មន្ត្រីរាជការ នៃ​មន្ទីរ​ព័ត៌មាន ខេត្តកំពង់ចាម ០៦​រូប ត្រូវបាន​ប្រកាស​ចូលកាន់​តំណែង​

អត្ថបទ៖ ចិន សារ៉ាត

នា​រសៀល​ថ្ងៃទី​២៨ ខែឧសភា ឆ្នាំ​២០២០ នេះ ឯកឧត្ដម កែវ នា​ឬ​ទ្ធិ អភិបាលរង​ខេត្ត តំណាង​ដ៏​ខ្ពង់ខ្ពស់ ឯកឧត្ដម​អភិបាល នៃ​គណៈ​អភិបាល ខេត្តកំពង់ចាម អញ្ជើញ​ជា​អធិបតី​ក្នុង​ពិធី​ប្រកាស​ចូលកាន់​មុខតំណែង​មន្ត្រីរាជការ នៃ​មន្ទីរ​ព័ត៌មាន ខេត្តកំពង់ចាម ។​

គួសបញ្ជាក់​ថា យោង​ដីកា ស្ដីពី​ការតែងតាំង និង​ប្រគល់​ភារកិច្ច ជូន​មន្ត្រីរាជការ របស់​រដ្ឋបាល​ខេត្តកំពង់ចាម ត្រូវបានតែងតាំង​មន្ត្រី ចំនួន ០៦​រូប ទៅក្នុង​រចនាសម្ព័ន្ធ​មន្ទីរ​ព័ត៌មាន ខេត្តកំពង់ចាម ក្នុងនោះ​មាន ៖ ថ្នាក់​អនុប្រធាន​មន្ទីរ​ចំនួន ០២​រូប ថ្នាក់​ប្រធានការិយាល័យ​ចំនួន ២​រូប និង​ថ្នាក់​អនុប្រធាន​ការិយាល័យ ចំនួន ០២​រូប ។

ស្ថិតក្នុង​ឱកាស​នោះ ឯកឧត្ដម កែវ នា​ឬ​ទ្ធិ បាន​ណែនាំ​ដល់​មន្ត្រី ដែល​ទើប​តែងតាំង ចូលកាន់​តំណែង​ថ្មី ត្រូវមាន​សាមគ្គីភាព ខិតខំ​បំរើកា​រងា​រលើ​វិស័យ​ព័ត៌មាន ពោលគឺ ត្រូវធ្វើ​យ៉ាងណា ផ្សព្វផ្សាយ​ព័ត៌មាន បាន​ជ្រោ​ត​ជ្រាប ទៅដល់​សាធារណៈជន ពិសេស ត្រូវ​លុបបំបាត់​ព័ត៌មាន​ក្លែងក្លាយ ដែល​នាំ​ឲ្យ​ប៉ះពាល់​ដល់​សុខ​សន្តិ​សង្គម បង្ក​ឲ្យ​មាន​ការភាន់ច្រលំ ពី​សំណាក់​មហាជន​ទូទៅ មកលើ​ការខិតខំ​ប្រឹងប្រែង របស់​រាជរដ្ឋាភិបាល និង​អាជ្ញាធរ​មូលដ្ឋាន ។ ជាមួយ​ក៏ត្រូវ​ខិតខំ​ពង្រឹងសមត្ថភាព របស់ខ្លួន តាមរយៈ ការសិក្សា​រៀនសូត្រ​ទាំង​ផ្នែក​ភាសា និង​បច្ចេកទេស ដើម្បី ដើរ​ទាន់សភាពការណ៍​វិ​វ​ឌ្ឍ នៃ​ប្រទេសជាតិ ក៏ដូចជា សកលលោក ។​

ឆ្លៀត​ក្នុងឱកាស​នោះដែរ ឯកឧត្ដម​អភិបាលរង ខេត្តកំពង់ចាម ក៏បាន​ណែនាំ​ដល់​ថ្នាក់ដឹកនាំ​មន្ទីរ​ព័ត៌មាន ជាពិសេស មន្ត្រី​ជំនាញ​គ្រប់គ្រង​ព័ត៌មាន​ទូរទស្សន៍ និង​វិទ្យុ​ក្នុង​ខេត្ត ត្រូវ​បន្ត​យកចិត្តទុកដាក់​ការផ្សព្វផ្សាយ​អំពី​អនាម័យ និង​វិធី​បង្ការ​ការពារ​ជំងឺ​កូ​វីដ​១៩ ជូន​ដល់​ប្រជាពលរដ្ឋ ឲ្យ​បន្ត​អនុវត្ត ទៅតាម​ការណែនាំ របស់​ក្រសួងសុខាភិបាល ដើម្បី ជៀស​ផុតពី​ជម្ងឺ​ដ៏​កាច​សាហាវ​នេះ គ្រប់ៗ​គ្នា ផងដែរ ៕