ដោយ៖ លោក អឿន ស្រួ
គ្រោះថ្នាក់ចរាចរណ៍កើនឡើងនៅឆ្នាំ២០១៩ ខណៈស្នងការដ្ឋាននគរបាលខេត្តកំពង់ចាម ប្ដេជ្ញាបន្តវិធានការរឹតបន្តឹងការអនុវត្តច្បាប់ចរាចរណ៍ផ្លូវគោក និងបង្កើនការផ្សព្វផ្សាយដល់ប្រជាពលរដ្ឋ។ នេះជាប្រសាសន៍របស់លោកវរៈសេនីយ៍ទោ សែម សាន នាយការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តកំពង់ចាម។
លោកវរៈសេនីយ៍ទោ សែម សាន បានប្រាប់វិទ្យុជាតិភ្នំប្រុសភ្នំស្រីខេត្តកំពង់ចាមនៅថ្ងៃទី៣០ ខែមករា ឆ្នាំ២០២០ថា ទន្ទឹមទៅនឹងការកើនឡើងនូវករណីគ្រោះថ្នាក់ចរាចរនិងអ្នកស្លាប់និងរបួស ស្នងការដ្ឋាននគរបាលខេត្តកំពង់ចាមបានត្រៀមលក្ខណៈរួចជាស្រេច ដោយមានផែនការនិងវិធានការច្បាស់លាស់ ដើម្បីអនុវត្តន៍ទៅតាមអនុសាសន៍ក៏ដូចជាច្បាប់ដែលមានស្រាប់ ដែលចក្ខុវិស័យគឺចង់ឲ្យករណីគ្រោះថ្នាក់បាត់បង់ជីវិត ក៏ដូចជារបួស ការខូចខាតទ្រព្យសម្បត្តិឲ្យមានការទាបបំផុត។
លោកវរៈសេនីយ៍ទោបានបន្ថែមថា មូលហេតុបង្ករឲ្យមានគ្រោះថ្នាក់ចរាចរណ៍ជាចំបងគឺកត្តាមនុស្ស ដោយអ្នកបើកបរធ្វេសប្រហែស ប្រើប្រាស់ល្បឿនលឿន មិនប្រកាន់ស្តាំ ជែងក្នុងស្ថានភាពគ្រោះថ្នាក់ បើកបរក្នុងស្ថានភាពស្រវឹង បើកបរបញ្ច្រាស់ទិស មិនគោរពសិទ្ធិអាទិភាព ពិសេសអ្នកបើកបរម៉ូតូមិនពាក់មួកសុវត្ថិភាព។
ឆ្នាំ២០២០នេះ គឺត្រូវតែពង្រឹងវិធានការរឹតបន្តឹងច្បាប់ចរាចរណ៌ផ្លូវគោកឲ្យបានតឹងរឹងបំផុត លើសពីឆ្នាំមុនៗ ដើម្បីធ្វើយ៉ាងណាឱ្យអត្រាគ្រោះថ្នាក់ចរាចរណ៍ស្ថិតក្នុងកំរិតទាបបំផុត។ លោកនាយការិយាល័យបានបន្ថែមថា បងប្អូនប្រជាពលរដ្ឋ ពិសេសអ្នកប្រើប្រាស់ផ្លូវ ត្រូវចូលរួមជាមួយស្ថាប័នមានសមត្ថកិច្ច និងសហការណ៍ជាមួយកងកម្លាំងនគរបាល ដើម្បីរក្សាសុវត្ថិភាព និងកាត់បន្ថយគ្រោះថ្នាក់ចរាចរណ៍ឲ្យមានប្រសិទ្ធភាព។
យោងតាមរបាយការណ៍សរុបសភាពការណ៍ កិច្ចប្រតិបត្តិការប្រចាំឆ្នាំ២០១៩ របស់ស្នងការដ្ឋាននគរបាលខេត្តកំពង់ចាមបានឲ្យដឹងថា គ្រោះថ្នាក់ចរាចរណ៍កើតឡើងចំនួន ២០២ករណី ធៀបទៅនឹងឆ្នាំ២០១៨ មានចំនួន១៩១ករណី កើនឡើង១១លើក និងបង្ករឲ្យមនុស្សស្លាប់ចំនួន១២០នាក់ ធៀបទៅនឹងឆ្នាំ២០១៨ មានចំនួន១០១នាក់ កើនឡើងចំនួន១៩នាក់៕
