ពិបាកដក ដង្ហើម និងមានប្រវត្តិធ្វើដំណើរមកពីប្រទេសផ្សេងទៀត ក្រៅពីកម្ពុជា ក្នុង អំឡុងពេល១៤ថ្ងៃ មុនចេញរោគសញ្ញា សូមទាក់ទងទូរស័ព្ទ ១១៥ ជាបន្ទាន់ ។ និងទី៤. ប្រសិនបើលោកអ្នកបានប៉ះពាល់ ឬមានប្រវត្តិប៉ះពាល់ ជាមួយអ្នកជំងឺកូវីដ១៩ ដែលបញ្ជាក់ពីមន្ទីរពិសោធន៍ថា វិជ្ជមានសូមទាក់ទងទូរស័ព្ទលេខ ១១៥ ជាបន្ទាន់ ដើម្បីទទួលការពិភាក្សា យោ បល់ថែទាំសុខភាព ៕