ថ្ងៃទី០៦ ខែមករា ឆ្នាំ២០២១ លោកជំទាវ អនហេង លក្ខិណា ប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារ ខេត្តកំពង់ចាមបានដឹកនាំក្រុមការងារនាំយកសម្ភារៈសិក្សា និងថវិកា ចុះសួរសុខទុក្ខ និងលើកទឹកចិត្តដល់សិស្សានុសិស្សមានជីវភាពខ្វះខាតដែលទើបជាប់សញ្ញាបត្រមធ្យមសិក្សាទុតិយភូមិ និងបឋមភូមិចំនួន៤នាក់នៅវិទ្យាល័យ ហ៊ុន សែន ព្រៃទទឹង ស្ថិតក្នុងស្រុកព្រៃឈរ ខេត្តកំពង់ចាម។
គួររំលឹកផងដែរថាកន្លងមកក្រុមការងារធ្លាប់បានចុះទៅលើកទឹកចិត្តប្អូនៗចំនួន៣នាក់ដែលមានជីវភាពខ្វះខាតបំរុងបោះបង់ការសិក្សាត្រឹមថ្នាក់ទី៩ ឲ្យបានចូលរៀនឡើងវិញ ពេលនេះប្អូនៗបានប្រឡងជាប់សញ្ញាបត្រមធ្យមសិក្សាបឋមភូមិ ដោយទទួលបាននិទ្ទេសល្អទៀតផង។ ក្នុងនោះក្រុមការងារក៏បានលើកទឹកចិត្តដល់ប្អូនស្រីម្នាក់ទៀតជួបការលំបាកក្នុងជីវភាពដែលកំពុងសិក្សាថ្នាក់ទី១២ ត្រៀមប្រឡង ប្អូនមានការតស៊ូក្នុងការសិក្សា ធ្វើការបណ្ដើរ រៀនបណ្ដើរក្នុងនាមជាកូនកំព្រាឪពុក ។ ដោយមើលឃើញទឹកចិត្តខិតខំរបស់ប្អូន លោកស្រីវេជ្ជបណ្ឌិត ចាប់ ច័ន្ទធិតា អនុប្រធានមន្ទីរពេទ្យខេត្ត និងជាសមាជិកា គ.ក.ស.ក ខេត្តបានសន្យាជូនប្រាក់ ១០០ដុល្លារដល់ប្អូនជាការលើកទឹកចិត្តនៅពេលប្រឡងជាប់។
ជាក់ស្ដែងថ្ងៃនេះលោកជំទាវប្រធានបាននាំយកអំណោយជាសម្ភារៈសិក្សា និងថវិកាមួយចំនួនជូនដល់ប្អូនៗជាការលើកទឹកចិត្តឲ្យបន្តការខិតខំសិក្សារហូតដល់ចប់ចុងចប់ដើមដើម្បីអនាគតមួយដ៏បវរ។ លោកស្រីវេជ្ជបណ្ឌិតក៏បានផ្ដល់ជូននូវថវិកា១០០ដុល្លារតាមការសន្យាដល់ប្អូនស្រីដែលទើបជាប់សញ្ញាបត្រមធ្យមសិក្សាទុតិយភូមិ ទោះបីមិនបានឆ្លងកាត់ការប្រឡងក៏ដោយតែប្អូនបានព្យាយាមរៀនសូត្រ និងមានការតស៊ូក្នុងជីវិត។ លោកស្រីក៏បានផ្ដល់ថវិកាម្នាក់៥មុឺនរៀលបន្ថែមទៀតដល់ប្អូនៗ៣នាក់ទៀតដែលទើបប្រឡងជាប់សញ្ញាបត្រមធ្យមសិក្សាបឋមភូមិនោះផងដែរ។