អត្ថបទ៖ ចិន សារ៉ាត
កាលព្រឹកថ្ងៃទី២៨ ខែមេសា ឆ្នាំ២០២០នេះ ឯកឧត្ដម ព្រុំ សុខា រដ្ឋមន្ត្រីក្រសួងមុខងារសាធារណៈ បានដឹកនាំប្រតិភូ ជារដ្ឋលេខាធិការ អនុរដ្ឋលេខាធិការ និងសហការី អញ្ជើញក្នុងពិធីសំណេះសំណាល ផ្ដល់ការលើកទឹកចិត្តដល់ថ្នាក់ដឹកនាំ និងបុគ្គលិកសុខាភិបាល នៃមន្ទីរពេទ្យ ខេត្តកំពង់ចាម ។ ពិធីនោះ ក៏មានការអញ្ជើញចូលរួម ពីឯកឧត្ដម ខ្លូត ផន ប្រធានក្រុមប្រឹក្សាខេត្ត ឯកឧត្ដម អ៊ុន ចាន់ដា អភិបាលខេត្តកំពង់ចាម និងឯកឧត្ដម លោកជំទាវ ជាអភិបាលរងខេត្ត ថ្នាក់ដឹកនាំ និងបុគ្គលិកមន្ទីរពេទ្យ ជាច្រើនរូបទៀត ផងដែរ ។
ឯកឧត្ដម អ៊ុន ចាន់ដា អភិបាលខេត្តកំពង់ចាម បានលើកឡើងថា កន្លងមក មានអ្នកជម្ងឺកូវីដ ១៩ បានសម្រាកព្យាបាល នៅមន្ទីរពេទ្យខេត្តសរុបចំនួន ១៦នាក់ ស្រី ៤នាក់ ប្រុស ១២នាក់ ក្នុងនោះមាន ៖ ជនជាតិ អង់គ្លេសចំនួន ០៥នាក់ អាមេរិកាំង ០២នាក់ ម៉ាឡេស៊ី ០៨នាក់ និងខ្មែរ ០១នាក់ ។ អ្នកជម្ងឺកូវីដ ១៩ ដែលមាននៅក្នុងខេត្តកំពង់ចាម គឺជាករណីឆ្លងនៅបរទេស ហើយនាំចូលមក មានចំនួន ១៥នាក់ និងមានជនជាតិខ្មែរ ០១នាក់ បានឆ្លងនៅក្នុងប្រទេស គឺជាអ្នកធ្វើការផ្ទាល់ និងស្នាក់នៅជាមួយជនជាតិម៉ាឡេស៊ី ដែលមានជម្ងឺកូវីដ ១៩ នោះ ។
ទោះជាយ៉ាងណា មកដល់ពេលនេះ អ្នកជម្ងឺកូវីដ ១៩ ទាំង ១៦នាក់ នោះ បានព្យាបាលជាសះស្បើយ និងចេញពីមន្ទីរពេទ្យអស់ហើយ ហើយក៏ពុំមានអ្នកជម្ងឺកូវីដ ១៩ សម្រាកព្យាបាល នៅក្នុងមន្ទីរពេទ្យខេត្តទៀតដែរ ។ ឯកឧត្ដមអភិបាលខេត្ត មានប្រសាសន៍ថា អនុវត្តទៅតាមការណែនាំ របស់រាជារដ្ឋាភិបាល ក្នុងការប្រយុទ្ធប្រឆាំង ទៅនឹងជម្ងឺដ៏កាចសាហាវមួយនេះ ខេត្តកំពង់ចាម បានរៀបចំទីកន្លែងដាច់ដោយឡែក សម្រាប់ចត្តាឡីស័ក ចំនួន ០៣កន្លែង គឺ ៖ មន្ទីរពេទ្យខេត្ត ១៤បន្ទប់ ស្មើនឹង ៦២គ្រែ សណ្ឋាគារមេគង្គ ចំនួន ៧១បន្ទប់ ស្មើនឹង ១៤២បន្ទប់ និងសាលាគរុកោសល្យខេត្ត ០៣អគារ ស្មើនឹង ៥៥២បន្ទប់ ។ ទន្ទឹមនឹងនោះដែរ រដ្ឋបាលក្រុង-ស្រុក ឃុំ-សង្កាត់ ប៉ុស្តិ៍នគរបាលរដ្ឋបាល ឃុំ-សង្កាត់ និងមណ្ឌលសុខភាពឃុំ-សង្កាត់ នៅតែបន្តធ្វើការអប់រំ ដល់ប្រជាពលរដ្ឋ ឲ្យចេះរក្សាអនាម័យ តាមរយៈ ឧគ្ឃោសនស័ព្ទចល័ត តាមទីប្រជុំជន និងតាមខ្នងផ្ទះ ផងដែរ ។ ដោយឡែក ពលករ ពលការិនី ដែលបានអនុវត្តចត្តាឡីស័ក ដោយស្នាក់នៅដាច់ដោយឡែក រយៈពេល ១៤ថ្ងៃ មកទល់នឹងថ្ងៃនេះ មានចំនួន ២.៩២៦នាក់ បានសមាហរណកម្មទៅក្នុងសហគមន៍ និងគ្រួសារវិញ នៅសល់ចំនួន ១១០នាក់ កំពុងបន្តអនុវត្តន៍ ផងដែរ ។
ថ្លែងនាឱកាសនោះ ឯកឧត្ដម ព្រុំ សុខា រដ្ឋមន្ត្រីក្រសួងមុខងារសាធារណៈ មានប្រសាសន៍ថា អ្វីៗដែលមន្ទីរពេទ្យខេត្ត ក៏ដូចជា អាជ្ញាធរខេត្តកំពង់ចាម សម្រេចបានទាំងអស់នោះ គឺសាកសមទៅនឹងទំនុកចិត្តរបស់រាជរដ្ឋាភិបាល និងក្រសួងសុខាភិបាល ក៏ដូចជា ទំនុកចិត្តរបស់ប្រជាពលរដ្ឋ ក្នុងការទទួលខុសត្រូវរបស់យើង ក្នុងនាមជាយើងជាអ្នកបំពេញការងារ នៅក្នុងសមរភូមិមុខ នៃការប្រយុទ្ធប្រឆាំងនឹងជម្ងឺកូវីដ ១៩ នោះ ។ ឯកឧត្ដមរដ្ឋមន្ត្រី មានប្រសាសន៍ថា ចាប់តាំងពីការផ្ទុះ នៃជម្ងឺកូវីដ ១៩ នៅក្នុងប្រទេសចិន នាចុងឆ្នាំ២០១៩ មកនោះ នៅក្នុងក្របខណ្ឌកម្ពុជា គឺមិនទាន់មានការឆ្លងរីករាលដាល យ៉ាងធ្ងន់ធ្ងរ ដូចនៅតាមបណ្ដាប្រទេសមួយចំនួន ក្នុងពិភពលោកនោះឡើយ ។ យ៉ាងណាម៉ិញ នៅកម្ពុជាយើងមានអ្នកឆ្លងជម្ងឺកូវីដ ១៩ ចំនួន ១២២នាក់ ក្នុងនោះ ១១៩នាក់ បានព្យាបាលជាសះស្បើយ នឹងមិនមានអ្នកស្លាប់នោះឡើយ ។
ឯកឧត្ដមរដ្ឋមន្ត្រី សង្កាត់ធ្ងន់ថា ទោះបីជាយ៉ាងណាក្ដី ក៏ប្រមុខរាជរដ្ឋាភិបាលកម្ពុជា នៅតែក្រើនរំលឹកដល់ប្រជាពលរដ្ឋទាំងអស់ សូមកុំមានការធ្វេសប្រហែស និងមើលស្រាល ខណៈដែលអង្គការសុខភាពពិភពលោក លើកការព្រមានថា ការឆ្លងរាត្បាតជាសកល នៃជម្ងឺដ៏កាចសាហាវមួយនេះ អត់ទាន់ធូរស្រាល នៅឡើយនោះទេ ។
ម្យ៉ាងវិញទៀត ដោយសារតែបញ្ហាកូវីដ ១៩ ជាបញ្ហាសុខាភាពសាធារណៈ ពោលគឺ មិនមែនជាបញ្ហារបស់សុខាភិបាលតែមួយនោះទេ តែវាពាក់ព័ន្ធដល់សង្គមទាំងមួល ដើម្បី រួមគ្នាដោះស្រាយទាំងអស់គ្នា ។ តាមរយៈនេះ សូមឲ្យក្រុមគ្រូពេទ្យទាំងអស់ ក៏ដូចជា អាជ្ញាធរមូលដ្ឋាន សូមពង្រឹងស្មារតី បំពេញភារកិច្ចនេះ ជាបន្តទៅទៀត ដើម្បី ថែរក្សាសុខភាព ក៏ដូចជា សុខុមាលភាព និងសុវត្ថិភាពជូនប្រជាពលរដ្ឋ ជៀសផុតពីជម្ងឺ ដ៏កាចសាហាវមួយនេះ ទាំងអស់គ្នា។
