ថុង សីហា
ដើម្បី ចូលរួមទិវាពិភពលោកប្រយុទ្ធនឹងជម្ងឺអេដស៍ ១ធ្នូ ២០២១ ក្រោមប្រធានបទ «បញ្ចប់វិសមភាព បញ្ចប់អេដស៍ បញ្ចប់ជម្ងឺឆ្លងរាតត្បាតសកល»នេះ សាខាកាកបាទក្រហមកម្ពុជា ខេត្តកំពង់ចាម និងក្រុមការងារ ឥស្សរជនឆ្នើមថ្នាក់សាខា នៅព្រឹកថ្ងៃទី០១ ខែធ្នូ ឆ្នាំ២០២១នេះ បានប្រារព្ធរៀបចំពិធី សំណេះ សំណាល នៅក្នុងទីស្នាក់ការសាខា ក្រោមអធិបតីភាព លោកជំទាវ ប៉ាង ដានី អនុប្រធានអចិន្ត្រៃយ៍សាខា និងជាប្រធានក្រុមការងារឥស្សរជនឆ្នើមថ្នាក់សាខា ដោយមានការអញ្ជើញចូលរួមពី ឯកឧត្តម លោកជំទាវ លោក លោកស្រី ជាសមាជិក សមាជិកាគណៈកម្មាធិការសាខា លោកស្រី ប្រធានអនុសាខាក្រុងកំពង់ចាម-អនុសាខា ស្រុកកំពង់សៀម រួមជាមួយអ្នកផ្ទុកមេរោគអេដស៍ អ្នកស្ម័គ្រចិត្តភូមិ សង្កាត់ ទីប្រឹក្សា និងយុវជនកាកបាទក្រហមកម្ពុជា មកពីវិទ្យាល័យតេជោ ហ៊ុនសែន បឹងកុក និង វិទ្យាល័យ ដីដុះ សរុបទាំងអស់ ចំនួន ៧៩នាក់ ផងដែរ ។
នាឱកាសនោះ លោកជំទាវ ប៉ាង ដានី បានអានផ្សព្វផ្សាយ នូវសារលិខិត របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លើយតបមេរោគអេដស៍ ជម្ងឺអេដស៍ និងការអភិវឌ្ឍ នៅកម្ពុជា ជូនចំពោះបងប្អូនជនរួមជាតិ ក្នុងឱកាសទិវាពិភពលោកប្រយុទ្ធនឹងជំងឺអេដស៍ ១ធ្នូ ឆ្នាំ២០២១ ដោយក្នុងនោះ សារលិខិត បានអំពាវនាវ ដល់បងប្អូនជនរួមជាតិ សូមបន្តអនុវត្តនូវចំណុចសំខាន់ៗ ដូចខាងក្រោម ដើម្បីសុខុមាលភាពគ្រួសារ និងសង្គម ដែលក្នុងនោះ មាន ៖ ១.សូមបងប្អូនប្រជាពលរដ្ឋ ក្មួយៗយុវជនយុវនារី សិក្សាស្វែងយល់ជាប្រចាំ នូវចំណេះដឹងថ្មីៗ ស្តីពីការបង្ការការចម្លងមេរោគអេដស៍ ក្នុងគ្រួសារ សហគមន៍ និងសង្គមជាតិ ដើម្បី បញ្ចប់ជម្ងឺអេដស៍ នៅឆ្នាំ២០២៥ ឱ្យបានតាមការគ្រោងទុក ។ ២.ក្នុងករណីសង្ស័យថា បានប្រឈមនឹងការឆ្លងមេរោគអេដស៍ ត្រូវស្វែងរកសេវាផ្តល់ប្រឹក្សា និងធ្វើតេស្តឈាមរកមេរោគអេដស៍ ដោយស្ម័គ្រចិត្ត ដើម្បី ទទួលបានសេវាថែទាំ និងព្យាបាលទាន់ពេលវេលា ។ ៣. ចំពោះស្ត្រីមានផ្ទៃពោះ ត្រូវស្វែងរកសេវាថែទាំ និងពិនិត្យផ្ទៃពោះ ឱ្យបានត្រឹមត្រូវ និងទៀងទាត់តាមការណែនាំ របស់បុគ្គលិកពេទ្យ ទប់ស្កាត់ការចម្លងមេរោគអេដស៍ ពីម្តាយទៅទារក ដើម្បី ធានាសុខុមាលភាព ទាំងមាតា និងទារក ។ ៤.ត្រូវចូលរួមបញ្ចប់ការរើសអើង នូវគ្រប់រូបភាព ចំពោះ អ្នកផ្ទុកមេរោគអេដស៍ និងជម្ងឺអេដស៍ ស្របតាមច្បាប់ស្តីពីការបង្ការ និងទប់ស្កាត់ការរីករាលដាលមេរោគអេដស៍ និងជម្ងឺអេដស៍ នៅកម្ពុជា ។ ៥.ត្រូវការពារជាប្រចាំ តាមរយៈការប្រើស្រោមអនាម័យ ជាពិសេស ចំពោះប្រជាពលរដ្ឋទាំងឡាយ ដែលមានមុខរបរប្រឈមខ្ពស់ ទៅនឹងការឆ្លងមេរោគអេដស៍ ។ ៦.ទន្ទឹមនឹងការយកចិត្តទុកដាក់ ចំពោះមេរោគអេដស៍ និងជម្ងឺអេដស៍ សូមបងប្អូនប្រជាពលរដ្ឋ យកចិត្តទុកដាក់ ចំពោះ ជម្ងឺរាតត្បាតសកលកូវីដ-១៩ ដោយត្រូវការពារសុខភាព អនាម័យឱ្យបានខ្ជាប់ខ្ជួន រស់នៅ តាមគន្លងប្រក្រតីភាពថ្មី ប្រកាន់ខ្ជាប់នូវវិធានសុខាភិបាល «៣ការពារ ៣កុំ» ដើម្បី ធានាសុខុមាលភាពគ្រួសារ សហគមន៍ និងសង្គមជាតិយើង ។
ស្ថិតក្នុងឱកាសនោះដែរ សាខាកាកបាទក្រហមខេត្ត ក៏បានផ្តល់នូវវត្ថុអនុស្សាវរីយ៍ ជូនអ្នកផ្ទុកមេរោគអេដស៍ ៣២នាក់ រួមមាន ៖ អង្ករ មី ត្រីខ ទឹកត្រី ទឹកស៊ីអ៊ីវ មុង ភួយ ក្រមា សារុង ម៉ាស់ ទឹកអាល់កុល សាប៊ូ និងថវិកាក្នុងម្នាក់ៗ ៥០.០០០រៀល ។ ជាមួយនោះ ក៏បានផ្តល់ជូន អ្នកស្ម័គ្រចិត្ត ទីប្រឹក្សា និងយុវជន កក្រក ចូលរួមទាំង ៣០នាក់ នូវ ថវិកា មួយចំនួន ផងដែរ ៕