ដោយការយកចិត្តទុកដាក់អំពីសុខទុក្ខ និងការរស់នៅរបស់ប្រជាពលរដ្ឋយើង នៅថ្ងៃទី១៤ ខែតុលា ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាមបានដឹកនាំក្រុមការងារជារួមជាមួយអាជ្ញាធរសមត្ថកិច្ចស្រុកកំពង់សៀមដើម្បីពិនិត្យមើលស្ថានភាពបាក់ច្រាំងនិងរកដំណោះស្រាយស្ថិតនៅក្នុងឃុំកោះរការស្រុកកំពង់សៀម។
ក្រោយពីការចុះពិនិត្យនិងសិក្សាករណីបាក់ច្រាំងទន្លេខាងលើរួចមក ឯកឧត្តម អ៊ុន ចាន់ដា បានដាក់ចេញវិធានការជាបន្ទាន់ក្រោយពីមានការសំណូមពរពីសំណាក់បងប្អូនប្រជាពលរដ្ឋឲ្យការដ្ឋានបូមខ្សាច់ធ្វើការបញ្ឈប់សកម្មភាពរបស់ខ្លួនដែលលើកហេតុផលថាករណីបាក់ច្រាំងទន្លេនេះបណ្ដាលមកពីការដ្ឋានបូមខ្សាច់នៅតំបន់នោះតែម្ដង។
ឯកឧត្តម អ៊ុន ចាន់ដា ក៏បានបញ្ជាចំនួន ៣ចំនុច ទី១ ឲ្យក្រុមហ៊ុនបូមខ្សាច់បញ្ឈប់សកម្មភាពរបស់ខ្លួនរង់ចាំមន្ត្រីជំនាញធ្វើការសិក្សាឡើងវិញចំណុចទី ២ ឯកឧត្តមនឹងធ្វើសំណើជូនប្រមុខរាជរដ្ឋាភិបាលតាមរយៈគណៈកម្មការគ្រប់គ្រងគ្រោះមហន្តរាយ ដើម្បីមានវិធានការទប់ រឺ វិធានការនានាការពារការបាក់ច្រាំងទន្លេនេះនិងចំណុចទី ៣ គឺ ចំពោះមុខ ឯកឧត្តមចាត់អោយអាជ្ញាធរ ជួយរុះរើផ្ទះ ដែលប៉ះពាល់ ផ្អាកចរាចរណ៍ធ្ងន់ធ្ងន់ជាបណ្តោះអាសន្នជៀសវាងការរំជួយធ្វើអោយបាក់ច្រាំបន្តទៀត។
សូមបញ្ជាក់ថា ករណីបាក់ច្រាំងទន្លេនៅ ភូមិតាមាង ឃុំរការ ស្រុកកំពង់សៀម ខេត្តកំពង់ចាម បាន បាក់ស្រុតចុះក្រោម ប្រមាណ ៤ម៉ែត ទៅ៦m និងបាក់ជំរៀលចូល ប្រមាណ ពី ៦ម៉ែត្រ ទៅ ២០ម៉ែត្រ និងប៉ះពាក់ផ្ទះ ត្រូវរុះរើ ៤ខ្នង ប្រឈម ៣៤ខ្នង ដែលទីតាំង ប្រឈមនេះ មានប្រវែង ប្រហែល ១.០០០ម៉ែត្រ ។
ជួន រតនាវង្ស
