អត្ថបទដោយ៖ លោក ធឹម សារ៉ន
គ្រប់សេវាឯកជនទាំងអស់មិនត្រូវបានអនុញ្ញាតិឱ្យលក់ថ្នាំ ឬផ្តល់សេវាព្យាបាលជំងឺរបេង ជាដាច់ខាត ទោះជំងឺរបេងកម្រិតក៏ដោយ ។ មានតែមន្ទីរពេទ្យរដ្ឋតែប៉ុណ្ណោះដែលមានសិទ្ធិនិងលទ្ធភាពគ្រប់គ្រាន់ក្នុងការផ្តល់សេវាព្យាបាលជំងឺរបេងបាន ។
លោកស្រី ពេជ្រ គីមភ័រ អនុប្រធានការិយាល័យនិយ័តកម្មសុខាភិបាលនៃមន្រសុខាភិបាលខេត្តបានប្រាប់វិទ្យុជាតិភ្នំប្រុសភ្នំស្រីខេត្តកំពង់ចាមនៅថ្ងៃអង្គារ ទី០២ ខែមិថុនាឆ្នាំ២០២០ថា មន្ទីរសុខាភិបាលមិនអនុញ្ញាតិឱ្យសេវាឯកជនលក់ថ្នាំ ឬព្យាបាលជំងឺរបេងណោះឡើយ ព្រោះខ្លាចមានភាពស៊ាំជាមួយថ្នាំ។ ការស៊ាំថ្នាំនេះវានឹងអាចមានបញ្ហាប្រឈមច្រើនដល់សុខភាពរបស់អ្នកជំងឺ ចំណាយពេលយូដើម្បីព្យាបាល ឬអាចបណ្តាលឲ្យស្ថានភាពជំងឺធ្ងន់ធ្ងររហូតដល់ស្លាប់ទៀតផង ប្រសិនបើការព្យាបាលមិនបានត្រឹមត្រូវ។
លោកស្ត្រីបន្តែមទៀតថា មន្ទីរសុខាភិបាលបានខិតខំរួមគ្នាពង្រឹងសេវាតាមមូលដ្នាន យកចិត្តទុកដាក់ផ្សព្វផ្សាយ និងព្យាបាលជំងឺរបេងដើម្បីឲ្យសម្រេចគោលដៅនៅឆ្នាំ២០៣០ គ្មានជំងឺរបេង។ ក្នុងនោះទាំងវិស័យរដ្ននិងឯជនគួរតែសហការគ្នាក្នុងការផ្តល់សេវាព្យាបាលជាពិសេសបើមានអ្នកជំងឺរបេងទៅរកសេវាព្យាបាលឬទិញថ្នាំ ត្រូវណែនាំគាត់ត្រូវទៅរកព្យាបាលនៅពេទ្យរដ្ន ព្រោះការព្យាបាលមិនតម្រូវឲ្យបង់ប្រាក់ និងមានការធ្វើរោគវិនិឆ្ឆ័យ ត្រឹមត្រូវ និងថ្នាំព្យាបាលដោយជាក់លាក់ផងដែរ៕